ރަޝިޔާއަށް ހަމަލަ ދިނުމަށް، ޔުކްރެއިންގެ ކުލީ ހަނގުރާމައަށް އެމެރިކާއާއި އިނގިރޭސިވިލާތުން ހަތިޔާރު ދިނުމުން، އެ ހަނގުރާމަ ދުނިޔޭގެ ހަމަނުޖެހުމަކާ ދިމާއަށް ބޮޑުވަމުން ދާކަމަށް ރަޝިޔާގެ ރައީސް ވްލަޑިމިއާ ޕޫޓިން ވިދާޅުވެއްޖެ އެވެ.
ޕޫޓިން ވިދާޅުވި ގޮތުގައި، އެމެރިކާއާއި އިނގިރޭސިވިލާތުގެ މިސައިލް ބޭނުންކުރުމަށް ރަޝިޔާއިން، ރައްދުދީފައިވަނީ ޔޫކްރޭންގެ އަސްކަރީ ފެސިލިޓީއަކަށް، އާ ވައްތަރެއްގެ މެދު ރާސްތާއަށް، އަޑަށް ވުރެން ބާރަށް ދަތުރުކުރާ ހައިޕަރސޮނިކް މީޑިއަމް ރޭންޖް ބެލިސްޓިކް މިސައިލަކުން ހަމަލަ ދީގެންނެވެ.
ޕޫޓިން ވިދާޅުވީ، އެފަދަ ހަތިޔާރާއެކު އިތުރު ހަމަލާތަކެއް ދިނުމުގެ ކުރިން އާންމުންނަށް އިންޒާރު ދޭނެ ކަމަށެވެ.
އެމެރިކާގެ ރައީސް ޖޯ ބައިޑަންގ ސަރުކާރުން ރުހުން ލިބުމުން ޔޫކްރޭނުން ރަޝިޔާއަށް ހަމަލާދިނީ އެމެރިކާގައި އުފެއްދި ހަ އޭޓީއޭސީއެމްއެސް އިންނެވެ. އަދި އިނގިރޭސިވިލާތުގެ ސްޓޯމް ޝެޑޯ މިސައިލްތަކުންވެސް ހަމަލަ ދިން ކަމަށް ޕޫޓީން ވިދާޅުވިއެވެ.
ދައުލަތުގެ ޓީވީން ގައުމާ މުޚާތަބު ކުރައްވަމުން ޕޫޓިން ވިދާޅުވީ މިހާރު ހަނގުރާމަ ބައިނަލްއަގްވާމީ ހަނގުރާމައަކަށް ވާން މިސްރާބު ޖަހާފައިވާ ކަމަށެވެ.
ޕޫޓިން ވިދާޅުވީ، އެމެރިކާއިން، ދުނިޔެ ގެންދަނީ، ހަމަނުޖެހުމަކާ ދިމާއަށެވެ.
ދުނިޔޭގެ އެކި ތަންތާގައި އެންމެ ގިނައިން އަސްކަރީ މަރުކަޒު ބަހައްޓާފައިވާ އެމެރިކާއިން ދަނީ ފަލަސްޠީނާއި ޔުކްރެއިންގައި ކުލީ ހަނގުރާމަ ހިންގަމުންނެވެ. މީގެ ކުރިން އަފްޣާނިސްތާނާއި އިރާގުގައިވެސް އެމެރިކާއިން ހަނގުރާމަ ކޮށްފައި ވެއެވެ. 20 ވަނަ ގަރުގައި އެންމެ ގިނަ ހަނގުރާމަކޮށް އެންމެ ގިނަ މީހުން މަރައި ޖަރީމާތައް ހިންގާފައި ވަނީ އެމެރިކާއިންނެވެ.
