ކުރިއަށް އޮތް ރިޔާސީ އިންތިހާބު ކާމިޔާބުކޮށް، ވެރިކަމަށް ވަޑައިގެންފި ނަމަ، ރާއްޖޭގެ ތިން ސަރަހައްދެއްގައި ބައިނަލްއަގުވާމީ ރޭސިން ޓްރެކަކާއި ޑްރިފްޓިން ސްޓޭޑިއަމެއް އަޅުއްވައި ދެއްވާނެ ކަމަށް އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
މުއިއްޒު މިހެން ވިދާޅުވީ އަންނަ މަހުގެ 9 ގައި އޮންނަ ރިޔާސީ އިންތިހާބުގެ ކެމްޕެއިނަށް ގއ ވިލިނގިއްޔަށް ވަޑައިގެން އެރަށުގައި ބޭއްވެވި ބޮޑު ޖަލްސާގައެވެ.
މުއިއްޒު ވިދާޅުވީ ރޭސިންއަކީ ޒުވާނުންގެ މެދުގައި ވަރަށް ބޮޑަށް ކުރިއަރަމުން އަންނަ ކުޅިވަރެއްކަން ފާހަގަ ކުރައްވައި މުއިއްޒު ވިދާޅުވީ އެކަމަށް ހާއްސަ ރޭސިން ޓްރެކެއް މާލެ ސަރަހައްދުގައާއި ދެކުނާއި އުތުރުގައި ގާއިމުކުރައްވާނެކަމަށެވެ. މުއިއްޒު ވިދާޅުވި ގޮތުގައި އެ ތިން ޓްރެކް ވެގެން ދާނީ އިންޓަނޭޝަނަލް ފެންވަރުގައި ތަރައްގީ ކުރާނެ ރޭސިން ޓްރެކަކަށެވެ.
ރޭސިންއެކޭ އެއްގޮތަށް ޑްރިފްޓިންއަކީ ވެސް ޒުވާނުންގެ މެދު ކުރިއަރައިގެންދާނެ ކުޅިވަރެއް ކަމަށްވާތީ ވަރަށް ގިނަ ޒުވާނުން ކުރާ ހިތުން ކުރާ ކަމެއްކަން ފާހަގަކުރައްވައި، އެކަމަށް ޝައުގުވެރިވާ ޒުވާނުންނަށް ޑްރިފްޓިން ސްޓޭޑިއަމެއް ގާއިމުކުރައްވާނެ ކަމަށްވެސް މުއިއްޒު ވަނީ ވިދާޅުވެފައެވެ.
އީ ސްޕޯޓްސް ގޭމް ތެރޭގައި އުޅޭއިރު، ކޮމިއުނިޓީއަށް އަޅާލާނެ ބައެއްނެތް ކަަމަށާއި އެއީ ގައުމީ ލެވެލްއެއްގައި ބަލައިގަންނަން ޖެހޭ ކަމަށް ވެސް މުއިއްޒު ވިދާޅުވިއެވެ. މުއިއްޒު ވިދާޅުވީ އެމަނިކުފާނުގެ ވެރިކަމެއްގައި އެ ކުޅިވަރު ގައުމީ ފެންވަރެއްގައި ބަލައިގަންނާނެއެވެ.
މާލޭގައި އެންމެ ގިނަ އިން ރާޅާ އަރާ ސަރަހައްދު ބައިނަލްއަގުވާމީ ސާފިން ސްޓޭޑިއަމަކަށް ހަދައި ދެއްވާނެ ކަމަށްވެސް މުއިއްޒު ވިދާޅުވިއެވެ. އަދި އެ ތަނަކީ ޒުވާނުން ބޭނުންވާ ތަނަކަށްވާނެ ކަމަށްވެސް މުއިއްޒު ވަނީ ވިދާޅުވެފައެވެ.
ޒުވާނުންނަށް ކުޅިވަރުތައް ކުޅެވޭނެ ގޮތް ހެދުމަކީ މުޖުތަމައުގެ ކުރިއެރުމަކަށް މުހިންމު ކަމެއްކަމަށާއި ޒުވާނުންނަކީ ބޭކާރު ބަޔަކަށް ނުވާނެކަމުގެ ޔަގީންކަން މުއިއްޒު ވަނީދެއްވާފައެވެ.
