ޚައިބަރު ޕަޚްތުންޚްވާއާއި ޕަންޖާބާއި ޕާކިސްތާނުގެ އެހެން ހިސާބުތަކުން ތަހުރީކޭ އިންސާފް ޕާޓީގެ ސަޕޯޓަރުން ވެރިރަށް އިސްލާމްއާބާދާ ދިމާއަށް ދަނީ މާޗު ކުރަމުންނެވެ.
ޕާކިސްތާން ސަރުކާރުން ވަނީ މީގެ ކުރިން ނުފެންނަ ފަދަ ސަލާމަތީ އިންތިޒާމުތަކަކާއި މަގު ބަންދުތަކެއް ބަހައްޓައިގެން އިސްލާމްއާބާދުގެ މުހިންމު ހިސާބުތައް ބަންދުކޮށްފައެވެ. ހޯމް މިނިސްޓްރީން ބުނެފައި ވަނީ އިސްލާމްއާބާދަށް ވަންނަން ދިމާކުރާ ކޮންމެ ބަޔަކާ ކުރިމަތިލާން ފުލުހުންނާއި ރޭންޖަރުން ތައްޔާރަށް ތިބޭނެ ކަމަށެވެ.
ޖަލު ބަންދުގައި ހުންނެވި އިމްރާން ޚާންގެ ޕާޓީން އިސްލާމްއާބާދަށް ހަވަރު އެއްކޮށްލުމަށް ރާވާފައި ވަނީ، ބެލަރޫސްގެ ރައީސް އެލެގްޒެންޑަރ ލުކަޝެންކޯ އިސްލާމްއާބާދަށް ޒިޔާރަތް ކުރެއްވުމާ ދިމާކޮށެވެ.
އާދީއްތަ ދުވަހު ބެލަރޫސްގެ އެޑްވާންސް ވަފްދަކާ ބައްދަލު ކުރައްވައި ދާޚިލީ ވަޒީރު މުހައްމަދު ނަގްވީ ވަނީ އިސްލާމްއާބާދަށް ވަންނަން މަސައްކަތް ކުރާ ކޮންމެ މީހަކުވެސް ބަންދަށް ގެންދާނެ ކަމަށް އިންޒާރު ކުރައްވާފައެވެ.
ތަހުރީކޭ އިންސާފުގެ މުޒާހަރާގެ ބައިވެރިންގެ އަދަދުތައް ލަފާ ކުރިވަރަށް ވުރެން ބޮޑު ކަމަށް ދައްކައެވެ. ނަމަވެސް ހުރިހައި މަގެއް ބަންދުކޮށްފައި އތުމުން އިސްލާމްއާބާދުގައި ކާފިއު ހިންގާފައިވާ އޮތް ހެން ހީވެއެވެ.
އިސްލާމްއާބާދަށް ވަންނަ މަގުތަކާއި މައި ހައިވޭތަކުގެ އެކި އެކި ހިސާބުތަކާއި ރެސިޑެންޝަލް އޭރިއާތައް ގުޅުވައިދޭ މަގުތައް ވަނީ ކޮންޓެއިނަރުތައް ބޭނުންކޮށްގެން މަގު ބަންދުކޮށްފައެވެ.
އިސްލާމްއާބާދުގެ މަގުތައް ބަންދުކުރުމާއި އަމަންއާންމުގެ ހާލަތު ޔަގީން ނުވާތީ، ރައްޔިތުންގެ ގިނަ ބަޔަކު މިއަދު ވަނީ މަސައްކަތު ނުގޮސް ގޭގައި މަޑުކޮށްފައެވެ.
ޒަރޫރީ ބޭނުންތަކުގެ ސާމާނާއި ކާބޯތަކެތި ވެރިރަށް ވެދުންވެސް ހުއްޓާލާފައި ވެއެވެ. އިސްލާމްއާބާދުގެ ފިހާރަތަކުން ކިރާއި އެއްގަމު މަހާއި ތަރުކާރީ ވަނީ ހުސްވެފައެވެ. އެހެން ދިމާވެފައި ވަނީ ހޮނިހިރު ދުވަހުން ފެށިގެން ދަތުރުފަތުރަށް ހުރަސް އަޅާފައި އޮތުމުންނެވެ.
އިސްލާމްއާބާދުގައި މޯބައިލް ފޯނުގެ ހިދުމަތް މެދުކަނޑާފައެއް ނުވެއެވެ. ނަމަވެސް އިންޓަނެޓާއި ސޯޝަލް މީޑިއާ ޕްލެޓްފޯމްތަކަށް ވަނުމަށް ދަތިކޮށް ބޭންޑްވިތު ހަނިކޮށްފައި ވެއެވެ. މޯބައިލް ޑޭޓާ މެދުވެރިކޮށް ކޯލްކުރުމާއި، އަޕްލޯޑްކުރުމާއި، ލިޔެކިޔުންތަކާއި ވީޑިއޯ އަދި ފޮޓޯތައް ޑައުންލޯޑް ކުރުމަށް ބުރޫ އަރާފައި ވެއެވެ.
