އެމްޑީޕީގެ މައި ހަރުގެ ހުސްކުރަން އެގޭގެ ވެރިފަރާތުން އެ ޕާޓީއަށް އަންގައިފިއެވެ.
މާލޭ އާޓިފިޝަލް ބީޗު ސަރަހައްދުގައި ހުންނަ ހަރުގެ ހުސްކުރުމަށް އަންގާފައިވާ ކަމަށް އެމްޑީޕީއިން މީޑިއާތަކަށް މައުލޫމާތު ދެމުން ބުނެފައިވާ ގޮތުގައި އެގޭގެ ވެރިފަރާތުން ހަރުގެ ހުސްކުރަން އެންގީ މިދިޔަ މަހު ފޮނުވި ސިޓީއަކުންނެވެ. މައުލޫމާތު ލިބިފައިވާ ގޮތުގައި ހަރުގެ ހުސްކުރަން އަންގާފައި ވަނީ އެ ބިމުގައި އިމާރާތެއް ކުރުމަށެވެ.
މީގެ އިތުރުން އެ ހަރުގެ އެހެން ތަނަކަށް ބަދަލުކުރުމަށް ބިމެއް ހޯދުމުގެ މަސައްކަތް ޕާޓީން އަންނަނީ ކުރަމުން ކަމަށާއި މިހާތަނަށް ބިމެއް ލިބިފައި ނުވާ ކަމަށް އެމްޑީޕީ އިން މީޑިއާތަކަށް މައުލޫމާތު ދެއެވެ.
އެމްޑީޕީގެ މައި ހަރުގެ ހިންގަން ދިން އެއްބަސްވުމުގެ މުއްދަތު ވަނީ ހަމަވެފައެވެ. ނަމަވެސް އެ ތަން ހުސްކުރަން ވެރިފަރާތުން އަންގާފައި ވަނީ މިއަހަރު ސެޕްޓެމްބަރު 9ގައި ބާއްވާ ރިޔާސީ އިންތިހާބު ނިމުމަށްފަހުގައި ކަމަށް ވެސް އެމްޑީޕީން ވަނީ ބުނެފައެވެ.
އެމްޑީޕީ މައި ހަރުގެ ހަދާފައި ވަނީ އެމްޑީޕީގެ އިސް އެކްޓިވިސްޓެއްގެ ބިމެއްގައެވެ. އޭނާ މަސައްކަތް ކުރަނީ އެމްޑީޕީގެ އެތެރޭގައި އުފެދިފައިވާ ދެބަސްވުމުގައި، ޕާޓީގެ ރައީސް މުހައްމަދު ނަޝީދަށް ތާއީދުކުރާ "ފިކުރެއްގެ ދިރުން" ފެކްޝަންގައެވެ.
