މާލެއަށް އިއްޔެ ބޯކޮށް ވާރޭވެހި ފެންބޮޑުވި ހާދިސާ ކޮންޓްރޯލް ކުރުމުގައި ކަމާ ގުޅޭ އިދާރާތަކާއި ގުޅިގެން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ (އެމްޓީސީސީ)ގެ މުވައްޒަފުން އިއްޔެ ތަފާތު ހިތްވަރެއް ދައްކައިފިއެވެ.
އެމްޓީސީސީގެ ފަޔަރ ސޭފްޓީ ޓީމުން ވަނީ ފެންބޮޑުވުން ކުޑަކުރުމަށް ގިނަ އަދަދެއްގެ ފެން ޕަންޕުކޮށް، އަދި ފެންވަނަ ގެތަކަށް ފެން ވަނުން ހުއްޓުވުމަށް ވެލިގޯނި ޖެހުމުގައި ވަރަށް ބޮޑު އެހީތެރިކަމެއް ފޯރުކޮށްދީފައެވެ.
އެމްޓީސީސީގެ ޓީމުން ވިދާޅުވީ ނެޝަނަލް ޑިޒާސްޓަރ ސެންޓަރ (އެންޑީއެމްއޭ) އިން އެދިވަޑައިގަންނަވާ އިތުރު އެހެން މަސައްކަތްތަކުގައިވެސް އެހީތެރިވުމަށް ތައްޔާރަށް ތިބިކަމަށެވެ. އެމްޓީސީސީ ޓީމުން ވިދާޅުވީ އެކުންފުނިން ދައްކުވައިދެނީ "ރައްޔިތުންގެ ކުންފުނި" މި ޝިޢާރުންކަމަށެވެ. އަދި ޤައުމާއި ރައްޔިތުންނަށް ބޭނުންޖެހޭ ވަގުތުތަކުގައި އެހީތެރިވުމަށް ތިބޭނެކަމުގެ ޔަގީންކަން އެކުންފުނިން ދިނެވެ.
މުޅި ރާއްޖޭގައި މޫސުން ގޯސްވެފައިވާ މި ދަނޑިވަޅުގައި، މޫސުމާބެހޭ ޤައުމީ އިދާރާއާއިން ވަނީ އާންމު ރައްޔިތުންނަށް މޫސުމަށް ޚާއްޞަ ސަމާލުކަމެއް ދިނުމަށް އިލްތިމާސްކޮށްފައެވެ. ޚާއްޞަކޮށް ކަނޑުދަތުރުފަތުރުކުރާ ފަރާތްތަކުން މިކަމަށް ސަމާލުވެ ރައްކާތެރިކަމުގެ ފިޔަވަޅުތައް އެޅުމަށާއި ސަލާމަތީ ކަންކަމަށް އިސްކަންދިނުމަށް އެ އިދާރާއިން ވަނީ އިރުޝާދު ދެއްވާފައެވެ.
