ބޯޓުފަހަރު ބަނުމުގެ ޚިދުމަތް ފެށުމަށް ރާވާފައިވާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނެފިއެވެ.
މިކަން އިޢުލާނު ކުރެއްވީ އެމްޓީސީސީގެ އަހަރީ އާންމު ޖަލްސާ (އޭޖީއެމް) ގައި އެކުންފުނީގެ ސީއީއޯ އަދި މެނޭޖިންގ ޑިރެކްޓަރ އަބްދުﷲ ޒިޔާދުއެވެ.
އޭޖީއެމްގައި ހިއްސާދާރުންގެ ސުވާލުތަކަށް ޖަވާބުދެއްވަމުން ޒިޔާދު ވިދާޅުވީ ކުންފުނިން ބޯޓުފަހަރު ބަނުމުގެ ޚިދުމަތް ފޯރުކޮށްދިނުމަށް މަސައްކަތް ކުރަމުންދާ ކަމަށެވެ. އަދި، ކުންފުނީގެ ދެން އޮންނަ އޭޖީއެމް އަންނަންވާއިރަށް މި ޚިދުމަތް ފެށޭނެކަމަށް އުންމީދުކުރާކަމަށެވެ. ޒިޔާދު ވިދާޅުވީ އެމްޓީސީސީގެ ކުރީގެ މެނޭޖްމަންޓުން ކުންފުނީގެ ޙަރަކާތްތައް ފުޅާކުރުމަށް އަމާޒު ހިފާފައިވާ ކަމަށާއި، އައު މެނޭޖްމަންޓުންވެސް މި ލަނޑުދަނޑިތަކަށް ވާސިލުވުމަށް މަސައްކަތް ކުރަމުންދާ ކަމަށެވެ.
އެމްޓީސީސީއިން މިހާރުވެސް ތިލަފުށީގައި ބޯޓުޔާޑެއް ހިންގަމުންދެއެވެ. މިއީ ރާއްޖޭގައި ޑޮކިންގ ޚިދުމަތް ދޭ އެންމެ ބޮޑު އެއް ބޯޓުޔާޑެވެ. މި ފެސިލިޓީގައި އެކިބޮޑުމިނުގެ 20 އުޅަނދު އެއްފަހަރާ ޑޮކް ކުރެވޭނެއެވެ. އަދި މެރިން މެކޭނިކަލް މަސައްކަތްތަކާއި، ފެނުއަޑީގެ ވެލްޑިންގ، އަދި އެކި ބާވަތުގެ ޑޮކިންގ އަދި ހޭންޑްލިންގ ޚިދުމަތްތައް ފޯރުކޮށްދެއެވެ.
