ވެމްކޯއިން ކުޅުދުއްފުށި ސިޓީގައި ޚިދުމަތް ރަސްމީކޮށް އިފްތިތާހްކޮށްފިއެވެ.
ވެމްކޯގެ ޚިދުމަތްތައް ކުޅުދުއްފުށި ސިޓީގައި ފަށާފައިވަނީ އެކަމަށްޓަކައި އެރަށު އަފީފުއްދީން ސްކޫލްގައި ބޭއްވުނު ރަސްމިއްޔާތެއްގައެެވެ.
މި ހަފްލާ ޝަރަފުވެރި ކޮށްދެއްވެވީ މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވަޒީރު ޠާރިޤް އިބްރާހިމްއެވެ. ވަޒީރު ހަފްލާގައި ވާހަކަ ދައްކަވަމުން ވެމްކޯގެ މަސައްކަތްތައް އެރަށުގައި ފެށުމުން ކުޅުދުއްފުށި ސިޓީގެ ކައުންސިލާއި ރަށު ރައްޔިތުންނަށް މަރުހަބާ ދެނެނެވިއެވެ.
ވަޒީރު އިތުރުން މި ހަފްލާގައި ހާއްސަ މެހެމާނެއްގެ ގޮތުގައި ރައްޔިތުން މަޖިލިސް ގެ ރައީސް އޮނަރަބަލް ޢަބްދުއްރަހީމް ޢަބްދުﷲ ވެސް ބައިވެރިވެ ވަޑައިގެންނެވިއެވެ. ކުޅުދުއްފުށީ ސިޓީ މޭޔަރު މުހައްމަދު އާތިފް އާއި ވެމްކޯ އެމްޑީ އާއި ޑީއެމްޑީ އަދި ކުޅުދުއްފުށީ އުތުރު ދާއިރާގެ މެންބަރު މުހައްމަދު ދާއޫދާއި، އެހެނިހެން ދާއިރާތަކުގެ ރައްޔިތުންގެ މަޖިލީހުގެ މެމްބަރުންވެސް މިހަފްލާގައި ބައިވެރިވެވަޑައިގަތެވެ.
މޫސުމީ ވަޒީރުގެ ވާހަކަފުޅުގައި ވަނީ ރާއްޖޭގައި ކުނި މެނޭޖްކުރުމަށް ހުރި ދަތިތަަކަށާއި ރާއްޖޭގައި ކުނި މެނޭޖްކުރެވެމުންދިޔަ ގޮތަށް އަލިއަޅުއްވާލައްވާފައެވެ. އެގޮތުން، ވަސީލަތް މަދު ކަމާއި، ރާއްޖޭގެ ރަށްރަށް އެކުލެވިފައިވާ ގޮތުން، ވަށާޖެހޭ، ޚަރަދުކުޑަގޮތެެއްގައި އެ މަސައްކަތްކުރުމަށް ހުރި ގޮންޖެހުމަށްވެސް ވަޒީރު ޠާރިޤް ބައްލަވާލެއްވިއެވެ.
އަދި، އެކަމަށް ހައްލެއް ހޯދުމުގެ ގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، ފަސް އަހަރު ދުވަހަށް ބަހާލައިގެން ކުނި މެނޭޖްކުރުމަށް ރާއްޖޭގެ ހުރިހާ ސަރަހައްދެއް ހިމެނޭހެން "މަގޭ ސާފު ރާއްޖެ" މަޝްރޫއު މިހާރު ވަނީ ލޯންޗް ކުރެވިފައި ކަމަށާއި މާސްޓަރ ޕްލޭނެއްގެ ދަށުން ރާއްޖެ 7 ސަރަހައްދަކަށް ބަހާލައިގެން، ވަށާޖެހޭ ހައްލެއް ހޯދުމުގެ މަސައްކަތް މިހާރު ފެށިގެން ކުރިއަށް ދާކަމަށްވެސް ވަޒީރު ޠާރިޤް ވިދާޅުވިއެވެ.
ކުޅުދުއްފުށީ ވެމްކޯއިން ފޯރުކޮށްދޭ ޚިދުމަތްތައް ފެށިފައިވަނީ ގޭބިސީތަކުން އުފައްދާ ދުވަހު ކުނި ނެގުމާ އެކުގައެވެ. މީގެ އިތުރުން، އަމިއްލަ ގޮތުން ކުނި އުކާލަން ބޭނުންވާ ފަރާތްތަކަށް، ކުނި އުފުލާ އުޅަނދުފަހަރުގެ ރަޖިސްޓްރީއަށް ބިނާކޮށް، ޓަނަކަށް 108 ރުފިޔާގެ ގޭޓްފީއެއް ނެގުމަށްފަހު ކުނި އުކާލުމުގެ ފުރުޞަތުވެސް ލިބިގެންދާނެ ކަމަށް ވެމްކޯއިން ބުނެފައިވެއެވެ.
އަމިއްލަ ވިޔަފާރިތަކާއި ސަރުކާރުގެ މުއައްސަސާތަކަށްވެސް ކުނި އުކާލުމުގެ ޚިދުމަތް ފޯރުކޮށްދިނުމަށްވެސް ވަނީ ހަމަޖެހިފައެވެ. މިގޮތުން، ވިޔަފާރިތަކުން ލީޓަރަކަށް 0.16 ރުފިޔާ، ގޭބިސީތަކުން 150 ރުފިޔާ، ސަރުކާރު އޮފީސްތަކުން ލީޓަރަކަށް 1.27 ރުފިޔާ، އަދި ވިޔަފާރި ބޭނުމަށް ގޭޓްފީގެ ގޮތުގައި ޓަނަކަށް 2,660 ރުފިޔާގެ ރޭޓުން ޚިދުމަތްތަކަށް އަގު ކުރެވިގެންދާނެކަމަށް އެކުންފުނިން ބުނެއެވެ.
ގޭޓްފީގެ ގޮތުގައި ކަނޑައެޅިފައިވާ މި އަގުތަކަށް ޢަމަލުކުރަން ފަށާނީ 1 އޮގަސްޓް 2024 އިން ފެށިގެން ކަމަށް ވެމްކޯއިން ބުނެފައިވެއެވެ.
ކުރިއަށް އޮތް މުސްތަޤުބަލުގައި، ކުޅުދުއްފުށީ ސިޓީއަށް ބަރުކުނީގެ ބާވަތްތައް ނައްތާލުމަށް ޚާއްޞަކުރެވިފައިވާ ކެޕްސް އަދި ކެޕްސް ލައިޓްގެ ޚިދުމަތް ތަޢާރަފުކުރެވޭނެ ވާހަކަވެސް ވެމްކޯއިން ހާމަކޮށްފިވެއެވެ. މީގެއިތުރުން، ވިޔަފާރިތަކުން ކުނި ނެގުމުގެ ޚިދުމަތަށް ބޭނުންވާ އެންމެ ފަހުގެ ތައްޔާރީތައް ވަމުންދާކަމާއި، ކުރު މުއްދަތެއްގެ ތެރޭގައި މި ޚިދުމަތް ވިޔަފާރިތަކަށްވެސް ފޯރުކޮށްދެވޭނެކަމުގެ ޔަޤީންކަން ވެމްކޯއިން ދީފައިވެއެވެ.
