ރާއްޖޭގެ ތިން ވަޒީރުން މި މަހު ރަސްމީ ދަތުރުފުޅެއްގައި ޗައިނާއަށް ވަޑައިގަންނަވާނެ ކަމަށް ޚާރިޖީ ވުޒާރާއިން ހާމަކުރައްވައިފިއެވެ.
މި ދަތުރުފުޅުގައި ބައިވެރިވެ ވަޑައިގަންނަވަނީ ޚާރިޖީ ވަޒީރު މޫސާ ޒަމީރު، މާލީ ވަޒީރު ޑރ. މުޙައްމަދު ޝަފީޤު، އަދި ޢިމާރާތްކުރުމާއި ބިނާވެށި ތަރައްޤީކުރުމާބެހޭ ވަޒީރު ޑރ. ޢަބްދުﷲ މުއްޠަލިބެވެ.
ޚާރިޖީ ވުޒާރާގެ ބަޔާނެއްގައި ވިދާޅުވެފައިވާ ގޮތުގައި، މި ދަތުރުފުޅު ކުރިއަށްދާނީ މި މަހުގެ 20 އިން 24 އަށެވެ. މި ދަތުރުފުޅަކީ ޗައިނާގެ ޚާރިޖީ ވަޒީރު ވަންގް ޔީ، ދިވެހިރާއްޖޭގެ ޚާރިޖީ ވަޒީރަށް ދެއްވާފައިވާ ދަޢުވަތަކަށް ކުރައްވާ ދަތުރުފުޅެކެވެ.
މި ދަތުރުފުޅުގެ ތެރޭގައި، ދިވެހި ވަޒީރުން ޗައިނާގެ ޚާރިޖީ ވަޒީރާއި އެ ޤައުމުގެ އެހެނިހެން އިސް ވެރިންނާ ބައްދަލުކުރައްވާނެއެވެ. މީގެ އިތުރުން، ދިވެހިރާއްޖޭގެ އިޤްތިޞާދީ ކުރިއެރުމަށް މުހިންމު ދައުރެއް އަދާކުރަމުންދާ ޗައިނާގެ ގިނަ ކުންފުނިތަކަކާވެސް ބައްދަލުކުރެއްވުމަށް ހަމަޖެހިފައިވާ ކަމަށް ޚާރިޖީ ވުޒާރާއިން ފާހަގަކުރައްވާފައިވެއެވެ.
އަދި މި ދަތުރުފުޅުގައި ވަޒީރުންގެ އިތުރުން ސަރުކާރުގެ އިސް ބޭފުޅުންގެ ވަފުދެއްވެސް ބައިވެރިވެ ވަޑައިގަންނަވާނެ ކަމަށް ޚާރިޖީ ވުޒާރާއިން އިތުރަށް ހާމަކުރައްވާފައިވެއެވެ.
