ފަލަސްތީނުގެ މިނިވަންކަމަށްޓަކައި ޖިހާދު ކުރަމުން އަންނަ ހަމާސް ޖަމާއަތުގެ ސިޔާސީ ގޮފީގެ ވެރިޔާ ޑޮކްޓަރ އިސްމާއިލް ހަނިއްޔާ މިދިޔަ ބުދަ ދުވަހު އިރާނުގައި ހުންނެވި ހޮޓަލުގައި އަވާހަރަކޮށްލީ މީގެ 2 މަސް ދުވަސް ކުރިން އެހޮޓަލަށް ވެއްދި ރިމޯޓް ކޮންޓްރޯލް ބޮމެއް ބޭނުން ކޮށްގެން ކަމަށް އެމެެެރިކާގެ ނިއުޔޯކް ޓައިމްސްއިން ބުނެފިއެވެ.
އިރާނުގެ އިންތިހާބީ ރައީސް ހުވާކުރެއްވުމުގެ ރަސްމިއްޔާތަށް ވަޑައިގެން ހަނިއްޔާ މަޑުކުރެއްވީ އިރާނުގެ ވެރިރަށް ތެހެރާނުގެ އުތުރުގައި ރިވޮލިއުޝަނަރީ ގާޑުން ބަލަހައްޓަމުންް ގެންދާ ސަލާމަތީ ގޮތުން ވަރަށް ވަރުގަދަ ހޮޓަލެއްގައެވެ. މިއީ އިރާނަށް ވަޑައިގަންނަވާ މަތީފަންތީގެ ބޭފުޅުން ވަރަށް ގިނައިން މަޑުކުރައްވާ ހޮޓަލެކެވެ. ހަނިއްޔާވެސް އިރާނަށް ކުރައްވާ ހުރިހާ ދަތުރުފުޅެއްގައި ކަހަލަ ގޮތަކަށް މަޑުކުރައްވަނީ މިހޮޓަލުގައި ކަމަށްވެއެވެ.
އެމެރިކާގެ އިންޓެލެޖެންސް ބައެއް އޮފިސަަރުންނާ ހަވާލާދީ ނިއުޔޯކްޓައިމްސްއިން ބުނީ މިހަމަލާގެ މައުލޫމާތު އިޒްރޭލުން މިހާރު އެމެރިކާ އާއި ޔޫރަޕުގެ ނުފޫޒުގަދަ ގައުމުތަކަށް ފޯރުކޮށްދީފައިވާ ކަމަށެވެ. އެކަމަކު އިޒްރޭލުގެ ޖާސޫސީ އިދާރާ މޮސާޑުން ހަނިއްޔާއަށް ގިނަދުވަސްތަކެއް ވަންދެން ފާރަލައި އެމިނިކުފާނުގެ ފުރާނަފުޅު ދުއްވާލުމަށް މިހޮޓަލަށް ބޮން ވެއްދި ގޮތާމެދު މިހާރު ވަނީ ގިނަ ސުވާލުތަކެއް އުފެދިފައެވެ. އަދި މިހަމަލާގެ ސަބަބުން އިޒްރޭލުގެ ޖާސޫސީ އިދާރާ، އިރާނުގެ ރިވޮލިއުޝަނަރީ ގާޑުގެ ތެރެއަށް ފޭދިގެން ގޮސްފައިވަނީ ކިިހާވަރަކަށްތޯވެސް ވަނީ ސުވާލު އުފެދިފައެވެ.
ސަހްޔޫނީ އިޒްރޭލުން ގެންދަނީ ހަމާސްޖަމާއަތުގެ އިސް އޮފިޝަލުން ޝަހީދު ކޮށްލުމަށް ރެޔާއި ދުވާލު މަސައްކަތް ކުރަމުންނެވެ. މިގޮތުން ބައެއް ހާދިސާތަކުގައި އޮފިޝަލުން އަވާރަކޮށްލުމަށް ފަރިއްކުޅުވާތަކެއްޗަށް ޒަހަރުލާފައިވެސް އެބަހުއްޓެވެ. މިގޮތުން ހަމާސްގެ އިސް އޮފިޝަލެއް ކަމުގައިވާ ޚާލިދު މިޝާލް އަވަހާރަކޮށްލުމަށް 1997 ވަނަ އަހަރު އިޒްރޭލުގެ ޖާސޫސީ އިދާރާއިން އެމަނިކުފާނު ފަރިއްކުޅުވާތަކެއްޗަށް ޒަހަރުލިިއެވެ. އެކަމަކު އެހާދިސާއިން މިޝާލް ސަލާމަތް ވެވަޑައިގަތެވެ.
އިރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ ވިދާޅުވީ، އިރާނުގެ ދައުވަތަކަށް ވަޑައިގެން ހުންނެވި މެހްމާނެއްގެ ފުރާނަފުޅު އެގައުމުގައި ހުންނަވަނިކޮށް ގެއްލުވާލަން ހަމަލާދިނުމަކީ އޭގެ ބަދަލު ނުހިފައި ދޫކޮށްނުލާނެ ކަމެއް ކަމަށެވެ. ހަނިއްޔާ އަވަހާރަކޮށްލި ހަމަލާއާ ގުޅިގެން ޚާމަނާއީ ވަނީ އިޒްރޭލަށް ހަމަލާ ދިނުމަށް އެގައުމުގެ އަސްކަރިއްޔާއިން އަމުރު ކުރައްވާފައެވެ.
