އިޒްރޭލުގައި ވަގު ބޮޑު ވަޒީރަކަށް މަގާމު އަދާ ކުރެވުނު ކަމުގައި ވިއަސް ގާނޫނު ބުނާ ގޮތުން ވަގު ވަޒީރަކަށް އެމަގާމުގައި ނުހުރެވޭނެ ކަމަށް އިޒްރޭލުގެ ހައިކޯޓުން ހުކުމް ކޮށްފިއެވެ. ލަފާ ކުރެވޭ ދުވަސްތަކުގައި އިޒްރޭލުގެ މަތީ ކޯޓުގެ ޙުކުމާ ގުޅިގެން ވަގު ވަޒީރު އާރިޔާ މަޚުލޫފް ދާރީ މަގާމުން ވަކިކުރާނެ އެވެ. ނޫނީ އޭނާއަށް އިސްތިއުފާ ދިނުމަށް މަޖުބޫރު ވާނެ ހެންނެވެ. މަޚުލޫފް ދާރީއަކީ ބެންޔާމީން ނަތަންޔާހޫގެ ސަރުކާރުގައި ދެ މިނިސްޓްރީއެއް ބަލަހައްޓާ ވަޒީރެވެ.
ފުލުހުންގެ މިނިސްޓްރީއާއި ހެލްތު މިނިސޓްރީ ބަލަހައްޓާ ހަރުކަށި ހައްދު ފަހަނައަޅާފައިވާ ޝާސް ޕާޓީގެ ލީޑަރަކީ 1999 ވަނަ އަހަރު ރިޝްވަތުގެ ކުށް ސާބިތުވެ، ޖަލު ހުކުމެއް އައިސްފައިވާ މީހެކެވެ. އޭނާ ވަނީ އަޚްލާގީ ގޮތުން އާންމު ސިޔާސީ ހަޔާތުން ހަތް އަހަރަށް ދުރުގައި ހުންނަން ހުކުމް ކޮށްފައިވާ މީހެކެވެ.
އޭނާ ވަޒީރުކަމަށް ވަގުތީ ގތުން އައީ އޭނާގެ ޖަރީމާއަކީ މާ ހުތުރު ޖަރީމާއެއް ނޫން ކަމަށް އިލެކްޝަން ކޮމިޝަނުން ނިންމައި އޭނާއަށް ފުރުސަތެއް ދިނުމުނެނެވެ.
މަޚްލޫފް ދާރީއަކީ މީގެ އަހަރެއްހާ ދުވަސް ކުރިން ޓެކްސްއަށް މަކަރު ހެދުމާއި ހީލަތުގެ ކުށް ސާބިތުވެ، ހިފާފައިވާ ގުދުސްގެ މެޖިސްޓްރޭޓް ކޯޓު ހުކުމް ކޮށްފައިވާ މީހެކެވެ.
އިތުރަށް ކިޔާލަން:
ވަގު ވަޒީރު ފަނޑިޔާރުންނަށް އިންޒާރުދޭން ފަށައިފި
އިޒްރޭލު ހައި ކޯޓުން 10 ފަނޑިޔާރުންގެ ތާއީދާއި އެއް ފަނޑިޔާރުގެ ޑިސެންޓް އޮޕިނިއަންއާއެކު ކުރި ހުކުމްގައި އަންހެން އުއްތަމަ ފަނޑިޔާރު އެސްތަރ ހަޔޫތު ބުނީ މަޚުލޫފް ދާރީ ކޮށްފައި ހުރީ "ވަރަށް ބޮޑެތި ކުށްތަކެއް... މަގާމުގައި ހުރެގެން ހިންގާފައިވާ ޖަރީމާތަކެއް" ގެ މާޒީއެއް އޮތް މީހަކު މިނިސްޓަރު ރޭންކަށް އަލުން ލުމަކީ "ބުއްދިވެރި ނޫން ކަމެއް" ކަމަށެވެ. ހަރުކަށި ގޮތަކަށް، "ނަތަންޔާހޫ އޭނާ އައްޔަން ކުރުމަކީ ބޮޑުވަޒީރަކު އޭނާގެ ކެބިނެޓް އައްޔަންކުރުމުގައި މަގުދައްކައިދޭން ޖެހޭ އަސާސީ އުސޫލުތަކާ ފުށުއަރާ ކަމެއް" ކަމަށެވެ.
