ޕާކިސްތާންގެ ކުރީގެ ބޮޑު ވަޒީރު އިމްރާން ޚާން ޕާޓީން މިމަހުގެ 24 ވަނަ ދުވަހު ޕަންޖާބާއި އިސްލާމްއާބާދުގައި މުޒާހަރާތައް ބާއްވާނެ ކަން އިއުލާން ކުރުމުން އިސްލާމްއާބާދު ހައިކޯޓުން އެކަން ހުއްޓުވައިފިއެވެ. އެކަމަކުވެސް ޚާން ތަޙުރީކޭ އިންސާފް ޕާޓީން ބުނެފައި ވަނީ މުޒާހަރާތައް ކުރިއަށް ގެންދާނެ ކަމަށެވެ.
ޕާކިސްތާން ޓެލެކޮމް އޮތޯރިޓީން ވަނީ 24 ވަނަ ދުވަހައި 25 ވަނަ ދުވަހު އިސްލާމްއާބާދުން އިންޓަރނެޓް ކަނޑާލާނެ ކަމަށް އިއުލާން ކޮށްފައެވެ.
އިމްރާން ޚާންގެ ޓުއީޓުގައި ވިދާޅުވެފައި ވަނީ އެ ދުވަހަކީ އަޅުދާސްކަމުން މިންޖުވާން ނިކުންނަ ދުވަސް ކަމަށެވެ.
ޕާކިސްތާން ސަރުކާރުން ވަނީ ސިވިލް ސާވަންޓުންނާއި ފުލުހުންނަށް މި މުޒާހަރާތަކުގައި ބައިވެރިނުވާން އިންޒާރު ދީފައެވެ.
އިމްރާން ޚާން ޕާޓީން ވެރިކަން ކުރާ ކައިބަރު ޕަޚުތޫން ޚުވާ ޕްރޮވިނސްގެ ސަރުކާރުގެ ޗީފް ސެކްރެޓަރީވެސް ވަނީ، ސަރުކާރު މުވައްޒަފުންނާއި ފުލުހުން މުޒާހަރާތަކުގައި ބައިވެރިވެއްޖެނަމަ ހަރުކަށި ފިޔަވަޅު އަޅާނެ ކަމުގެ އިންޒާރު ދެއްވާފައެވެ.
ޕާކިސްތާންގެ ދާޚިލީ ވުޒާރާއިން ވަނީ މިއަދުން ފެށިގެން އިސްލާމްއާބާދާއި ޕަންޖާބުގައި ސިފައިން މަގުމައްޗަށް ނެރެފައިވާ ކަން އިއުލާން ކޮށްފައެވެ.
