ރައީސުލްޖުމްހޫރިއްޔާ މިއަދު ޤައުމާއި މުޚާތަބުކުރައްވައި މަޖިލިސް ހުޅުވުމަށް ބޭއްވި ޖަލްސާގައި ދެއްވި ރިޔާސީ ބަޔާނުން އުންމީދު އާވެފައިވާކަމުގައި ޝައިޚު އަލީ ޒައިދު ވިދާޅުވެއްޖެއެވެ.
މި އަހަރަށް މަޖިލިސް ހުޅުވައި ދެއްވަމުން ރައީސް އިއްވެވި ރިޔާސީ ބަޔާނަށް އިޝާރާތް ކުރައްވައި ޒައިދު ކުރެއްވި ޓްވީޓެއްގައި ވިދާޅުވީ އަމަލީ ގޮތުން އެވާހަކަފުޅު ތަކުގައި ކުލަ ޖެހުމަކީ ރައްޔިތުންގެ އެންމެބޮޑު އުންމީދު ކަމަށެވެ.
"އިޖުތިމާއީ ގޮތުން މާލެ ސަރަހައްދަށް ބޯހިޔާވަހިކަން ވަރަށް ބޭނުން! އަދި އެ ލިބޭ ހިޔާ ވެއްސެއްގައި އެބަޔަކު އުޅޭކަންވެސް ސަރުކާރުން ކަށަވަރު ކުރެވެން ވާނެ! ނޫނީ ހައްލެއް ނުވާނެ." ޒައިދު ވިދާޅުވިއެވެ.
ރިޔާސީ ބަޔާނުގައި ރައީސް ވިދާޅުވެފައިވަނީ މާލޭގެ ބޯހިޔާވަހިކަމަށް ޙައްލެއް ހޯދުމަށް ރޭވި މަޝްރޫޢުތައް، ދިމާވި ބައެއް ސަބަބުތަކާ ހެދި މަޑުޖެހުމަށްފަހު، އެމަޝްރޫޢުތަކުގެ މަސައްކަތް މިހާރު ކުރިއަށްދާކަމަށެވެ. އޭގެ ތެރެއިން، 1000 ހައުސިންގ ޔުނިޓްގެ ޢަމަލީ މަސައްކަތް ފަށާފައިވާއިރު، ހުޅުމާލޭގައި ހަދާ އެފޯޑަބަލް ރޭންޖުގެ 2000 ހައުސިން ޔުނިޓު ޢިމާރާތްކުރުމުގެ އެއްބަސްވުމުގައި މިހަފްތާގައި ވާނީ ސޮއިކޮށްފައި ވާކަމަށް ރައީސް ޞާލިހު ވިދާޅުވިއެވެ.
ރައީސް ވިދާޅުވީ އިތުރު 2000 ހައުސިން ޔުނިޓާއެކު، މިއަހަރު ނިމުމުގެ ކުރިން މަދުވެގެން 5000 ހައުސިން ޔުނިޓްގެ އަމަލީ މަސައްކަތް މާލެ ސަރަހައްދުގައި ފެށޭނެކަމަށެވެ.
