ފަލަސްތީނަށް ތާއީދު އޮތްކަން ހާމަކުރުމަށް ދުނިޔޭގައި މިހާތަނަށް ބޭއްވި އެންމެ ބޮޑު އެއްވުން އިންޑޮނޭޝިއާގައި ބާއްވައިފިއެވެ.
މި އެއްވުމަށް އިންޑޮނޭޝިއާގެ ނޭޝަނަލް މޮނުމެންޓަށް އެއްވި މީހުންގެ އަދަދު 2 މިލިއަނަށް އަރައެވެ.
ފަލަސްތީނަށް ތާއީދުކޮށް އިންޑޮނޭޝިއާގައި ބޭއްވި އެންމެ ބޮޑު މި އެއްވުމުގައި ބައިވެރިވި މީހުންވަނީ ގާޒާއަށް އިސްރާއީލުން ބޮންއެޅުން ހުއްޓާލުމަށާއި، ގާޒާ ހިސޯރުކޮށްފައި އޮތުންވެސް ނިމުމަކަށް ގެނައުމަށް ގޮވާލާ އަޑު އުފުލާފައެވެ.
މި އެއްވުމުގައި މީހުން ތިބީ ފަލަސްތީނުގެ މިނިވަންކަމަށް ކުރާ ޖިހާދު ރަމްޒުކޮށްދޭ އެގައުމުގެ ދިދައިގެ ކުލައިގެން ފޮތިގަޑުތައް ހިފައިގެންނެވެ. މިއީ އެމީހުން ފަލަސްތީނަށް ތާއީދުކުރާކަން ރަމްޒު ކޮށްދިނުމުގެ ގޮތުން ކޮށްފައިވާ ކަމެކެވެ. ހަމައެހެންމެ ފަލަސްތީނުގެ ދިދަ ވިހުރުވެމުން ދިޔައެވެ.
އެއްވުމުގައި ބައިވެރިވެވަޑައިގެންނެވި އިންޑޮނޭޝިއާ ސަރުކާރުގެ އިސްވެރިންގެ ތެރޭގައި، ފޮރިން މިނިސްޓަރ ރެންޓޯ މުރުސުދީއާއި، ރެލިޖަސް އެފެއާޒް މިނިސްޓަރު ޔާގޫތު ޗޯލިލްއާއި ޖަކާޓާގެ ކުރީގެ ގަވަރުނަރު އަދި ރިޔާސީ ކެނޑިޑޭޓް އަނީސް ބަސްވަޑެން އާއި، ހައުސް އޮފް ރެޕްރެސެންޓޭޓިވްސްގެ ރައީސް ޕުއާން މަހަރަނި ވެސް ހިމެނެއެެވެ.
އިންޑޮނޭޝިއާގެ މުސްލިމް ލީޑަރުން ސްޓޭޖްމަތީގައި ތިއްބެވިއިރު ފަހަތުގައި ހުރި ބޮޑު ސްކްރީންތަކުން އިޒްރޭލުން ގާޒާއަށް ބޮމުގެ ހަމަލާތައް ދެމުންދިޔަ މަންޒަރުތައް ފެންނަމުން ދިޔައެވެ. ހަމަމިއާއެކު، އިންޑޮނޭޝިއާގެ މުސްލިމް ލީޑަރުންވަނީ މި އެއްވުމުގައި ތަގުރީރު ކޮށްފައެވެ. ތަގުރީރުކުރެއްވި ދީނީ ލީޑަރުން ވަނީ އިސްރާއީލުގެ އުފެއްދުންތައް އިންޑޮނޭޝިއާއައް އެތެރެކުރުން ހުއްޓާލުމަށް ގޮވާލުމުގެ އިތުރުން އިސްރާއީލުން ގގާޒާގައި ހިންގަމުންދާ ޖަރީމާތައް ތަހުގީގު ކުރުމަށްވެސް ގޮވާލާފައެވެ.
