ރާއްޖެެއިން ބޭރުގެ ގައުމެއްގެ ނުފޫޒުުގައި ވެރިކަން ކުރައްވާ ވެރިޔަކު މިގައުމުގެ ޒައާމަތާއި ހަވާލުވާން ދިވެހި ރައްޔިތުން ނޭދޭ ކަމުގައި ރައްޔިތުންގެ މަޖިލީހުގެ ނިލަންދޫ ދާއިރާގެ ކުރީގެ މެމްބަރު ޑރ. ހަލީލް ވިދާޅުވެއްޖެއެވެ.
ޑރ. ހަލީލް މިހެން ވިދާޅުވީ އިދިކޮޅުކޯލިޝަން ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒާއެެކު ރިޔާސީ ކެމްޕޭންގައި ފ. ނިލަންދޫއަށް ވަޑައިގެން އެރަށު ގައި ބޭއްވި ޖަލްސާގައި ވާހަކަ ދައްކަވަމުންނވެ.
މިޖަލްސާގައި ހަލީލް ވިދާޅުވީ ރިޔާސީ އިންތިހާބާ ދިވެހި ރައްޔިތުން ކުރިމަތިލާއިރު، އޮތް އެންމެ ބޮޑު ސުވާލަކީ މިނިވަންކަމުގެ ސުވާލުކަމަށެވެ. ދިވެހި ރާއްޖޭގެ ވެރިކަން ކުރައްވާ ވެރިއަކު ވާންޖެހޭނީ ދިވެހި ރައްޔިތުންނަށް ހިދުމަތް ދެވޭނެ ވެރިއަކަށްކަން ފާހަގަކުރައްވައި ޑރ ހަލީލު ވިދާޅުވީ، ބޭރުގެ ނުފޫޒުތަކަށް ބޯނުލަބާ، ބޭރުގެ ނުފޫޒާއިއެކު ވެރިކަން ނުކުރާ ވެރިއަކަށް ރާއްޖޭގެ ވެރިއަކަށް ވާބޭފުޅަކު ވާންޖެހޭކަމަށެވެ.
ހަލީލު ވިދާޅުވީ އެފަދަ ވެރިއަކަށް ވެވޭނެ ހަމައެކަނި ކެންޑިޑޭޓަކީ ޑރ.މުއިއްޒުކަމަށެވެ. މިވެރިކަން ފެށުނު ދުވަހުން ފެށިގެން ނިމުމަކާ ހަމައަށް ދާއިރުވެސް ފެންނަނީ އެހެން ގައުމެއްގެ އަޅުވެތި ކަމެއްގައި އޮތްތަން ކަމަށެވެ. ގައުމުގެ ދަރަނި އިންތިހާއަށް ގޮސް ބޮލަކަށް ޖެހޭ ދަރަނި ދެލައްކަ ތިރީސް ހާހަށްވުރެ މައްޗަށް އަރާފައިވާކަން ހާމަކުރައްވައި ހަލީލް ވިދާޅުވީ ދަރަންޏާއި، އިގުތިސަދާއި، ކުރިއެރުން ގެނެވޭނީ އެކަމުގެ ގާބިލުކަން ހުންނަ މީހަކަށް ކަމަށެވެ.
މިވީ ފަސް އަހަރުގެ ތެރޭގައި ގައުމަށް ގެންނަން ޖެހޭ ތަރައްގީ ނުގެވި، އަނެއްކާވެސް އިތުރު ވައުދުތައް ވުމަށް ރަށްރަށަށް ވަޑައިގަންނަވާއިރު ސަރުކާރުގައި ތިއްބެވި ބޭފުޅުން ލަދު ގަންނަންޖެހޭކަމަށްވެސް ހަލީލު ވަނީ ވިދާޅުވެފައެވެ. ތަރައްގީ ދަންނަ ބޭފުޅުން ތަރައްގީ ގެންނަ ގޮތް އަދިވެސް މިސަރުކާރުން ދަސް ކުރަންޖެހޭކަމަށް ހަލީލް ވިދާޅުވިއެވެ.
ހަލީލް ވިދާޅުވީ ރާއްޖެ މިއަދު އޮތް ނާމާން ކަމާއި، ބިރުވެރި ހާލަތުން ބަދަލު ކުރެވޭނީ ޑރ.މުއިއްޒުގެ ޒައާމަތުގައި ކަމަށާއި އެކަން ކުރެވޭނެ ގާބިލް ކުޅަދާނަކަން ޑރ.މުއިއްޒާއި ޓީމުގައި ހުންނާނެ ކަމީ ދިވެހިން ގަބޫލު ކުރާ ހަގީގަތެއް ކަމަށެވެ.
