ގޭގައި ތިބެގެން މަސައްކަތްކުރުން ނުވަތަ ރިމޯޓުން މަސައްކަތް ކުރުމަކީ ޒަމާނީ ތަރައްޤީއާއި އެކު ދިރިއުޅުމުގެ ވަށްޓަފާޅިއަށް އަންނަމުންދާ ހެޔޮބަދަލުތަކުގެތެރެއިން މިހާރު ވަރަށް ބޮޑަށް މަގުބޫލުވަމުންދާ އެއްކަމެކެވެ. މަސައްކަތުގެ ވަގުތު އަމިއްލައަށް ރޭވުމާއި، އުފެއްދުންތެރިކަން އިތުރުވުމާއި، ދުޅަހެޔޮ ދިރިއުޅުމަކަށް މަގުފަހިވުން ފަދަ ހެޔޮ ބަދަލުތައް ދަނީ އަންނަމުންނެވެ.
ހެނދުނު އޮފީހަށް ގޮސް، ރޭގަނޑު ނުވަތަ ހަވީރު ގެއަށް އައުމުގެ ޒަމާންވީ ސަގާފަތްތަކަށް ބަދަލުއައިސް، ގޭގައި ތިބެގެން މަސައްކަތް ކުރުމުގެ މުހިންމުކަމާއި އޭގެ ފައިދާ މުޅިދުނިޔެވެސް ވަނީ ބަލައިގެންފައެވެ. އަދި ތަރައްގީ ވެފައިވާ ގިނަ ގައުމުތަކުގައިވެސް ދަނީ އެތަނެއްގައި ހަމަޖެހިފައި އޮންނަ އުސޫލްތަކާއި ގަވާޢިދު ތަކާއި އެއްގޮތް ވާ ގޮތުގެ މަތީން ކޮންމެ ހަފްތާއަކުވެސް ހަމަޖެހިފައި އޮންނަ ދުވަސްތަކުގައި، ގޭގައި ތިބެގެން މަސައްކަތް ކުރަމުންނެވެ. ގޭގައި ތިބެގެން މަސައްކަތް ކުރުމުގެ ފައިދާއާއި މުހިއްމުކަމުގެ ތެރޭގައި 10 ކަމެއް ފާހަގަ ކޮށްލަމެވެ.
1 . ދަތުރުފަތުރު ކުރަން ނުޖެހުން
ގޭގައި މަސައްކަތްކުރުމުން ހެނދުނާއި ހަވީރު ކުރަންޖެހޭ ދަތުރުތައް ކުރާކަށް ނުޖެހޭނެއެވެ. މިއީ ހަމައެކަނި ވަގުތު ސަލާމަތްވުމެއް ނޫނެވެ. ދަތުރުފަތުރާ ގުޅޭ ހުރިހާ ޚަރަދެއް، އެއީ ތެލުގެ ޚަރަދު ކަމުގައިވިޔަސް، އާންމު ދަތުރުފަތުރުގެ ޚަރަދު ކަމުގައިވިޔަސް، ނުވަތަ އުޅަނދު ބޭނުންކުރުމުގެ ސަބަބުން ލިބޭ ގެއްލުން ކަމުގައިވިޔަސް އެކަން ކުޑަވެގެންދާނެއެވެ. އެމެރިކާގެ އާންމު މީހަކު ދުވާލަކު އެވްރެޖްކޮށް 1 ގަޑިއިރު ދަތުރުފަތުރުގައި ހޭދަކުރާކަން އެނގިވަޑައިގަންނަވާތޯއެވެ؟ ދަތުރުފަތުރު ކުރަން ނުޖެހުމުން މަހަކު 25 ގަޑިއިރު އިތުރަށް ލިބި، އެ ވަގުތު އުފާވާ ކަންކަމުގައި ހޭދަކުރެވޭނެއެވެ.
2 . އިތުރު ލުއިފަސޭހަކަން
ގޭގައި މަސައްކަތްކުރުމުން ވަގުތުތައް ބޭނުންކުރުމުގައި އިތުރު ލުއިފަސޭހަކަން ލިބިގެންދެއެވެ.
ހެނދުނު 10 ޖަހާއިރު ޑޮކްޓަރަށް ދައްކަން ޖެހޭތަ؟ ހަވީރު 3 ޖަހާއިރު ކުދިން ސްކޫލުން ގެންނަން ޖެހޭތަ؟ ގޭގައި މަސައްކަތްކުރާއިރު އާންމު ގޮތެއްގައި ބޭނުންވާ ގޮތަކަށް ވަގުތު ރޭވިދާނެއެވެ. މިއީ މަސައްކަތާއި އަމިއްލަ ދިރިއުޅުމާ ދެމެދު ރަނގަޅު ވަޒަނެއް ހިފެހެއްޓުމަށް ވަރަށް ބޮޑު އެހީއަކަށް ވެގެންދާނެ ކަމެކެވެ. ޑޭޓާ އެނޮޓޭޝަންގައި، ހެނދުނު ނުވަތަ ރޭގަނޑު ލޮގިންވެވިދާނެއެވެ. އެމީހަކަށް އެންމެ ފަސޭހަ ގަޑިއެއްގައެވެ!
