ރިޔާސީ އިންތިހާބާ ދިމާކޮށް ސަރުކާރުގެ ކުންފުނިތަކުގައި މަސައްކަތް ކުރާ މުވައްޒިފުންނަށް ވަޒީފާގެ ބިރު ދައްކައި ނުފޫޒު ފޯރުވުމަށް މަސައްކަތް ކުރި ނަމަވެސް ކުރިއަށް އޮތް ސޯޅަ ދުވަސް ތެރޭގައި އެބިރަށް ފަސް ނުޖެހި، ސާބިތު ކަމާއިއެކު ޕީއެންސީން ކުރާ މަސައްކަތުގައި ބައިވެރިވުމަށް ޑރ.މުހައްމަދު މުއިއްޒު ގޮވާލައިފިއެވެ.
ރިޔާސީ ކެމްޕޭމްގައި ށ. ފުނަދޫގައި ރޭ ބޭއްވި ބޮޑު ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ، ސަރުކާރު ހިއްސާވާ ކުންފުނިތަކުގައި ތިއްބެވި މުވައްޒިފުންނަށް އިންތިހާބުގެ ވޯޓުލުމާއި ގާތްވަމުންދާ ވަރަކަށް ސަރުކާރުގެ ނުފޫޒާއި ބާރުވެރިކަން ސަރުކާރު ދައްކާކަމަށެވެ. އެހެންނަމަވެސް މުއިއްޒު ގޮވާލެއްވީ ވަޒީފާގެ ބިރަށް އެއްވެސް ބޭފުޅަކު ފަސް ނުޖެހި ސާބިތު ކަމާއިއެކު ތިއްބެވުމަށެވެ.
މުއިއްޒު ވިދާޅުވީ މިއުފެދޭ ޕީޕީއެމް، ޕީއެންސީގެ ސަރުކާރަކީ ރައީސް ޔާމީންގެ ޒައާމަތުގައި ދިވެހި ޒުވާނުންނަށް ވަޒީފާގެ އެތައް ފުރުސަތެއް ތަނަވަސްކުރެއްވި ފަދައިން އެތަކެއް ވަޒީފާތަކެއް އުފައްދާނެ ސަރުކާރެއްކަމަށެވެ. ވަޒީފާ އަދާކުރަން ބޭނުންވާ އެއްވެސް ބޭފުޅަކަށް ވަޒީފާގެ ފުރުސަތު ނުލިބި ހުންނަވަން ޖެހިވަޑައި ނުގަންނަވާނެކަމަށް މުއިއްޒު ވިދާޅުވިއެވެ.
މުއިއްޒު ވަނީ މިޖަލްސާގައި ފުނަދޫ ރައްޔިތުންގެ އުންމީދުތައް ހާސިލް ކުރުމަށް ގިނަ ވައުދުތަކެއް ވެވަޑައިގެންފައެވެ. ވައުދުތައް ވެވަޑައިގެންނެވުމަށްފަހު، މުއިއްޒު ވަނީ އެވައުދުތައް ފުއްދަވާ ދެއްވާނެ ކަމުގެ ޔަގީންކަން ދެއްވާފައެވެ.
