މި އަހަރު ރާއްޖެއަށް ޒިޔާރަތްކުރި ފަތުރުވެރިންގެ އަދަދު އަށްލައްކައަށް އަރައިފިއެވެ.
ފަތުރުވެރިކަމާ ބެހޭ ވުޒާރާއިން އެ ވުޒާރާގެ ވެބްސައިޓުގައި ޝާއިއުކުރި ތަފާސްހިސާބުތަކުން ދައްކާ ގޮތުގައި މެއި މަހުގެ 11 ވަނަ ދުވަހާ ހަމައަށް ރާއްޖެއަށް ޖުމްލަ 822,723 ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ. މިއީ މިދިޔަ އަހަރުގެ މެއި މަހުގެ ނިޔަލަށް ރާއްޖެއަށް ޒިޔާރަތްކުރި 735,374 ފަތުރުވެރިންނާ އަޅާ ބަލާއިރު 11.9 އިންސައްތައިގެ ކުރި އެރުމެކެވެ.
މި އަހަރު މެއި މަހުގެ ނިޔަލަށް ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި ތިން ގައުމަކީ ޗައިނާ, ރަޝިއާ އަދި އިނގިރޭސި ވިލާތެވެ. ޗައިނާއިން ރާއްޖެއަށް 91,073 ފަތުރުވެރިން ޒިޔާރަތް ކޮށްފައިވާ އިރު, ރަޝިއާއިން ރާއްޖެއަށް 83,219 ފަތުރުވެރިން ވަނީ ޒިޔާރަތް ކޮށްފައެވެ. އިނގިރޭސި ވިލާތުން ރާއްޖެއަށް ޒިޔާރަތް ކޮށްފައިވަނީ 78,961 ފަތުރުވެރިންނެވެ.
2023 ވަނަ އަހަރު ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި އަވަށްޓެރި އިންޑިއާ އޮތީ ހަވަނައިގައެވެ. އިންޑިއާއިން ރާއްޖެއަށް 46,342 ފަތުރުވެރިން އައިސްފައިވާއިރު އެއީ ރާއްޖެއަށް ޒިޔާރަތްކުރި ފަތުރުވެރިންގެ ޖުމްލަ އަދަދުގެ އެންމެ 5.6 އިންސައްތައެވެ.
