ދެހާސް އަށާވީސް ވަނަ އަހަރު ރައްޔިތުންގެ މަޖިލީހަށް ހުށަހަޅާނީ އަރަނި ބަޖެޓެއް ކަމަށް ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރައީސް މިހެން ވިދާޅުވީ، ރިޔާސީ އިންތިހާބުގެ ކެމްޕޭނަށް މިއަދު ހެނދުނު ތ ގާދިއްފުށްޓަށް ވަޑައިގެން އެރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ތަރައްގީގެ އިތުރު މަޝްރޫއުތައް ހިންގުމަށް ފައިސާ ހޯދޭނެ އިތުރު ގޮތްތައް ހޯދަމުން އަންނަ ކަމަށާއި އެގޮތުން އިގުތިސާދަށް ގެންނަ ބޮޑު ބަދަލާއެކު ފައިސާ ލިބިގެންދާނެ ކަމަށް ރައީސް ވަނީ ވިދާޅުވެފައެވެ.
ރާއްޖޭގެ އިގުތިސާދު ދެގުނަ ކުރުމަށްޓަކައި އުމްރާނީ ތަރައްގީ ގެންނަން ޖެހޭކަން ފާހަގަކުރައްވައި ރައީސް ވިދާޅުވީ އެއާޕޯޓުތަކާއި އާރުޓީއެލް ފެރީގެ ނިޒާމުން ރާއްޖެ ގުޅުވައިލުމާއެކު ވަޒީފާ އިތުރުވެ، ދައުލަތަށް ވަންނަ ފައިސާ ވެސް އިތުރުވެގެންދާ ކަމަށެވެ.
ރައީސް ވަނީ ކުރިއަށް އޮތް ދައުރަށް ގާދިއްފުއްޓަށް ވައުދުތަކެއް ވެވަޑައިގެންފައެވެ.
- ގާދިއްފުށި ކައިރީގައި ވަރުވާއަށް ދޫކޮށްފައި އޮތް ރަށެއް ކަމަށްވާ އުސްފުށި، ޕިކްނިކް އައިލެންޑެއްގެ ގޮތުގައި ތަރައްގީކޮށް ދިނުން
- ބިން އިތުރުކޮށް ބޯހިޔާވަހިކަން ފޯރުކޮށްދިނުން
- ސިއްހީ މަރުކަޒު އެކްސްޓެންޝަން ބިލްޑިންއެއް އަޅައިދިނުން
- ވޮލީ ކޯޓަކާއި އައުޓްޑޯ ޖިމެއް ހަދައިދިނުން
