ބަންގްލަދޭޝްގައި ދިރިއުޅޭ އަދި އެ ގައުމަށް ދަތުރުކުރާ ދިވެހީން މިދުވަސްވަރު ސަމާލުވުމަށް ރާއްޖޭގެ ޚާރިޖީ ވުޒާރާއިން އިލްތިމާސްކޮއްފިއެވެ.
އެ ވުޒާރާއިން ނެރުނު ބަޔާނެއްގައި ވިދާޅުވީ، ބަންގްލަދޭޝްގައި މިހާރު ހިނގަމުންދާ ހަމަނުޖެހުންތަކާ ގުޅިގެން، އެގައުމުގައި ދިރިއުޅޭ ދިވެހިންނާއި އެ ގައުމަށް ދަތުރުކުރާ ދިވެހިން ސަމާލުވުމަށާއި، ބަންގްލަދޭޝް ސަރުކާރުން ދޭ އިރުޝާދުތަކާ އެއްގޮތަށް މިދަނޑިވަޅުގައި ބޭރަށް ނުކުމެ ނޫޅުމަށެވެ.
އަދި އެ ގައުމުގެ ސަރުކާރާއި އެ ގައުމުގައި ހުންނަ ރާއްޖޭގެ ހައިކޮމިޝަންގެ އިރުޝާދާ އެއްގޮތަށް އަމަލުކުރުމަށްވެސް އިލްތިމާސް ކޮށްފައިވެއެވެ.
އަދި ބަންގްލަދޭޝްގައި ދިރިއުޅޭ ދިވެހި ކިޔަވާކުދިންނާއި ދިރިއުޅޭ ދިވެހިންގެ ސަލާމަތާއި ރައްކާތެރިކަން ކަށަވަރުކުރުމަށް ދިވެހި ސަރުކާރުން އަންނަނީ މަސައްކަތްކުރަމުން ކަމަށްވެސް ޚާރިޖީ ވުޒާރާއިން ވިދާޅުވިއެވެ.
އަދި، މިކަމާ ގުޅިގެން އެއްވެސް އެހީތެރިކަމެއް ބޭނުންފުޅުވާނަމަ، ބަންގްލަދޭޝްގައި ހުންނަ ދިވެހިރާއްޖޭގެ ހައިކޮމިޝަނާ ގުޅުއްވުމަށް އެ ވުޒާރާއިން އިރުޝާދުދެއެވިއެވެ.
ބަންގްލަދޭޝްގެ ވަޒީފާގެ ކޯޓާ ނިޒާމާ ގުޅިގެން އެގައުމުގެ ދަރިވަރުން އަންނަނީ މުޒާހަރާކުރަމުންނެވެ. މި ހަމަނުޖެހުންތަކުގައި 19 މީހުން ވޭތުވެދިޔަ ހަފްތާގައި މަރުވެފައިވާކަމަށް ބުނާއިރު، ބައެއް ރިޕޯޓުތަކުން އަންނަނީ މިއަދަދަދު މާ މަތިކަމަށް ބުނަމުންނެވެ.
މުޒާހަރާތަށް ހޫނުވުމާ ގުޅިގެން އެގައުމުގެ ސަރުކާރުން މިކަން ހުއްޓުވުމަށް އަންނަނީ ބޮޑެތި ފިޔަވަޅުތަކެއް އަޅަމުންނެވެ. މީގެ އިތުރުން، އެގައުމުގެ މުއާސަލާތީ ހިދުމަތްތަށް މިހާރު ވަނީ ކަނޑާލާ، އެކި އިދާރާތަށްވެސް ވަނީ ބަންދުކޮއްފައެވެ.
