ހަމާސް ޖަމާއަތުގެ ސިޔާސީ ގޮފީގެ ލީޑަރު އިސްމާއިލް ހަނިއްޔާ މިދިޔަ ބުދަ ދުވަހުގެ ރޭ އިރާނުގައި ޝަހީދު ކޮށްލީ އެމަނިކުފާނު ހުންނެވި ހޮޓަލާ ދާދި ކައިރިން ފޮނުވާލި "ޝޯޓް ޕްރޮޖެކްޓައިލް" އަކުން ކަމަށް އިރާނުގެ ރިވޮލިއުޝަނަރަރީ ގާޑުން ބުނެފިއެވެ.
އިރާނުގެ އިންތިހާބީ ރައީސް ހުވާ ކުރެއްވުމުގެ ރަސްމިޔާތަށް ވަޑައިގެން ހަނިއްޔާ މަޑުކުރެއްވީ ވެރިރަށް ތެހެރާނުގެ އުތުރުގައި އިރާނުގެ ރިވޮލިއުޝަނަރީ ގާޑުން ވަރަށް ވަރުގަދައަށް ސަލާމަތީ ކަންކަން ބަލަހައްޓާ ހޮޓަލެއްގައެވެ.
"ހަނިއްޔާ އަވަހާރަ ކޮށްލާފައި ވަނީ ގާތްގަނޑަކަށް 7 ކިލޯ [15.4 ޕައުންޑް] ގެ ގޮވާތަކެތި ހުރި ކުރު ރާސްތާ ޕްރޮޖެކްޓައިލެއް ޖަހައި ހޮޓަލުގެ ބޭރުން ފޮނުވާލި ހަމަލާއަކުން" ހާދިސާ ތަހްގީގު ކުރުމަށްފަހު އިރާނުގެ ރިވޮލިއުޝަނަރީ ގާޑުން ނެރެފައިވާ ބަޔާނުގައިވެއެވެ.
މިހާދިސާއާ ގުޅިގެން އިރާނުގެ ރިވޮލިއުޝަނަރަރީ ގާޑުގެ 2 އޮފިޝަލަކު ހައްޔަރު ކޮށްފައިވާ ކަމަށް ބައެއް ރިޕޯޓްތައް ބުނެއެވެ. އެކަމަކު މިކަން އިރާނުން އަދި މިހާތަނަށް ކަށަވަރު ކޮށްދީފައެއް ނުވެއެވެ.
މިބަޔާނުގައި އިތުރަށް ބުނެފައި ވަނީ އިޒްރޭލުން ހަނިއްޔާ ޝަހީދު ކޮށްލާފައި ވަނީ އެމެރިކާގެ ބައިވެރިވުން ހިމެނޭ ގޮތަށް ކަމަށެވެ. އެކަމަކު މިހާދިސާ ހިނގިތާ މަދުވަގުތުކޮޅެއް ތެރޭ އެމެރިކާއިން ބުނެފައި ވަނީ ހަނިއްޔާ ޝަހީދުކޮށްލަން އުޅޭ ކަމުގެ އެއްވެސް މައުލޫމާތެއް އިންޓަލެޖެންސަށް ލިބިފައި ނުވާ ކަމަށެވެ. ހަނިޔާގެ މަރާ ގުޅިގެން މިހާތަނަށް ޔަހޫދީ އިޒްރޭލުން އެއްވެސް ވާހަކައެއް ދައްކާފައެއް ނުވެއެވެ.
