އަންނަ މަހުން ފެށިގެން މާފުށި، ކުޅުދުއްފުށި ސިޓީ އަދި ތިނަދޫ ސިޓީގައި ހުރި ވެމްކޯގެ ސައިޓުތަކުން ޚިދުމަތް ހޯދާ ފަރާތްތަކުން ގޭޓް ފީއެއް ނެގުމަށް ނިންމާފައިވާކަމަށް ވެމްކޯއިން އިޢުލާނުކޮއްފިއެވެ.
ވެމްކޯއިން އިތުރަށް ވިދާޅުވީ، މި ތިން ރަށުގެ ރައްޔިތުންގެ ތެރެއިން ވެމްކޯގެ ޚިދުމަތްތަކަށް ރަޖިސްޓަރީ ކޮށްފައިވާ ފަރާތްތަކަށް މިދިޔަ މަހުން ފެށިގެން ޚިދުމަތް ފޯރުކޮށްދޭން ފަށާފައިވެއެވެ. ނަމަވެސް، އެ މަހު ފޯރުކޮށްދެވުނު ޚިދުމަތަށް އަގު ނުނެގުމަށް ނިންމާފައިވާ ކަމަށާއި، މި މަހުގެ ޚިދުމަތުގެ ބިލު އޮގަސްޓު މަހުގެ ފުރަތަމަ ހަފުތާގެ ތެރޭގައި ފޯރުކޮށްދެވޭނެ ކަމަށް ވެމްކޯއިން ބަޔާންކޮށްފައިވެއެވެ.
އަގު ނެގުމުގެ އޮނިގަނޑުގެ ދަށުން، މި ތިން ރަށުން ވެމްކޯގެ ޚިދުމަތްތަކަށް ރަޖިސްޓަރީކޮށްފައިވާ ގޭބިސީތަކުން މަހަކު 150 ރުފިޔާ ނެގުމަށް ވަނީ ނިންމާފައެވެ. މީގެ އިތުރުން، މާފުށީގައި މި ޚިދުމަތަށް ރަޖިސްޓަރީކޮށްފައިވާ ވިޔަފާރިތަކުން ލީޓަރަކަށް 0.27 ރުފިޔާ ނެގުމަށް ނިންމާފައިވާއިރު، ތިނަދޫ އަދި ކުޅުދުއްފުށި ސިޓީގައި ހުރި ވިޔަފާރިތަކުން ލީޓަރަކަށް 0.16 ރުފިޔާ ނެގުމަށް ވެމްކޯއިން ވަނީ ނިންމާފައެވެ.
ވެމްކޯއިން އިޢުލާނުކުރި ގޮތުގައި، މާފުށީގައި ހުރި އެ ކުންފުނީގެ ސައިޓްތަކުން ޚިދުމަތް ހޯދާ ފަރާތްތަކުން ޓަނަކަށް 500 ރުފިޔާ ނެގުމަށް ނިންމާފައިވެއެވެ. ތިނަދޫ އަދި ކުޅުދުއްފުށީ ސިޓީގައި ހުރި ވެމްކޯގެ ސައިޓްތަކުން ޚިދުމަތް ހޯދާ ފަރާތްތަކުން ޓަނަކަށް 108 ރުފިޔާ ނެގުމަށް ހަމަޖެހިފައިވެއެވެ. މީގެ އިތުރުން، މި ތިން ރަށުގައިވެސް ސަރުކާރުގެ މުއައްސަސާތަކުން ގޭޓްފީގެ ގޮތުގައި 2,660 ރުފިޔާ ނެގުމަށް ވަނީ ނިންމާފައެވެ.
