ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަދި އެމްޑީޕީގެ ޕާލަމަންޓްރީ ގްރޫޕުގެ ކުރީގެ ލީޑަރު އަލީ އާޒިމް އެ ޕާޓިން ވަކިކޮށްފިއެވެ.

އެމްޑީޕީގެ ޕާލަމަންޓްރީ ގްރޫޕް (ޕީޖީ) އިން ފިޔަވަޅު އަޅާ ކޮމިޓީގައި، އެމްޑީޕީގެ ރައީސް މުހައްމަދު ނަޝީދުގެ "ފިކުރެއްގެ ދިރުން" ފެކްޝަންގައި ހަރަކާތްތެރިވާ މަޖިލީހުގެ ފަސް މެމްބަރަކަށް ފިޔަވަޅު އަޅައިދޭން މިއަދު ވަނީ އެދިފައެވެ. އަދި މިރޭ ބޭއްވި ކޮމިޓީ ބައްދަލުވުމުގައި ނިންމާފައިވަނީ އާޒިމް އެމްޑީޕީން ވަކިކުރުމަށެވެ. ކޮމިޓީގެ އެ ނިންމުން ރަސްމީކޮށް އާޒިމަށް އަންގާނީ މާދަމާގެ ވަގުތެއްގައެވެ.

އާޒިމް އެމްޑީޕީން ވަކިކޮށްފައިވަނީ ސަރުކާރުގެ ބަންޑާރަ ނައިބު ވަކިކުރަން, މަޖިލީހަށް ހުށަހެޅި މައްސަލައިގައި ސޮއިކޮށްފައިވާތީއެވެ. އެމްޑީޕީގެ އެތެރޭގައި އުފެދުނު ހިޔާލު ތަފާތުވުންތަކުގައި މީގެ ކުރިން ޕާލަމަންޓްރީ ގްރޫޕްގެ ގަވާއިދާ ޚިލާފުވެގެން ފިޔަވަޅު ނޭޅިޔަސް އިތުބާރު ނެތް ކަމުގެ މައްސަލަތަކުގައި ސޮއިކުރާ މެމްބަރުންގެ މައްސަލާގައި ހަރުކަށި ފިޔަވަޅު އަޅާނެ ކަން ޕީޖީ ގްރޫޕުން އޮތީ ބުނެފައެވެ.

އާޒިމްގެ އިތުރުން އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފް، ހުޅުދޫ ދާއިރާގެ މެމްބަރު އިލްޔާސް ލަބީބް، ކުޅުދުއްފުށި އުތުރު ދާއިރާގެ މެމްބަރު ޔާސިރު އަބްދުއްލަތީފް އަދި މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) އަށް ފިޔަވަޅު އެޅުމަށް ހުށަހަޅާފައިވަނީ އެ މެމްބަރުން މަޖިލީހުގައި ސަރުކާރާ ދެކޮޅަށް މަސައްކަތް ކުރެއްވުމާއި ވިޕްލައިނާ ހިލާފުވެ، ޕާޓީގެ ގަވާއިދުތަކާ ހިލާފަށް މަސައްކަތް ކުރައްވަމުން ގެންދަވާތީ ކަމަށްވެއެވެ.

އިތުރު ލިޔުންތައް އެމްޑީޕީ