ދުބާއީ އިންޓަނޭޝަނަލް އެއަރޕޯޓް (ޑީއެކްސްބީ) އިން 2027 ވަނަ އަހަރާ ހަމައަށް 100 މިލިއަން ފަސިންޖަރުންގެ އަދަދަށް ފޯރާނެކަމަށް ދުބާއީ އެއަރޕޯޓްސްގެ ސީއީއޯ ޕޯލް ގްރިފިތްސް ޔަޤީންކަމާއެކު ލަފާކުރައްވައިފިއެވެ.
މި ލަފާކުރެއްވުން އައިސްފައިމިވަނީ ދުނިޔޭގެ ވައިގެ ދަތުރުފަތުރުގެ ސިނާއަތުން މަތިންދާބޯޓުގެ ސަޕްލައި ޗެއިންގެ މައްސަލަތައް ހައްލުކުރަމުންދާއިރުއެވެ. 2026 ވަނަ އަހަރު ނިމުމުގެ ކުރިން މި މައްސަލަތައް ހައްލުވާނެކަމަށް ލަފާކުރެވެއެވެ.
ގްރިފިތްސް ވިދާޅުވީ ކުރިއަށް އޮތް އަހަރުތަކުގައި ކުރިއެރުން އަންނާނީ މަޑުމަޑުންކަމަށެވެ. އެއީ މައިގަނޑު މެނުފެކްޗަރަރުންކަމުގައިވާ އެއަރބަސް އަދި ބޯއިންގ އިން ސަޕްލައި ޗެއިންގެ ގޮންޖެހުންތަކާ ކުރިމަތިލަމުންދާތީ ޑެލިވަރީތައް ލަސްވަމުންދާތީއެވެ. މި ގޮންޖެހުންތަކާއެކުވެސް، ދުބާއީ އިންޓަނޭޝަނަލް އިން ވަނީ 2024 ވަނަ އަހަރުގެ ފުރަތަމަ ދެކުއާޓަރުގައި 44.9 މިލިއަން ފަސިންޖަރުންގެ ރެކޯޑު އަދަދެއް ރިޕޯޓުކޮށްފައެވެ. މިއީ އަހަރުން އަހަރަށް 8 އިންސައްތައިގެ އިތުރުވުމެކެވެ.
އުއްމީދީ ނަޒަރަކުން ބަލާއިރު، ޑީއެކްސްބީ އިން 2024 ވަނަ އަހަރު 91.8 މިލިއަން ފަސިންޖަރުން ހޭންޑްލްކުރުމަށް އަމާޒުކުރެއެވެ. މިއީ 2018 ވަނަ އަހަރު ކުރީގެ ރެކޯޑުކަމުގައިވާ 89.1 މިލިއަން ފަހަނައަޅައި ދިއުމެކެވެ. އިތުރުވަމުންދާ ޓްރެފިކް ބެލެހެއްޓުމަށްޓަކައި، ބައެއް އޮޕަރޭޝަންތައް ދުބާއީ ސައުތުގައި ހުންނަ ދުބާއީ ވޯލްޑް ސެންޓްރަލް (ޑީޑަބްލިއުސީ) އަށް ބަދަލުކުރުމުގެ ޕްލޭންތައްވެސް ދަނީ ކުރިއަށެވެ. މިގޮތުން އިތުރު 30 މިލިއަން ފަސިންޖަރުންގެ ޖާގަ ބޭނުންކުރެވޭނެކަމަށް ގްރިފިތްސް ވިދާޅުވިއެވެ.
މީގެ އިތުރުން، ޑީޑަބްލިއުސީގައި 35 ބިލިއަން ޑޮލަރުގެ ޕަސެންޖަރ ޓާމިނަލްއެއްގެ ތަފްސީލީ ކުރެހުންތައްވެސް ވަނީ ނިންމުމުގެ މަރުޙަލާގައެވެ. މި މަޝްރޫޢުގެ މަޤްޞަދަކީ ކަސްޓަމަރ ސަރވިސްއާއި ހިންގުމުގެ ހަރުދަނާކަން އިތުރުކުރުމެވެ. އަދި ޑީ.އެކްސް.ބީގައި ރިފާބިޝްކުރުމުގެ މަސައްކަތްތަކުގެ ތެރޭގައި ޓާމިނަލް 2 ފުޅާކުރުމާއި ޓާމިނަލް 1 ގެ އެރައިވަލްސް ޓާމިނަލް އަޕްޑޭޓްކުރުން ހިމެނެއެވެ. ދުބައި އެއަރޕޯޓްސްއިން އަންނަނީ އައު ޓެކްނޮލޮޖީތައްވެސް ތަޢާރަފުކުރަމުންނެވެ. މީގެ ތެރޭގައި ފަސިންޖަރުންގެ ޕްރޮސެސްތައް އަވަސްކުރުމަށްޓަކައި ޒަމާނީ ލަގެޖް ސްކްރީންކުރާ މެޝިންތައް ހިމެނެއެވެ.
ސަރަޙައްދުގެ ސިޔާސީ ގޮންޖެހުންތަކާ ކުރިމަތިލާންޖެހުނު ނަމަވެސް، އިންޑިއާ، ސަޢޫދީ ޢަރަބިއްޔާ އަދި ޔޫކޭ ފަދަ މުހިންމު މާކެޓްތަކުގެ ސަބަބުން ޑީ.އެކްސް.ބީގެ ޓްރެފިކް އިތުރުވަމުންދާކަން ފާހަގަކުރެވެއެވެ.
