އަސްކަރީ ގޮތުން އިޒްރޭލާ ކުރިމަތިލައިފިނަމަ، އެމެރިކާއިން އިރާގުގެ ކުރީގެ ރައީސް ސައްދާމް ހުސައިނަށް ހެދިގޮތް ހަދާނަކަމަށް ބުނެ ސަހްޔޫނީ އިޒްރޭލުން ތުރުކީގެ ރައީސް ރަޖަބް ތައްޔިބް އުރުދުޣާނަށް އިންޒާރު ދީފިއެވެ.
އިޒްރޭލުގެ އިންޒާރު އައިސްފައި މިވަނީ، ފަލަސްތީނުގެ ރައްޔިތުންގެ ދިފާއުގައި އަސްކަރީ ގޮތުން ތުރުކީ ސިފައިން އިޒްރޭލަށް ފޮނުވަން ޖެހިދާނެ ކަމަށް އުރުދުޣާން ވިދާޅުވިތާ ސައްވީސް ގަޑިއިރުވެސް ނުވެ އުޅެނިކޮށެވެ.
އުރުދުޣާނަށް ރައްދުދީ އިޒްރޭލުގެ ފޮރިންމިނިސްޓަރ އިޒްރާއީލް ކާޓްޒް ބުނީ އުރުދުޣާން ދަތުރު ކުރުމުން ދަނީ ސައްދާމް ހުސައިން ހިނގި މަގުން ކަމަށެވެ. "ތުރުކީގެ ރައީސް {ރައީސް އުރުދުޣާން) މިވަނީ އިޒްރޭލަށް އަރަން ޖެހިދާނެކަމަށް އިންޒާރު ދީފައި. މިއީ ވަރަށް ނުރައްކާތެރި ވާހަކައެއް. އުރުދުޣާން ދަތުރު ކުރަމުން އެދަނީ ސައްދާމް ހުސައިން ހިނގި މަގުން. އުރުދުޣާން ހަނދާން ކުރަން އެބަޖެހޭ އިޒްރޭލާ ދެކޮޅަށް ހަމަލާދީ، އިޒްރޭލާ ދެކޮޅުވެރިވެ އުޅުމުން ސައްދާމް ހުސައިނަށް ކަންތައް ވެގެންދިޔަ ގޮތް. އަހަރެން ގޮވާލަން ނޭޓޯއަށް އެޖަމާއަތުގެ މެމްބަރުކަމުން ތުރުކީ ވަކިކުރުމަށްވެސް" އުރުދުޣާނަށް ރައްދު ދެމުން އިޒްރޭލުގެ ހައްދުފަހަނައެޅި ފޮރިން މިނިސްޓްރ
ކާޓްޒް ބުންޏެވެ.
2003 ވަނަ އަހަރު އެމެރިކާ އާއި އިނގިރޭސިން އިސްވެ އޮވެ އުފެއްދި އަސްކަރީ ކޯލިޝަނަކުން އިރާގަށް އަރައިގަނެ ދެމަސް ދުވަހަށް ދެމިގެންދިޔަ ހަނގުރާމައަކަށްފަހު އެމެރިކާއިން އިރާގު ހިފިއެވެ. އަދި އޭގެ އަހަރެއްހައި ދުވަސްފަހުން އެމެރިކާގެ ބާރު އޮތް އިރާގުގެ ކޯޓަކުން ރައީސް ސައްދާމް ހުސައިން ދަންޖައްސައި އަވަހާރަ ކޮށްލީއެވެ.
