ހަމާސް ޖަމާއަތުގެ ސިޔާސީ ލީޑަރު ޑޮކްޓަރ އިސްމާއިލް ހަނިއްޔާ އަވަހާރަކޮށްލުމުގެ ބަދަލު ޒަޔަނިސްޓް އިޒްރޭލު ކިބައިން ހިފާނެކަމަށް ތަކުރާރުކޮށް އިންޒާރު ދެމުން އަންނަ އިރާނުން އެގައުމުގެ މުހިއްމު ސަރަހައްދުތަކުގައި މިސައިލުން ދިފާއުވާ ނިޒާމު ރުކުރާލަން މިއަދު ފަށައިފިއެވެ.
އިރާނުގެ އުތުރުރާއި ދެކުނުގައި މިސައިލުން ދިފާއުވާ ނިޒާމުތައް ރުކުރުވާލާ މަންޒަރު ފެންނަ ބައެއް ފޮޓޯތައް މިއަދު އަލްޖަޒީރާއިން ވަނީ ބްރޮޑްކާސްޓް ކޮށްފައެވެ. އެމެރިކާއިން ތުހުމަތު ކުރާ ގޮތުގައި އިރާނުން ވަނީ ރަޝިޔާއިން ދިފާއީ އައްޑަނަތައް ހޯދާފައެވެ. މިކަން އިރާނުންވެސް އަދި ރަޝިޔާއިންވެސް ދޮގު ކޮށްފައެއް ނުވެއެވެ.
އިރާނާއި މެދުއިރުމަތީގެ މަސްރަހް ދިރާސާ ކުރައްވާ މުހައްލިލުން ވިދާޅުވާ ގޮތުގައި އިޒްރޭލަށް ހަމަލާދިނުން އިރާނުން މަޑުޖައްސާލައިގެން އުޅެނީ އިރާނުންދޭ ހަމަލާއާ ގުޅިގެން އިޒްރޭލުގެ ދިފާއުގައި އެމެރިކާ އާއި އެގައުމުގެ ބައިވެރިން އިރާނަށް ދީފާނެކަމަށް ޔަގީން ކުރެވޭ ހަމަލާއަކުން ދިފާއުވުމަށް އަޅަންޖެހޭ ފިޔަވަޅުތައް އެޅުމަށްޓަކައެވެ.
މުހައްލިލުން ވިދާޅުވާ ގޮތުގައި އިރާނުންދޭ ވައިގެ ހަމަލާއެއް އިޒްރޭލުގެ ދިފާއީ އައްޑަނަ "އަޔަންޑޯމް" ތަކަށް މައިތިރިއެއް ނުކުރެވޭނެއެވެ. ހެއްކެތް ގޮތުގައި ދައްކަނީ މިދިޔަ އޭޕްރީލް މަހު އިރާނުން ޑްރޯނާއި މިސައިލު ބޭނުންކޮށްގެން އިޒްރޭލަށް ދިން ހަމަލާގައި އިރާނުން ފޮނުވާލި ބާރުގަދަ، އެކަމަކު މަދު މިސައިލްތައް އަޔަންޑޯމްތަކަށް މަތަ ނުކުރެވި އަމާޒަށް ވާސިލުވެފައިވާ ކަމެވެ.
އިރާނުން އިޒްރޭލަށް ދީފާނެ ވަރުގަދަ ހަމަލާއަކަށް މުޅި ދުނިޔޭގެ ކަޅި ހުއްޓިފައިވާއިރު، ގިނަ އެއަރލައިންތަކުން ވަނީ އިޒްރޭލަށް ދަތުރުކުރުންވެސް ހުއްޓާލާފައެވެ.
