ބަންގްލަދޭޝްގައި ހަމަނުޖެހުންތައް އިތުރަށް ހޫނުވެ، މަދުވެގެން 91 މީހުން މަރުވެއްޖެއެވެ.
އޭގެ ތެރޭގައި 13 ފުލުހުން ހިމެނެއެވެ. އަދި އެތައް ބަޔަކަށް ޒަހަމްވެފައިވެސްވެއެވެ.
ބޮޑު ވަޒީރު ޝޭޚް ހަސީނާ އިސްތިއުފާ ދިނުމަށް ގޮވާލައި ކުރެވުނު މުޒާހަރާތައް އިތުރުވެ، ފުލުހުން ކަރުނަ ގޭހާއި ސްޓަން ގްރެނޭޑްވެސް ބޭނުންކޮށްފައިވެއެވެ. ޑާކާ، ބޮގުރާ އަދި ރަންގްޕޫރު ހިމެނޭ ގޮތަށް އެކި ސަރަޙައްދުތަކުން މަރުގެ ޚަބަރު ދަނީ ލިބެމުންނެވެ.
ޖުލައި މަހު ސަރުކާރުގެ ވަޒީފާތަކުގެ ކޯޓާ ނިޒާމަކަށް ދަރިވަރުން އިހުތިޖާޖު ކުރުމާއެކު ފެށުނު މި ހަމަނުޖެހުން މިހާރު ވަނީ އިތުރަށް ގޯސްވެފައެވެ. ބޮޑު ވަޒީރު ހަސީނާ ވަނީ މުޒާހަރާކުރާ މީހުން ކުށްވެރި ޢަމަލުތަކެއް ހިންގަމުންދާ ކަމަށް ވިދާޅުވެފައެެވެ. އަދި ސަރުކާރުން ވަނީ އިންޓަނެޓް ބްލެކްއައުޓެއް އަދި "ޝޫޓް އޮން ސައިޓް" ކަރްފިއުއެއް ތަންފީޒުކޮށްފައެވެ. 11،000 އަށްވުރެ ގިނަ މީހުން ވަނީ ހައްޔަރުކުރެވިފައެވެ.
ނުރައްކާތެރި މުޒާހަރާތައް ފެށުނީ ފާއިތުވި ޖުލައި މަހު، ސަރުކާރުގެ ވަޒީފާތަކުގެ 30 އިންސައްތަ 1971 ގައި ޕާކިސްތާނާ ދެކޮޅަށް ބަނގްލަދޭޝްގެ މިނިވަންކަމަށް ހަނގުރާމަ ކުރި ވެޓެރަނުންގެ އާއިލާތަކަށް ޚާއްޞަކުރެވިފައިވާ ކޯޓާ ނިޒާމު ނިމުމަކަށް ގެނައުމަށް ދަރިވަރުން ގޮވާލުމާއެކީއެވެ.
އަނިޔާވެރިކަން އިތުރުވަމުން ދިޔުމާއެކު، އެ ޤައުމުގެ ސުޕްރީމް ކޯޓުން ކޯޓާ ނިޒާމު 5 އިންސައްތައަށް ކުޑަކޮށް، އޭގެ ތެރެއިން 3 އިންސައްތަ ވެޓެރަނުންގެ ގާތްތިމާގެ މީހުންނަށް ކަނޑައެޅިއެވެ. ނަމަވެސް، މުޒާހަރާތައް ދަނީ ކުރިއަށެވެ. މުޒާހަރާކުރާ ފަރާތްތަކުން ބުނާ ގޮތުގައި ސަރުކާރުން ބޭނުންކުރި ހައްދުފަހަނައަޅާފައިވާ ބާރުގެ ސަބަބުން ހިނގި އަނިޔާވެރިކަމަށް ޖަވާބުދާރީވުމަށާއި، ގެއްލުނު 200 އެއްހާ ފުރާނައަށް އިންސާފު ހޯދުމަށް އެދެއެވެ.
އޮޕޮޒިޝަން ބަނގްލަދޭޝް ނެޝަނަލިސްޓް ޕާޓީ (ބީއެންޕީ) ގެ އެހީތެރިކަމާއެކު މުޒާހަރާކުރާ ފަރާތްތަކުން ބުނަނީ ހަސީނާ އިސްތިއުފާ ދެއްވަންދެން މުޒާހަރާ ކުރިއަށް ގެންދާނެ ކަމަށެވެ. ސަރުކާރުން ވަނީ ޤައުމީ ބަންދެއް އިއުލާނުކޮށް، ތަޢުލީމީ މުއައްސަސާތައް ވަކި މުއްދަތެއް ނެތްގޮތަށް ބަންދުކޮށްފައެވެ.
ފާޑުކިޔާ ފަރާތްތަކުން ބުނާ ގޮތުގައި ހަސީނާގެ ސަރުކާރުން ދަނީ ދެކޮޅުވެރިކަން މަނާކުރުމަށް ބާރު ބޭނުންކުރަމުންނެވެ.
