ރިޔާސީ އިންތިހާބުގެ ދެވަނަ ބުރުގެ ވޯޓުލުން އަތޮޅުތެރޭގެ ރަށްތަކުގައިވެސް 8:00 އިން ފެށިގެން ކުރިއަށް އެބަގެންދެއެވެ.
އަތޮޅުތެރޭގެ ރަށްތަކުގައި ވެސް މާލެއެކޭ އެއްގޮތަށް 8:00 ޖެހުމުގެ ކުރިން ވަނީ ވޯޓު ކިޔުތައް ހަދަން ފަށައިފައެވެ. ރަށްރަށުގެ ވޯޓުލުމުގެ ކަންތައްތައް ދަނީ ވަރަށްވެސް އަމާންކަމާއެކު ކަމަށް މައުލޫމާތު ލިބިފައިވެއެވެ.
ރަށްރަށުގެ ވޯޓުލުންވެސް ހަވީރު 5:00 އަށް ނިންމާލާނެއެވެ. ވޯޓުލުމުގެ ގަޑި ޖެހުމަށްފަހު، ގަޑި އިތުރުނުކުރާނެ ކަމަށް އީސީން ވަނީ ހާމަކޮށްފައެވެ.
ރޭ ބޭއްވި ނޫސްވެރިންގެ ބައްދަލުވުމުގައި ކޮމިޝަންގެ ނައިބު ރައީސް އިސްމާއިލް ހަބީބު ވިދާޅުވީ ދެވަނަ ބުރުގެ ވޯޓުލުން ކުރިއަށްދާނީ މިއަދު ހެނދުނު 8:00 އިން ހަވީރު 5:00 އަށް ކަމަށާއި އެއަށް ވުރެ އިތުރަށް ކޮމިޝަނުން ވޯޓުލާން ވަގުތު އިތުރުނުކުރާނެ ކަމަށެވެ.
އެހެންކަމަށްވުމުން ވޯޓު ލުމުގެ ގަޑި އިތުރު ކުރާނެ ކަމަށް ބައްލަވައިގެން، ވޯޓުލާން އެންމެ ފަހު ވަގުތަށް މަޑުނުކުރެއްވުން އެއީ ކޮމިޝަނުން ވަރަށް ބޮޑަށް އެދޭ ކަމެއްކަމަށް ރޭގެ ބައްދަލުވުމުގައި އީސީން ވަނީ ބުނެފައެވެ.
އީސީން ވަނީ ވީ އެންމެ އަވަހަކަށް ވޯޓުލުމުގެ ހައްގު އަދާކުރުމަށް ވެސް އިލްތިމާސްކޮށްފަ އެވެ.
