އިންތިހާބީ ރައީސް ޑރ. މުހައްމަދު މުއިއްޒު ރައީސް ކަމުގެ ހުވާކުރެއްވުމުން، އެމަނިކުފާނު މިހާރު ހުންނެވި މާލެ ސިޓީ ކައުންސިލުގެ މޭޔަރު ކަމުގެ މަގާމުގެ ބައި-އިލެކްޝަނުގައި ވާދަކުރެއްވުމަށް ޔޫތު މިނިސްޓަރު އަހްމަދު މަހުލޫފް ނިންމަވައިފިއެވެ.
މޭޔަރު ކަމަށް ވާދަކުރައްވާނެކަމަށް އިޢުލާނުކުރައްވަމުން މަހްލޫފު ވަނީ މާލޭގެ ހުރިހާ ރައްޔިތުން އެބޭފުޅާއަށް ތާއީދުކޮށްދެއްވުމަށް އެދިވަޑައިގެންފައެވެ.
އިންތިހާބީ ރައީސް މުއިއްޒު މާލޭ ސިޓީ މޭޔަރު ކަމަށް އިންތިހާބުވީ 2021 ވަނަ އަހަރުގައެވެ. އެއީ ރައްޔިތުން އިންތިހާބުކޮށްގެން މާލޭގެ މޭޔަރު ކަމަށް ބޭފުޅަކު އިންތިހާބު ކުރި ފުރަތަމަ ފަހަރެވެ.
އެމަނިކުފާނު މާލޭގެ މޭޔަރުކަމަށް ވަޑައިގެންނެވީ އެމްޑީޕީގެ އަނަސް ޢަބްދުއްސައްތާރާއި ވާދަކުރައްވައި ތަފާތު ބޮޑު ނަތީޖާއަކުން އިންތިހާބު ކާމިޔާބު ކުރެއްވުމަށްފަހުއެވެ. އަދި އެމަނިކުފާނު ވަނީ މޭޔަރު ކަމުގައި މާލޭގައި ގިނަ ކަންކަން ކޮށްދެއްވާފައެވެ.
