ވެރިކަން ކުރާ މައިޕާޓީއާ ރާއްޖޭގެ އެކި ރަށްރަށުން 2،500 އެއްހާ މީހުން ގުޅިއްޖެއެވެ.
ޕާޓީގެ ޗެއާޕާސަން ފައްޔާޒު އިސްމާއީލް، އެ ފޯމުތަކާ ހަވާލުވެލެއްވުމަށްފަހު ވިދާޅުވީ، އެމްޑީޕީއަކީ އަބަދުވެސް ކުރިއަރަން މަސައްކަތް ކުރާ ޕާޓީއެއް ކަމަށެވެ. އެގޮތުން މެންބަރުން އިތުރުކުރުމުގެ މަސައްކަތް ކުރިއަށްގެންދާނެ ކަމަށެވެ.
"އައްޑު އަތޮޅުން މިދިޔަ ދެތިން ދުވަހު އަޅުގަނޑުމެންނާ ގުޅުނު މެންބަރުންގެ ފޯމުތައް އައްޑޫން އަޅުގަނޑުމެންނާ ހަވާލުވެފައިވޭ. ދެން ޖުމުލަ މި ކުރެވުނު ކުޑަ މަސައްކަތުގެ ތެރެއިން 2،500 އެއްހާ ފޯމު އަޅުގަނޑުމެންނަށް އެބަ ލިބޭ،" ފައްޔާޒް ވިދާޅުވިއެވެ.
އެމްޑީޕީގެ އަމާޒަކީ ކުރިން، ގާނޫނީ ގޮތުން ރަޖިސްޓްރީ ވެގެން، ގާނޫނާ އެއްގޮތް ނޫން ގޮތަށް އޮތް އަދަދާ ހަމައަށްމެންބަރުން ހަމަކުރުން ކަމަށް ފައްޔާޒު ވިދާޅުވިއެވެ.
މި ވަގުތު ރާއްޖޭގައި އޮތް އެންމެ ބޮޑު ސިޔާސީ ޕާޓީއަކީ އެމްޑީޕީ އެވެ. އިލެކްޝަންސް ކޮމިޝަންގެ އެންމެ ފަހުގެ ދަފުތަރުން ދައްކާ ގޮތުގައި އެ ޕާޓީގައި 57،660 މެންބަރުން އެބަ ތިއްބެވެ.
މީގެ ކުރިން އެމްޑީޕީގައި 96،000 މެންބަރުން ތިއްބެވެ. އިލެކްޝަންސް ކޮމިޝަނުން އެކުލަވާލި ދަފުތަރުގައި އެ މެންބަރުންގެ ތެރެއިން 49،000 މެންބަރުން ވަނީ އުނިކޮށްފައެވެ.
ހުސްދޮގު، ދެހާސް ފަސްސަތޭކަ މީހުން ގުޅުނީއެއް ނޫން، އިންޑިއާއިން ފައިސާ ދީގެން ގަތީ.