އުމުރުން 100 އަހަރު ވަންދެން ފުރިހަމަ ސިއްހަތެއްގައި ދިރިހުރެވޭނެ ކަމަށް އުއްމީދުކުރާ ކަމަށް މަޝްހޫރު ފުޓްބޯޅަ ތަރި ކްރިސްޓިއާނޯ ރޮނާލްޑޯ ބުނެފިއެވެ.
ރޮނާލްޑޯ މިމޭރުމުން ވާހަކަ ދެއްކީ ދާދިފަހުން "ނެޓްފްލިކްސް ޕޯޗުގަލް" އަށް ދިން ބަސްދީގަތުމެއްގައެވެ.
ރޮނާލްޑޯގެ ދުވަސް ހިނގައްޖެ ކަމަށް ބުނެ ވާހަކަ ދައްކާ މީހުންނަށް ރައްދު ދެމުން އޭނާ ބުނީ އޭނާ ސައުދީ ލީގުގައި ކުޅެނީ ކުޅޭ ހިތުން ކަމަށާއި އަދިވެސް އުއްމީދުތަކީ ގިނަ ތަށިތަކެއް ކާމިޔާބު ކުރުން ކަމަށެވެ.
"އަހަންނަށް އިހްސާސެއް ނުކުރެވޭ އަހަރެން ކުޅުން ހުއްޓާލަން ވެއްޖެ ކަމަކަށް. 39 އަހަރުފުރި، ސާޅިސް އަހަރު ފުރެން ދިޔަނަމަވެސް އަދިވެސް ދަނޑުމަތީގައި އަހަރެން މި ކުޅެނީ މޮޅުވުމުގެ ޖޯޝުގައި. ބައެއް މީހުން ބުނޭ އަހަރެން ސައުދީ ލީގަށް ބަދަލުވީ ފައިސާގެ ދަހިވެތި ކަމުގައޭ. އެކަމަކު ހަގީގަތަކީ އަހަރެން ބޭނުންވީ ސައުދީ ލީގް ވަރުގަދަ މަޝްހޫރު ލީގަކަށް ހަދަން. އަދި ސައުދީ ލީގުގެ ލެޖެންޑަކަށް ވާން. އަހަންނަށް އިހްސާސެއް ނުވޭ ކުޅުން ހުއްޓާލަން ޖެހޭވަރަށް މުސްކުޅިވެއްޖެކަމަކަށް. އުއްމީދަކީ ސަތޭކަ އަހަރު ވަންދެން ފުރިހަމަ ސިއްހަތެއްގައި ދިރިއުޅުން" ސަމާސާ ރާގެއްގައި ރޮނާލްޑޯ ބުންޏެވެ.
