ހުސްވި ޖަނަވަރީ މަހު 28 ވަނަ ދުވަހު ބޭއްވި އެމްޑީޕީގެ ރިޔާސީ ޕްރައިމަރީގެ ދާއިމީ ނަތީޖާ މިއަދު އިއުލާން ކުރައްވައިފިއެވެ. ދާއިމީ ނަތީޖާއިން ވެސް ދައްކާފައިވަނީ ރިޔާސީ ޕްރައިމަރީ ކާމިޔާބުކޮށް އެމްޑީޕީގެ ރިޔާސީ ޓިކެޓު ކަށަވަރު ކޮށްފައިވަނީ އެޕާޓީގެ އިސްލީޑަރު ރައީސް އިބްރާހީމް މުހައްމަދު ސާލިހެވެ.
ވާދަވެރިކަން ބޮޑުވެގެން ދިޔަ ކެމްޕޭނާއި ހަޅުތާލު ބޮޑުވި ވޯޓަކަށްފަހު ރައީސް އިބްރާހީމް މުހައްމަދު ސާލިހު ރިޔާސީ ޓިކެެޓް ކާމިޔާބު ކުރެއްވުމުން އެމަނިކުފާނުގެ މިތުރު އެކަމަކު ޕްރައިމަރީގެ ވާދަވެރިޔާ ރައީސް މުހައްމަދު ނަޝީދު ފުރަތަމަ ބަލި ގަބޫލު ނުކުރެއްވިއެވެެ. އެންމެފަހުން ބަލި ގަބޫލު ކުރެއްވުމަށްފަހު އެމަނިކުފާނު ގެންދަވަނީ "ފިކުރެއްގެ ދިރުން" ރަށްރަށުގައި އާލާކޮށް އެމްޑީޕީގެ ތެރޭގައި ސިޔާސީ ހަރަކާތްތައް ވަރުގަދަ ކުރެއްވުމަށެވެ. އެކަން އެގޮތަށް ނުކުރެއްވޭނޭ ކަމަށާއި އެއީ ޕާޓީގެ ސިޔާސަތުތަކާއި ގަވާއިދާ ޚިލާފު ކަމެއް ކަމަށް ވިދާޅުވެ އެކަން ހުއްޓަވާލައްވައި އަލުން ވިސްނެވުމަށް ޕާޓީގެ ޗެއާޕާސަން ފައްޔާޒު އިސްލާއީލް ރައީސް ނަޝީދަށް ދެންނެވިއެވެ. އެހެންނަމަވެސް އެމަނިކުފާނު އެކަމެއް ގަބޫލެއް ނުކުރެއްވިއެވެ. އަދި އެމަނިކުފާނުގެެ އެމަސައްކަތް ނުހުއްޓުވޭނޭ ކަމަށް ވިދާޅުވެ މިހާރުވެސް ގެންދަވަނީ އެމަސައްކަތް ކުރައްވަމުންނެވެ.
އެންމެފަހުން އެމްޑީޕީގެ ޑެޕިޔުޓީ ޗެއާ އިބްރާހީމް ވަހީދު ވިދާޅުވީ ރައީސް ނަޝީދު ފިކުރެއްގެ ދިރުމުގެ ނަމުގައި ގޮފި ހެދުމަކީ މައްސަލައެއް ނޫންކަމަށެވެ. ގޮފިއުފައްދައިގެން ކުރައްވާ ކަމެއް ޕާތީން ބަލާނޭ ކަމަށް އިބްރާ ވިދާޅުވިއެވެ. އެމްޑީޕީގެ ރިޔާސީ ކެންޑިޑޭޓާ ދެކޮޅަށް ރައީސް ނަޝީދު އެއްވެސް ކަމެއް ކުރައްވާތަނެއް އަދި ނުފެންނަ ކަމަށާއި އެފަދަ ކަމެއް ފެނިއްޖެނަމަ ގަވާއިދުގެ ތެރެއިން ހައްލު ކުރައްވާނޭ ކަމަށް ވެސް އިބްރޭ ވިދާޅުވިއެވެ.