ޔަހޫދީ ޑިމޮކްރެސީގައި ބޮޑު ވަޒީރަކީވެސް ވަގެކެވެ. އޭނާގެ މައްޗަށް ކޮރަޕްޝަންގެ ތިން މައްސަލައެއްގައި ޝަރީއަތް ކުރަމުންދެއެވެ. ނަމަވެސް އޭނާ އަކީ މިނިސްޓްރީ އަކާ ޙަވާލުވެފައިވާ ވަޒީރެއް ނޫން ކަމުން އޭނާއަށް ބޮޑު ވަޒީރުގެ މަގާމު އަދާކުރުމަށް ގާނޫނީ ހުރަހެއް ނެތް ކަމަށް އިޒްރޭލު ކޯޓުން ކުރިން ބުނެފައި ވެއެވެ.
މަޚުލޫފް ދާރީގެ މަގާމު ގެއްލޭ ހިނދު ފުލުހުންގެ މިނިސްޓްރީއާއި ހެލްތު މިނިސްޓްރީ ހުސްވުމުން އާންމު އުސޫލުން އެތަންތަން ބަލަހައްޓަން ޖެހޭނީ ނަތަންޔާނޫއެވެ. ނަމަވެސް ވަގަކަށްވާތީ އޭނާއަށް އެ ދެ މަގާމާ ހަވާކު ވެވޭކަށެއް ނެތެވެ.
ހައި ކޯޓުގެ ހުކުމަށްފަހު މާގިރެއް ނުވަނީސް ނަތަންޔާހޫ ވަނީ އެއްބައިވަންތަކަން ދެއްކުމުގެ ގޮތުން މަޚުލޫފް ދާރީގެ ގެއަށް ގުދުސްގައި ހުންނަ ގެއަށް ގޮސް އޭނާއާ ވާހަކަ ދައްކާފައެވެ.
މީގެ ދެ ހަފްތާ ކުރިން ނަތަންޔާހޫ އޮޕަރޭޝަނަކަށް ހޭނައްތާފައި އޮތްވައި ވަގުތީ ބޮޑު ވަޒީރަކަށް ހުރީ މަޚްލޫފް ދާރީއެވެ.
ނަތަންޔާހޫއާއި ސަރުކާރު ބޮޑުން ބުނެފައި ވަނީ ގާނޫނަށް ބަދަލު ގެނަސްގެންވެސް ދާރީއަށް ވަޒީރުކަން ލިބޭ ގޮތަށް ހަދާނެ ކަމަށެވެ.
އިޒްރޭލުގެ ޖަސްޓިސް މިނިސްޓަރު ޔާރިވް ލެވިން ބުނީ "ރާބާއީ އާރިއާ ދާރީ އަށާއި ޝާސް އަދި އިސްރާއީލުގެ ޑިމޮކްރަސީއަށް ކުރިމަތި ކުރުވި އަނިޔާއަށް ފަރުވާ ހޯދުމަށް ކުރެވެން އޮތް ހުރިހާ ކަމެއް ކުރާނެ ކަމަށެވެ."
އިޒްރޭލުގެ ޗެނަލް 12 ގެ ނިއުސް ރިޕޯޓަކާ ހަވާލާދީ މީޑިއާގައި ބުނެފައި ވަނީ މަޚްލޫފް ދާރީއާއި އޭނާގެ ހަރުކަށި ޝާސްގެ ފާދިރީންގެ ލީޑަޝިޕް ކައުންސިލާއި ނަތަންޔާހޫގެ ވިސްނުމަކީ ކޯޓުގެ ނިންމުމަށް އިހުތިރާމް ކުރަން ޖެހޭ ކަމަށެވެ. ނަމަވެސް ދާރީ އިސްތިއުފާ ދޭނީ ކަމެއް ނޫނީ ނަތަންޔާހޫ އޭނާ ވަކި ކުރާނީ ކަމެއް ސާފެއް ނުވެއެވެ.
އިޒްރޭލުގެ ޝަރުއީ ދާއިރާއަށް ތާލިބާން ސްޓައިލްގެ ހަރުކަށި ޔަހޫދީން އިންޒާރު ދެމުން ދިއުމާ ގުޅިގެން ޔަހޫދީ ގައުމުގެ ޝިން ބެޓް ސެކިއުރިޓީ ސާވިސްއިން ވަނީ ހައިކޯޓުގެ އުއްތަމަ ފަނޑިޔާރު އެސްތަރ ހަޔޫތު އާއި އެހެން ފަނޑިޔާރުންގެ ސަލާމަތީ ކަންކަން ވަރުގަދަ ކޮށްފައެވެ.
