އެމްޑީޕީގެ ރައީސް އަދި މަޖިލީހުގެ ރައީސް ނަޝީދު "ފިކުރެއްގެ ދިރުން" މިނަމުގައި ހަރަކާތް ސިޔާސީ ޕާޓީއަކަށް ބަދަލުކުރުމުގެ މަސައްކަތް ރަސްމީކޮށް ގެންދިއުމަށް އެކަމުގެ ހުއްދައަށް އެދި އިލެކްޝަން ކޮމިޝަނަށް މިއަދު ހުށަހަޅާނެކަމަށް އެ ހަރަކާތުން ބުނެފިއެވެ.
މިދިޔަ ބުދަ ދުވަހު ބޭއްވި ނޫސްވެރިންގެ ބައްދަލުވުމުގައިވަނީ ފިކުރެއްގެ ދިރުން މިއަހރުގެ ރިޔާސީ އިންތިހާބުގައި ވާދަކުރަން ނިންމައިފިކަމަށް އިއުލާންކޮށްފައެވެ. މިކަން އިއުލާން ކުރީ ނަޝީދަށް ތާއިދުކުރާ ރައްޔިތުންގެ މަޖިލީހުގެ 12 މެންބަރަކު އެމްޑީޕީން ވަކިވެގެން ބޭއްވި ނިއުސް ކޮންފަރެންސްއެއްގައެވެ. އެ މެންބަރުން އެމްޑީޕީން ވަކިވުމުގެ ސިޓީގައި ސޮއިކުރެއްވީ ނަޝީދުގެ ހާޒިރުގައި ރައްޔިތުންގެ މަޖިލޫހުގައެވެ.
އެންމެ ގިނަ ދުވަސްވީ އަދި އެންމެ ބޮޑު ސިޔާސީ ޕާޓީ، އެމްޑީޕީގެ ރިޔާސީ ޕްރައިމަރީގައި، ކުރީގެ ރައީސް އަދި ރައްޔިތުންގެ މަޖިލީހުގެ ރައީސް ނަޝީދަށް ލިބިވަޑައިގެންނެވި ބޮޑު ނާކާމިޔާބީ އަށް ފަހު ފުރަތަމަ ވެސް ނިންމެވީ ފިކުރެއްގެ ދިރުން ހަރަކާތުން ރިޔާސީ އިންތިހާބުގައި، ރައީސް އިބްރާހިމް މުހައްމަދު ސޯލިހު ނޫން ކެންޑިޑޭޓަކަށް ތާއިދު ކުރުމަށެވެ
ނަޝީދުގެ އާ ޕާޓީއަށް ކިޔާނެ ނަމަކާއި ކުލަ ކަނޑައެޅުމަށް ސަޕޯޓަރުންގެ ހިޔާލު ވަނީ ހޯދައިފަ އެވެ. ސޯޝަލް މީޑިއާގައި ދައުރުވާ ފިކުރެއްގެ ދިރުން ހަރަކާތުގެ ބްރޭންޑިން މިހާރު ވަނީ އެމްޑީޕީގެ ވަރުގަދަ ރީނދޫ ކުލަ ދޫކޮށް، މަޑު ނޫކުލައަކަށް ބަދަލުކޮށްފަ އެވެ.
އާ ޕާޓީ އުފެއްދުމެ މަސައްކަތް ކުރިއަށް ގެންދިޔަ ނަމަވެސް އެކަމާ ގުޅޭ ގޮތުން މިހާތަނަށް ނަޝީދު ބަހެއް ވިދާޅެއް ނުވެ އެވެ.
