އެންމެ ރީއްޗަށް ކީރިތި ޤުރުއާން ކިޔަވާ ވިދާޅުވާ ޙުޞަރީ އަވަހާރަވިތާ މިއަދަށް 44 އަހަރު ވެއްޖެއެވެ. އޭނާ އަވަހާރަވި މުނާސަބާގައި އޭނާގެ ދަރިފުޅު ޔާސްމީން އަލްޚައްޔާމް ވިދާޅުވަނީ، ލަވަ ލިޔުމުގެ ރޮނގުން ކުރިއަށް ދާން އޭނާ އިޚުތިޔާރު ކުރުމުން އޭނާގެ ބައްޕަ، ޤާރީ މަޙުމޫދު ޚަލީލް އަލްޙުޞަރީއަށް އެކަން ރަނގަޅު ކަމަކަށް ނުވިއެވެ. އަދި ޒަމާނުގެ ހާލަތުން ގިނަ ބަޔަކު ޔާސްމީން ނުބައި މީސްކުރަން ފެށި ކަމަށެވެ. އެހެންވެ، އޭނާއަށް އަމިއްލަ ނަން ބަދަލު ކުރައްވަން މަޖުބޫރުވެ ވަޑައިގަތީ ކަމަށެވެ.
ޔާސްމީން އަލްޚައްޔާމް ވިދާޅުވާ ގޮތުގައި އޭނާގެ އަސްލު ނަމަކީ، "އިޖުލާލް އަލްޙުޞަރީ" އެވެ. އޭނާގެ ބައްޕަގެ ރީތި ނަންފުޅަށް ހުތުރު އަރައިފާނެތީ އޭނާ ނަން ބަދަލު ކުރެއްވީ ކަމަށް ވެސް ވިދާޅުވިއެވެ.
މިހާރު ޔާސްމީން އަލްޚައްޔާމް ވަނީ ލަވަކިޔުން ދޫކޮށްލައްވާފައެވެ.
ޙުޞަރީގެ އާއިލާއަކީ ކުރީ ޒަމާނުގައި މިސްކިތުގައި އަޅަން ބޭނުން ކުރި ކުނާ ތައްޔާރުކުރުމަށް މަޝްހޫރު އާއިލާއެކެވެ. އަދި އާއިލީ ނަން އައިސްފައިވަނީ ކުނާ ތައްޔާރުކުރުމުގެ ތެރޭން ނެވެ.
ޔާސްމީން ވިދާޅުވީ އޭނާގެ ބައްޕަ ތުއްޕުޅު އިރު، ކޮންމެ ދުވަހަކު ކިޔަވައި ވިދާޅުވުމަށް 7 ކިލޯމީޓަރަށް ހިންގަވާފައި ވަޑައިގަންނަވާ ކަމަށެވެ. އަދި ސްކޫލަށް ވަޑައިގަންނަވާ މަގުމަތީގައި ކީރިތި ޤުރުއާން ފަރިތަކުރައްވަމުން ގެންދެވީ ކަމަށެވެ.
