ޔަމަނުގެ ތާއިޒް ސިޓީގައި ޤުރުޢާން ހިތުދަސްކޮށް ހާފިޒްކަމުގެ ސަނަދު ހޯދި 721 ކުދިންގެ ބެޗަކަށް، "ޝަހީދު އިސްމާއިލް ހަނިއްޔާގެ ބެޗް" ގެ ނަމުން ނަން ދީފިއެވެ.
ޔަމަނުގެ "ޝަބާބު" ނޫހުން ބުނެފައިވާ ގޮތުގައި ތާއިޒް ޔުނިވަރސިޓީގެ ހާފިޒުންގެ ދަސްވެނިވުން ބާއްވާފައި ވަނީ ހިތްގައިމު ބޮޑު ހަފްލާއަކާއެކު މިދިޔަ އާދިއްތަ ދުވަހުއެވެ. ހާފިޒު ކަމުގެ ސަނަދު ހޯދި މިބެޗުގައި ޑޮކްޓަރު ކަމާއި އިންޖިނިއަރިންގެ ދާއިރާއިން ކިޔަމުންދާ ކުދިންވެސް ހިމެނޭ ކަމަށް ޝަބާބު ނޫހުން ބުނެއެވެ.
ޝަހީދު އިސްމާއިލް ހަނިއްޔާގެ ބެޗުގެ ނަމުން ނަންދިނުމަކީ ލިބުނު ފަޚްރަކާއި ވަރަށް ބޮޑު ޝަރަފެއް ކަމުގައި މިހަފްލާގައި ވާހަކަ ދެއްކި ކުދިން އެކުދިންގެ ޝުޢޫރުތައް ފާޅުކުރަމުން ބުންޏެވެ.
މިއަދު އިރާނުންވެސް ވަނީ ވެރިރަށް ތެހެރާނުގެ ޔުނިވަރސިޓީ ހިންގަމުން އަންނަ އިމާރާތަށް "ހަނިއްޔާ ބިލްޑިންގ" ގެ ނަމުން ނަންދީފައިކަންވދެސް ފާހަގަ ކޮށްލެވެއެވެ.
އިސްމާއިލް ހަނިއްޔާއަކީ ފަލަސްތީނާއި މަސްޖިދުލް އަޤްސާގެ ދިފާއުގައި ޒަޔަނިސްޓް އިޒްރޭލާ ދެކޮޅަށް ޖިހާދު ކުރުމުގައި މުޅި ހަޔާތް ހޭދަކުރެއްވި ވަރަށް ހިތްވަރުގަދަ ސިޔާސީ ލީޑަރެކެވެ. އެމަނިކުފާނު ޝަހީދުކޮށްލީ މިދިޔަ ބުދަ ދުވަހު އިރާނުގައި ހުންނަވަނިކޮށެވެ. ހަމަލާދިން ކަމަށް ތުހުމަތު ކުރެވެނީ ޒަޔަނިސް އިޒްރޭލަށެވެ.
