ކޮވިޑުގެ ވަބާގައި މާލެ ސަރަހައްދު ލޮކްޑައުންކޮށް އެތައް ބަލިމީހުން ޓެކްސީތަކުގައި އުފުލި ޑްރައިވަރުންނަށް މިސަރުކާރުން ބަދަލުގައި ދިނީ ހިތްދަތިކަން ކަމަށް ޓެކްސީ ޑްރައިވަރުން ބުނެފިއެވެ.
ޓެކްސީ ޑްރައިވަރުން މިހެން ބުނެފައިވަނީ އެމީހުންގެ ހުރި ކަންބޮޑުވުންތައް ޕީއެންސީގެ ކެންޑިޑޭޓް ޑރ.މުހައްމަދު މުއިއްޒުއަށް ހިއްސާ ކުރުމަށް މިއަދު ބޭއްވި ބައްދަލުވުމުގައެވެ.
މި ބައްދަލުވުމުގައި ޓެކްސީ ޑްރައިވަރުން ފާހަގަކުރި ކަންތައްތަކުގެ ތެރޭގައި، މިސަރުކާރުން ވެރިކަމަށް ވަޑައިގެންނެވިއިރު ވައުދުވީ އެއްވެސް ކަމެއް ޑްރައިވަރުންނަށް ވެފައި ނުވާކަމާއި ހާއްސަކޮށް ޓްރާސްޕޯޓް މިނިސްޓްރީ ތެރެއިން ޑްރައިވަރުންނާމެދު ވަރަށް އިހާނެތިކޮށް ކަމަށް އަމަލުކޮށްފައިވާކަމާއި މާލޭގެ ޕާކިން މައްސަލަ ހައްލު ކުރުމަށް އެއްވެސް ކަމެއް ކޮށްދެވިފައިނުވާކަމާއި އަދިވެސް އެހެން އެތައް ކަމެއް ހިމެނެއެވެ.
ޓެކްސީ ޑްރައިވަރުންނަކީވެސް އެތައް އާއިލާއެއް ބަލަހައްޓަމުންދާ ޓެކްސީ ދުއްވައިގެން ލިބޭ އާމްދަނީން ދިރިއުޅޭ ބަޔަކަށްވާއިރު އެކަން މިނިސްޓްރީން ނުދެކުނު ކަމަށް ފާހަގަކުރަމުން ޑްރައިވަރުން ބުނީ ހާއްސަކޮށް ކޮވިޑްގެ ތަކުލީފުބޮޑު، ދަތި އުނދަގޫ ދަނޑިވަޅުގައި ބަލިމީހުން އުފުލުމަށް ޑްރައިވަރުން ކުރި މަސައްކަތާއި ވީ ގުރުބާނީގެ އެއްވެސް ވަރެއްގެ އަގުވަޒަން ކުރުމެއް ނެތްކަމަށެވެ. ޑްރައިވަރުން އެބައިމީހުންގެ އަނބިދަރީންގެ ރައްކަލަށް ގެއަށް ނުވަދެ، ޓެކްސީގައި ނިދައިގެން އުޅުނުއިރު، އެފަރާތްތަކަށް ސަރުކާރުން ކޮށްދިން ހަމަ އެއްކަމެއްވެސް ނެތްކަމަށް ޑްރައިވަރުން ވަނީ ބުނެފައެވެ.
މާލޭގެ ޕާކިން މައްސަލަ ހައްލު ކުރުމަށާއި، ހަމައެއް ލަމައެއްނެތި ސްޓިކާ ޖެހުން މިހާރު ހައްދުން ނެއްޓިފައިވާކަން ޑްރައިވަރުންވަނީ ހާމަކޮށްފައެވެ. މިކަންކަމަށްވެސް މިނިސްޓްރީއަށް ގެނެނުވުނު ހައްލެއް ނެތްއިރު، މިސްކިތައް ނަމާދުކޮށްލަން ޓެކްސީން ފައިބައިން ނަމާދުކޮށްލާފައި އަންނަ އިރު ސްޓިކާ ޖަހާފައިވާކަމަށް ބުނެ، ޑްރައިވަރުން ވަނީ ކަންބޮޑުވުން ހާމަކޮށްފައެވެ.
މި ބައްދަލުވުމުގައި ހުޅުވިފައިވާ ހިތަކުން ވާހަކަދައްކަން ލިބުނު ފުރުސަތުގައި، ޑްރައިވަރުން ވަނީ އެމީހުންގެ ހާލަތު ފޮރުވުމެއް ނެތި ހާމަކުރުމަށްފަހު އެމީހުންގެ ހުރި ކަންބޮޑުވުންތައް ހައްލު ކޮށްދެއްވުމަށް މުއިއްޒުގެ އެއްބާރުލުމަށް އެދިފައެވެ.
ޑރ.މުއިއްޒު ވަނީ މިމައްސަލަތަކަށް ހައްލު ގެންނާނެ ގޮތްތައް ހިއްސާ ކުރައްވާ، ޑްރައިވަރުން ކުރާ މަސައްކަތަކީ ވަޒީފާއެއްގެ ގޮތުގައި ބަލައިގަނެ، ގާނޫނުތަކާއި ގަވާއިދުގެ ތެރެއިން ހަމަޖެހެންޖެހޭ ކަންކަން ކޮށްދެއްވާނެ ކަމަށް ވައުދުވެ ވަޑައިގެންފައެވެ.
ހަމައެހެންމެ ވެރިކަން ލިބުނަސް ޓެކްސީ ޑްރައިވަރުންނާއި ބައްދަލުވެ ވާހަކަ ދައްކަވާނެ ކަމަށާއި، ވެރިކަން ލިބުމަކީ ރައްޔިތުންނަށް ފިލައި ބައްދަލުނުވާނެ ކަމެއް ނޫންކަމަށްވެސް ވިދާޅުވެފައެވެ.
