އިންޑިއާގައި މި މަހުގެ 21 ވަނަ ދުވަހު ފަށާ ސާފް ޗެމްޕިއަން ޝިޕްއަށް ތައްޔާރުވުމުގެ ގޮތުން ގައުމީ ޓީމުގެ 23 ކުޅުންތެރިންގެ ފައިނަލް ސްކޮޑް މިއަދު ޖަޕާނަށް ފުރައިފިއެވެ. ޓީމު ޖާޕަނަށް ފުރާފައި ވަނީ 10 ދުވަހުގެ ތަމްރީނު ކޭމްޕަކަމަށެވެ.
ކޭމްޕު ނިންމާލުމަށްފަހު ޓީމު އިންޑިއާގެ ބެންގަލޫރަށް ފުރަން ހަމަޖެހިފައިވަނީ 15 ވަނަ ދުވަހުއެވެ. ސާފް ޗެމްޕިއަންޝިޕަށް ތައްޔާރުވަމުން އަންނަ ގައުމީ ފުޓުބޯޅަ ޓީމުން ޖަޕާނަށް ގޮސް ތަމްރީނުތައް ފުރިހަމަ ކުރާނީ އެގައުމުގެ ގައުމީ ޓީމުންވެސް ކޭމްޕް ކުރުމަށް ބޭނުން ކުރާ ފެސިލިޓީއެއްގައެވެ.
ޓީމު މިއަދު ފުރުމުގެ ކުރިން ޓީމުގެ މެނޭޖަރު އަބްދުﷲ ޝިބާއު (ޝިބާ) ނޫސްވެރިންނަށް ވިދާޅުވީ ޓީމުން ކުރަމުންދާ މަސައްކަތަކީ ދިވެހި ސަޕޯޓަރުން ހެއްވާލުމުގެ މަސައްކަތް ކަމަށާއި ޓީމު މިއޮތީ ސަޕޯޓަރުންގެ ފަހަތުގައި ކަމަށެވެ. މީގެއިތުރުން ވިދާޅުވީ ޒުވާން ސްކޮޓަކާއެކު ޓީމު އެކުލަވާލި މައިގަނޑު ސަބަބަކީ ކުރިއަށް ވޯލްޑް ކަޕް ކޮލިފިކޭޝަނާއި އޭޝިއަން ކަޕަށްވެސް ތައްޔާރުވާން ކޯޗު ފްރެންޗެސްކޯ މޮރިއޭރޯގެ ވިސްނުން ހުރުމުންނެވެ.
ޓީމުގެ ނަތީޖާ ނެރެން ވިސްނާފައިވަނީ މެޗަކަށް ފަހު މެޗަކުންނެވެ.
މިއަހަރުގެ ސާފް ޗެމްޕިއަންޝިޕް މިމަހުގެ 21 އިން އަންނަ މަހުގެ ހަތަރަކަށް އިންޑިއާގެ ބެންގަލޫރުގައި ބާއްވަން ތާވަލުކޮށްފައިވާ އިރު، ދިވެހި ޓީމުން އަންނަނީ މުބާރާތަށް ފަރިތަކުރަމުންނެވެ. މިއަހަރުގެ ސާފް ޗެމްޕިއަންޝިޕްގައި ޖުމުލަ އަށް ޓީމަކުން ވާދަކުރާ އިރު، އެއީ ސާފްގެ ހަ ގައުމަކާއި ސަރަހައްދުން ބޭރުގެ ދެ ގައުމެކެވެ. ސަރަހައްދުގެ ގައުމުތަކުގެ ގޮތުގައި މުބާރާތުން ފެންނާނީ ރާއްޖެ އާއި އިންޑިއާގެ އިތުރުން ބަންގްލަދޭޝް އާއި ބޫޓާންގެ އިތުރުން ޕާކިސްތާނާއި ނޭޕާލެވެ. އަދި ސަރަހައްދުން ބޭރުން ވާދަކުރާނީ މެދުއިރުމަތީގެ ދެ ގައުމު ކަމަށްވާ ލުބުނާނާއި ކުވައިތެވެ.
ރާއްޖެއިން ސާފަށް ތައްޔާރުވަމުން އަންނަ އިރު، މި މުބާރާތަށް ކޯޗަށް ދީފައިވާ ޓާގެޓަކީ މުބާރާތުގެ ތަށްޓެވެ. އަދި މިފަހަރުގެ ސީޒަން ފެށިގެން މާ ގިނަ ދުވަހެއް ނުވަނީސް، ތަމްރީނުތަކަށް ތަންދިނުމަށް މިވަނީ ސީޒަން މެދު ކަނޑާލަން ޖެހިފައެވެ.
އެފްއޭއެމްގެ ރައީސް ބައްސާމް އަދީލް ޖަލީލުގެ ނަޒަރުގައި ރާއްޖެއަށް އޮތް ޗެލެންޖަކީ ފިޓްނަސްގެ މައްސަލައެވެ. ބައްސާމް ވަނީ އެކަން ހައްލުކުރުމަށް ކޯޗު ފްރެންޗެސްކޯ މޮރިއޭރޯ ރަނގަޅު ތަމްރީނުތަކެއް ކުރަމުން އަންނަ ކަމަށް ފާހަގަކޮށްފައެވެ. އޭނާ ވިދާޅުވީ ޓީމު ސާފަށް ފުރިހަމައަށް ތައްޔާރުވެއްޖެ ނަމަ، ރަނގަޅު ނަތީޖާއެއް ނެރެވޭނެ ކަމަށެވެ.
ގައުމީ ޓީމުގެ 23 ކުޅުންތެރިންނާއެކު ފައިނަލް ސްކޮޑް ނަގާފައިވާއިރު، އެ ޓީމުގައި 14 މާޒިޔާ ކުޅުންތެރިންނާއި، ކްލަބް އީގަލްސްގެ ހަތަރު ކުޅުންތެރިންނާއި، ސުޕަ ޔުނައިޓެޑް ސްޕޯޓްސްގެ ތިން ކުޅުންތެރިންނާއި، ބުރު ސްޕޯޓްސްގެ ކުޅުންތެރިޔަކާ ވެލެންސިއާގެ ކުޅުންތެރިއެއް ހިމެނެއެވެ.
