މި ރިޔާސީ އިންތިހާބުގައި ޕްރޮގްރެސިވް ކޮންގްރެސް ކޯލިޝަން ތަމްސީލުކުރައްވާ ރިޔާސީ ކެންޑިޑޭޓު ޑރ މުހައްމަދު މުއިއްޒުގެ ރަނިންމޭޓު ހުސެއިން މުޙައްމަދު ލަތީފަށް ފަރެސްމާތޮޑާއިން ހޫނު މަރުހަބާއެއް ކިޔައިފިއެވެ.
ރިޔާސީ އިންތިހާބުގެ ކެމްޕޭނަށް މެމްބަރު ހުސެއިން ފަރެސްމާތޮޑާއަށް މިއަދު ހަވީރު ވަޑައިގަތުމުން އެ ރަށުން ވަނީ ވަރަށް ހޫނު މަރުހަބާއެއް ކިޔާފަ އެވެ.
ފަރެސްމާތޮޑާގެ ކުދިބޮޑު، ޒުވާނުންނާއި ހަރުފުރައިގެ މީހުން އަދިވެސް އެތައް ގިނަ އަދަދެއްގެ ބަޔަކު ނިކުމެ އެމަނިކުފާނަށް މަރުހަބާއެއް ވަނީ ދަންނަވާފައެވެ.ި، އެރަށް ވަރަށް ބޮޑަށް ޒީނަތްތެރިކޮށްފައިވާތަން ފެނިގެން ދިޔައެވެ. މެމްބަރު ހުސެއިން ވަނީ އޭނާގެ އިސްތިގުބާލުގައި ތިއްބެވި ހުރިހާ ފަރާތްތަކަާއި ސަލާން ކުރައްވާފަ އެވެ.
ފަރެސްމާތޮޑާގައި ކެމްޕޭނު ޖަލްސާއެއް ބޭއްވުމަށް ވަނީ ހަމަޖެހިފައެވެ.
ޑރ މުއިއްޒުގެ ރިޔާސީ ކެމްޕޭނަށް ރަނިންމޭޓު ފަރެސްމާތޮޑާއަށް ވަޑައިގެންފައިވާއިރު، މިއަދު ޑރ މުހައްމަދު މުއިއްޒު ވަނީ ތިލަދުންމައްޗަށް ކުރެއްވި އެމަނިކުފާނުގެ ކެމްޕޭނު ދަތުރުފުޅު ނިންމަވާލައްވާ އަނބުރާ މާލެ ވަޑައިގެންފަ އެވެ.
ދެން ޑރ މުހައްމަދު މުއިއްޒު ވަޑައިގަންނަވާނީ ދ އަތޮޅަށެވެ. އެ ދަތުރުފުޅުގައި ދ އަތޮޅުގެ އިތުރުން ފ، އަތޮޅާއި މ އަތޮޅު އަދި ވ އަތޮޅުގެ ރަށްތަކަށް ވެސް ވަޑައިގަތުމަށް ވަނީ ހަމަޖެހިފަ އެވެ.
ހުސެއިން މުހައްމަދު ލަތީފަކީ ފަރެސްމާތޮޑާ ދާއިރާ ތަމްސީލުކުރައްވާ މަޖިލީސް މެމްބަރެވެ. ޑރ މުއިއްޒުގެ ރަނިންމޭޓުތަކަށް މެމްބަރު ހުސެއިން ހަމަޖެއްސެވީ އެ މަގާމުގައި ހުންނަވަނިކޮށެވެ.
