ހުރިހާ ރިސޯޓްރަކަކުންވެސް ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯގެ) ކުނި ނެގުމުގެ ޚިދުމަތުގައި ބައިވެރިވުމަށް ބައިވެރިވުމަށް ފަތުރުވެރިކަމާބެހޭ ވަޒީރު އިބްރާހިމް ފައިޞަލް އެދިވަޑައިގެންފިއެވެ.
ވެމްކޯއިން ރިސޯޓުތަކަށް ކުނި މެނޭޖްކުރުމުގެ ޚިދުމަތް ތަޢާރަފުކުރުމަށް މިއަދު ބޭއްވުނު ރަސްމިއްޔާތުގައި ވާހަކަފުޅު ދައްކަވަމުން، ވަޒީރު ފައިސަލް އިބްރާހީމް ފާހަގަކުރެއްވީ، މިހާތަނަށް ރިސޯޓުތަކުން ކުނި ނައްތާލުމުގެ މަސައްކަތް ކުރަމުން ގެންގޮސްފައިވަނީ އަމިއްލަ ފަރާތްތަކާ ހަވާލުކޮށްގެން ކަމުގައެވެ.
މީގެއިތުރުން، ވަޒީރު އިތުރަށް ވިދާޅުވީ އަމިއްލަ ފަރާތްތަކާ ހަވާލުކޮށްގެން ކުނި ނައްތާލުމަކީ ރިސޯޓުތަކުގެ ކުނި ދެމެހެއްޓެނިވި ގޮތެއްގައި މެނޭޖްކުރުމަށް އެންމެ އެކަށީގެންވާ ނިޒާމެއް ނޫންކަމަށެވެ.
ވެމްކޯގެ ކުނި މެނޭޖްކުރުމުގެ ޚިދުމަތުގައި ރިސޯޓުތައް ބައިވެރިވުމަކީ، ދައުލަތުގެ ކުންފުނިތައް އަމިއްލަ ފައިމައްޗަށް ތެދުވެ، ފުދުންތެރި ވިޔަފާރިތަކަކަށް ހެދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވާފައިވާ މަސައްކަތްޕުޅަށް ލިބިގެންދާނެ ކާމިޔާބީއެއް ކަމަށްވެސް ވަޒީރު ފައިސަލް ވިދާޅުވިއެވެ.
ވެމްކޯގެ ކުނި ނެގުމުގެ ޚިދުމަތް ހޯދުމަށް ރަޖިސްޓަރީވާ ރިސޯޓުތަކަށް މި ޚިދުމަތް ފޯރުކޮށްދެވޭނެ ކަމަށް ވެމްކޯއިން ކަށަވަރުކޮށްދީފައިވެއެވެ. މި ޚިދުމަތް ލިބިގަތުމަށްޓަކައި، ރިސޯޓުތަކުން ވެމްކޯގައި ރަޖިސްޓަރީވުން ލާޒިމުވެއެވެ. މި ރަސްމިއްޔާތުގައި ވަޒީރު ފައިސަލް ވަނީ ހުރިހާ ރިސޯޓުތަކުންވެސް ވެމްކޯގެ ކުނި އުކައިދިނުމުގެ ޚިދުމަތުގައި ބައިވެރިވުމަށް އެދިވަޑައިގެންފައެވެ.
ވެމްކޯއިން ހާމަކުރި ގޮތުގައި، ރިސޯޓުތަކުން ކުނި ނަގައިދޭން ފަށާފައިވަނީ، ކުންފުނީގެ ސަރަޙައްދީ ޓްރާންސްފަރ ސްޓޭޝަންތަކަށް ކުނި ގެންދިއުމުގައި ރިސޯޓުތަކަށް ދިމާވާ ގޮންޖެހުންތައް ޙައްލުކުރުމުގެ މަޤްޞަދުގައެވެ.
ވެމްކޯއިން އިތުރަށް ބަޔާންކޮށްފައިވާ ގޮތުގައި، ކުނި ނެގުމުގެ މަސައްކަތް ކުރިއަށް ގެންދާނީ ކުނި ހަތަރު ބަޔަކަށް ވަކިކުރުމަށްފަހުގައެވެ. މި ގޮތުން ޕްލާސްޓިކް، ބަދިގޭ ކުނި، ބިއްލޫރި އަދި މަޢުދަން، އަދި އެހެނިހެން ކުނި ވަކިން ނެގޭނެއެވެ. މިފަދައިން ކުނި ވަކިކޮށްގެން މެނޭޖްކުރުމަކީ ފަތުރުވެރިކަމުގެ ދާއިރާއަށްވެސް އޭގެ އެދެވޭ އަސަރު ފޯރުވައިދޭނެ ކަމެއްގެ ގޮތުގައި ވެމްކޯއިން ފާހަގަކޮށްފައިވެއެވެ.
