ކުރީގެ ސަރުކާރުން ބިންވެރިޔާ ސްކީމްގެ ދަށުން ދޫކުރުމަށް ނިންމާފައިވާ ބިންތައް ހަވާލުކުރަން ފެށޭނެ ތާރީހެއް ދަންނަވަން ނޭނގޭ ކަމަށް ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވަޒީރު ޑރ. އަލީ ހައިދަރު އަޙްމަދު މިއަދު މަޖިލީހުގައި ވިދާޅުވެއްޖެއެވެ.
މިކަން ލަސްވަމުންދާ ސަބަބުތަކެއްގެ ގޮތުގައި ވަޒީރު ވަނީ ގިނަ ކަންތައްތަކެއް ފާހަގަކުރައްވާފައެވެ.
އެއް ސަބަބެއްގެ ގޮތުގައި ވަޒީރު ފާހަގަކުރެއްވީ ތިލަމާލެ ބްރިޖްގެ މަސައްކަތް ކުރިއަށްދާތީއެވެ. ގުޅީފަޅަކީ ތިލަމާލެ ބްރިޖު މަޝްރޫއަށް ބޭނުންކުރަމުންދާ ސައިޓެކެވެ. ގުޅީފަޅުގެ ބިން އަދި އެއްކޮށް ހިއްކާ ނުނިމޭކަމަށްވެސް ވަޒީރު ޙައިދަރު ވިދާޅުވިއެވެ.
ބްރިޖްގެ މަސައްކަތުގައި ދުއްވާ ބޮޑެތި އުޅަނދުތަކުގެ ސަބަބުން ކުރިން ބިންތައް ވަކިކުރުމަށް ޖަހާފައިވާ ކަންމުޑިތައް މުޅިން ހަލާކުވެފައިވާ ކަމަށްވެސް ވަޒީރު ފާހަގަކުރެއްވިއެވެ.
މި މަސައްކަތްތައް ނިމޭނީ އަންނަ އަހަރުގެ ސެޕްޓެމްބަރު މަހު ކަމަށް މަޢުލޫމާތު ލިބިފައިވާކަމަށް ވަޒީރު ވިދާޅުވިއެވެ.
މީގެ އިތުރުން، ވަޒީރު ވިދާޅުވީ ކުރީގެ ސަރުކާރުން ބިން ދޫކޮށްފައިވަނީ މީހުން ދިރިއުޅުމަށް އެކަށީގެންނުވާ ގޮތަކަށް ކަމަށެވެ.
މިކަމުގެ ސަބަބުން، މި ސަރުކާރުން ގުޅީފަޅަށް އަލުން ބިން ބޭނުންކުރާނެ ގޮތުގެ ޕްލޭނެއް އެކުލަވާލާފައިވާ ކަމަށާއި، ގުޅީފަޅު ރައްޔިތުންނާ ބައްދަލުކުރުމަށްފަހު މި ޕްލޭނަށްވެސް އިތުރު ބަދަލުތަކެއް ގެނެސްފައިވާ ކަމަށް އެމަނިކުފާނު ވިދާޅުވިއެވެ.
ވަޒީރު ޙައިދަރު ވިދާޅުވީ ގުޅީފަޅުގެ ބާކީ އޮތް ހިއްކުމުގެ މަސައްކަތް އެމްޓީސީސީއާ ޙަވާލުކުރުމަށް މަޝްވަރާކުރަމުންދާ ކަމަށެވެ. 85 ހެކްޓަރުގެ ބިން ހިއްކުމުން ގުޅީފަޅުން ބިން ދޫކުރެވޭނެކަމަށް ޙައިދަރު ވިދާޅުވިއެވެ.
ކުރީގެ ސަރުކާރުން ރާވާފައިވަނީ ގުޅިފަޅުގައި ބަނދަރެއް ހަދައި އެ މަޝްރޫޢުގެ ތެރެއިން ބިން ދޫކުރުމަށެވެ. އެހެންކަމުން، ދިރިއުޅުމަށް ކަނޑައަޅާފައިވަނީ ވަރަށް ކުޑަ ސަރަޙައްދެކެވެ. މިހާރުގެ ސަރުކާރުން ނިންމާފައިވަނީ ބަނދަރު ތިލަފުށީގައި ހެދުމަށާއި، ގުޅިފަޅުން އިތުރު ސަރަޙައްދެއް ހިއްކުމަށެވެ. މި އިތުރު ޖާގައިގައި ގިރާވަރުފަޅުން ގުޅީފަޅަށް ބިން ބަދަލުކުރަން ބޭނުންވާ ފަރާތްތަކަށް ބިން ދެވޭނެއެވެ.
