ރާއްޖޭގައި ފުޅާ ދާއިރާއެއްގައި ހަށިވިއްކަމުންދިޔަ ބިދޭސީންތަކެއް އިމިގްރޭޝަނުން އަތުލައިގެންފިއެވެ.
އިމިގްރޭޝަނުން ވަނީ މިކަން ހާމަކުރައްވާ އެކްސްގައި ޕޯސްޓެއް ކުރައްވާފައެވެ.
އެ ޕޯސްޓްގައި އިމިގްރޭޝަނުން ބުނީ ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރިކުރަމުންދާ ބިދޭސީން ހޯދުމަށް އިމިގްރޭޝަނާއި ދިވެހި ފުލުހުންގެ ހިދުމަތުން ގުޅިގެން ހިންގި ހާއްސަ އިންސްޕެކްޝަން ތަކެއްގައި ހަށިވިއްކަމުން ދިޔަ ބިދޭސީންތަކެއް އަތުލައިގަނެފައިވާ ކަމަށެވެ.
އެގޮތުން ފަސް މައްސަލައަކާ ގުޅިގެން ބިދޭސީ 5 އަންހެނަކު އަދި އެޖެންޓުންގެ ގޮތުގައި މަސައްކަތް ކުރި ބިދޭސީ 2 ފިރިހެނަކު އިމިގްރޭޝަންގެ ބެލުމުގެ ދަށަށް ގެނައި ކަމަށް އިމިގްރޭޝަނުން ބުނެފައިވާއިރު އެ މީހުންގެ ވަނަވަރުވެސް ވަނީ ހާމަކޮށްފައެވެ. އެއީ ތައިލެންޑު އަންހެނަކާއި ދެކުނު އެފްރިކާ އަންހެނަކާއި ޔުގަންޑާ އަންހެނަކާއި ބަންގްލަދޭޝްގެ އަންހެނަކާއި ރަޝިޔާ އަންހެނެކެވެ. އަދި އެޖެންޓުންގެ ގޮތުގައި އުޅުނީ ބަންގްލަދޭޝްގެ ދެ ފިރިހެނުންނެވެ.
މި މައްސަލަތައް ތަހުގީގު ކުރުމަށްފަހު ރާއްޖެ އަނބުރާ ނާދެވޭ ގޮތަށް މީގެތެރެއިން ތިން އަންހެނަކު، ޑީޕޯޓުކޮށްފައިވާއިރު، ބާކީ ހަތަރު ބިދޭސީން ޑީޕޯޓުކުރުމުގެ މަސައްކަތް ކުރަމުންދާ ކަމަށްވެސް އެ އިދާރާއިން ބުނެފައިވެއެވެ.
މި ސަރުކާރުގެ އަމާޒަކީ ގަވާއިދާ ހިލާފަށް އުޅޭ ބިދޭސީންގެ މައްސަލަ ތިން އަހަރު ތެރޭގައި ހައްލު ކުރުމެވެ.
