އަރަބް ނިއުސް:- ހަމާސް ޖަމާއަތުގެ ލީޑަރ އިސްމާއިލް ހަނިއްޔާ، އިރާނުގައި އަވަހާރުކޮށްލި ކޮށްލުމުގެ ބަދަލު ޒަޔަނިސްޓް އިޒްރޭލުގެ ކިބައިން ވޭންދެނެވި ގޮތަކަށް ހިފާނެ ކަމަށް ބުނެ މިދިޔަ ބުރާސްފަތި ދުވަހުން ފެށިގެން އިރާނުން ދެމުން އައި އިންޒާރުތަކުގެ ރާގު މަޑުމަޑުން ބަދަލުވާން ފަށައިފިއެވެ.
ހަނިއްޔާ އަވަހާރަކޮށްލި ކޮށްލުމުގެ ބަދަލު ނުހިފައި ދޫކޮށް ނުލާނެކަމަށް ބުނަމުންދިޔަ އިރާނުގެ ފޮރިން މިނިސްޓްރީގެ ތަރުޖަމާނު ކަނާނީ މިއަދު މީޑިޔާތަކަށް ދެއްވި ބަސްދީގަތުމެއްގައި ވިދާޅުވީ އިރާނުން ކަނޑައެޅިފައިވާ ވަގުތެއްގައި އިޒްރޭލަށް ހަމަލާދޭނެ ކަމަށެވެ. އެކަމަކު މުޅި ސަރަހައްދަށް ފެތުރިގެންދާ ހަނގުރާމައަކަށް އިރާނުން ވަންނަން ބޭނުން ނުވާކަމަށް ކަނާނީ ވިދާޅުވިއެވެ.
"ޒަޔަނިސްޓުންނަށް އަދަބު ލިބެންޖެހޭނެ. އިރާނުން ޒަޔަނިސްޓުންނަށް އަދަބު ދޭނެ. އަހަރެން އެމެރިކާއަށާއި އެމެރިކާގެ ބައިވެރިންނަށް ގޮވާލަން އިޒްރޭލަށް ތާއިދު ކުރުން ހުއްޓާލުމަށް. އިޒްރޭލަށް ތާއީދު ކުރުމަކީ އުދުވާނީ، ހައްދުފަނައެޅި ބައިގަނޑަށް ތާއީދު ކުރުން. އިރާނުން ގަބޫލް ކުރަނީ މެދުއިރުމަތީގެ ހަމަޖެހުމާއި ސުލްހަ މަސަލަސްކަމަށްޓަކައި އެމެރިކާއިން އިޒްރޭލަށް ތާއީދު ކުރުން ހުއްޓާލަން ޖެހޭ ކަމަށް" ކަނާނީ ވިދާޅުވިއެވެ.
އިޒްރޭލަށް ހަމަލާދޭނެ ކަމަށް ވަރަށް ވަރުގަދައަށް އިރާނުން އިންޒާރު ދިނެވެ. މިއާއި ގުޅިގެން އެމެރިކާ އާއި އިނގިރޭސިވިލާތް އަދި ފްރާންސްގެ އަސްކަރިއްޔާ، އިޒްރޭލު ދިފާއު ކުރުމަށް ތައްޔާރީ ހާލަތަކަށް ގެނެސްފައިވާކަން ފާހަގަ ކޮށްލެވެއެވެ.
ފަލަސްތީނާއި މަސްޖިދުލް އަގްސާގެ މިނިވަންކަމަށްޓަކައި މުޅި ހަޔާތް ޤުރުބާން ކުރި ހަނިއްޔާ އިޒްރޭލުން ޝަހީދުކޮށްލީ މިދިޔަ ބުދަ ދުވަހު، އިރާނުގައި އެމަނިކުފާނު ހުންނެވި ހޮޓަލަށް ކުރު ރާސްތާ މިސައިލަކުން ދިން ހަމަލާއެއްގައެވެ. ހަނިއްޔާ ފަސްތާނު ލާފައިވަނީ މިދިޔަ ހުކުރު ދުވަހު ޤަތަރުގައެވެ.
