އެމްޑީޕީގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު އއ. އަތޮޅަށް ކުރައްވާ ކެމްޕޭން ދަތުރުފުޅު ފައްޓަވައިފިއެވެ.
މިއަދު ފެށި ދަތުރުގައި އެންމެ ފުރަތަމަ ޒިޔާރަތްކޮށްފައިވަނީ ތޮއްޑޫއަށެވެ.
ރިޔާސީ އިންތިހާބަށް ކެމްޕެއިން ފަށާފައިވަނިކޮށް މިއަދު ތޮއްޑޫއަށް ރައީސް ޒިޔާރަތްކުރެއްވި އިރު އެރަށުން ވަނީ ހޫނު މަރުހަބާއެއް ދަންނަވާފައެވެ.
ރައީސް ތޮއްޑޫއަށް ކުރެއްވި ޒިޔާރާތުގައި ބަނދަރު ބައްދަލުވުން ބޭއްވުމާއި އެރަށު ސިއްހީ މަރުކަޒު އިމާރާތުގެ މަސައްކަތް ބެއްލެވުމާއި، ޕޮލިސްޓޭޝަން ހުޅުއްވުމާއި، ޒޯން ތިނެއް އަދި ވޮލީ ކޯޓު ގެ މަސައްކަތް ފެއްޓެވުމަށް ހަމަޖެހިފައެވެ.މިކަމުގެ އިތުރުން ވެސް އެތަކެއް މަޝްރޫއުއެއް އެރަށުގައި ނިންމައި އަދި ކުރިއަށް ދެއެވެ.
އއ. އަތޮޅަށް ރައީސް ކުރައްވާ މި ދަތުރުފުޅުގެ ތެރެއިން މި ރަށުގައި ރައްޔިތުންނާ ބައްދަލުކުރެއްވުމަށްފަހު ދެން ވަޑައިގަންނަވަން ހަމަޖެހިފައިވަނީ މި އަތޮޅުގެ ރަސްދޫއަށެވެ.
އއ. އަތޮޅުގެ ރަށްތަކަށް ޒިޔާރަތްކުރެއްވުމަށްފަހު، ރައީސް ވަޑައިގަންނަވާނީ އދ. އަތޮޅުގެ ރަށްތަކަށެވެ.
ރައީސް ވަނީ ކެމްޕެއިން ދަތުރުފުޅުގައި ށ. އަތޮޅު، ހއ. އަތޮޅު، މ. އަތޮޅު، ވ. އަތޮޅު، ފުވައްމުލަކު ސިޓީ އާއި ނ. އަތޮޅު، ދ. އަތޮޅު، ދ. އަތޮޅު، ގދ. އަތޮޅު އަދި ގއ. އަތޮޅުގެ ރަށްތަކުގެ އިތުރުން ކ. އަތޮޅުގެ ބައެއް ރަށްރަށަށް ވެސް ވަނީ ޒިޔާރަތްކުރައްވައިފައިއެވެ.