3. އުފެއްދުންތެރިކަން އިތުރުވުން
ގިނަ ބަޔަކު ޤަބޫލުކުރާ ގޮތާ ޚިލާފަށް، ގޭގައި މަސައްކަތްކުރުމުން އުފެއްދުންތެރިކަން އިތުރުވެގެންދެއެވެ. މިއީ ސަމާލުކަން ގެއްލޭ ކަންކަން މަދުވުމާއި، އޮފީހުގެ ސިޔާސީ ކަންކަން މަދުވުމާއި، މަޑުމައިތިރި މާޙައުލެއް އޮތުމާއި، އަދި ފަސޭހަ ވެށްޓެއް އޮތުމުގެ ސަބަބުންނެވެ. މަސައްކަތުގައި އަވަދިނެތި އުޅެނިކޮށް އެހެން މުވައްޒަފަކު އައިސް ވީކެންޑުގައި ކުރި ކަންތައްތަކުގެ ވާހަކަ ދައްކަން ފަށައިފިތަ؟ ނުވަތަ ކޮފީ މެޝިން ކައިރީގައި މަޑުކޮށްގެން ތިބޭ މުވައްޒަފުން ގަދައަށް ވާހަކަދައްކަމުންދާތަ؟ މިފަދަ ހުއްޓުމެއް ނެތި މަސައްކަތް ކުރިއަށް ގެންދެވޭނަމަ ކިހާ އުފެއްދުންތެރިކަމެއް އިތުރުވާނެ ކަމެއްތޯ ވިސްނާލާށެވެ.
4 . މަސައްކަތާއި އަމިއްލަ ދިރިއުޅުމާ ދެމެދު ރަނގަޅު ބެލެންސެއް ގެނައުން
މަސައްކަތަށް ދަތުރުކުރުމަށް ގަޑިއިރުތަކެއް ހޭދަކުރަން ނުޖެހުމާއި އޮފީހެއްގައި ބަންދުވެފައި ތިބެން ނުޖެހުމުގެ ސަބަބުން މަސައްކަތާއި އަމިއްލަ ދިރިއުޅުމާ ދެމެދު ބެލެންސް ހޯދުން ފަސޭހަވެގެންދެއެވެ. ލޯބިވާ މީހުންނާއެކު ގިނަ ވަގުތު ހޭދަކުރުމާއި، އައު ހުނަރުތައް ދަސްކުރުމާއި، ކަސްރަތުކުރުމާއި ނުވަތަ އަރާމުކުރުމަށް އިތުރު ވަގުތު ލިބިގެންދެއެވެ. ދުވަސް ރާވައި ހިންގުމުގެ ބާރު ލިބި، މަސައްކަތާއި އަމިއްލަ ދިރިއުޅުމާ ދެމެދު ރަނގަޅު ބެލެންސެއް ގެނައުމުގެ ފުރުޞަތު ލިބިގެންދެއެވެ.
5 . އަމިއްލައަށް ފަރުމާކުރެވޭ މަސައްކަތުގެ މާޙައުލެއް
ފިނިހޫނުމިނާއި، އަލިކަމާއި އަޑުގެ މިންވަރު ފަދަ ކަންކަން އަމިއްލައަށް ކަނޑައެޅުމުގެ ފުރުޞަތު ގޭގައި މަސައްކަތްކުރުމުން ލިބިގެންދެއެވެ. އަމިއްލައަށް ފަރުމާކުރެވޭ މަސައްކަތުގެ މާޙައުލެއްގައި ހިތްހަމަޖެހުމާއި ނަފްސާނީ ގޮތުން ލުއިކަން ލިބިގެންދާނެއެވެ.
6. ޚަރަދު ކުޑަވުން
ދަތުރުފަތުރުގެ އިތުރުން، ގޭގައި މަސައްކަތްކުރުމުން ގިނަ ޚަރަދުތަކެއް ސަލާމަތްވެގެންދާނެއެވެ. މަސައްކަތަށް ލާ އަންނައުނަށާއި، ބޭރުގައި ކާ ކެއުމަށާއި، ކޮންމެ ދުވަހަކު ގަންނަ ކޮފީއަށް (އެކަމަކު މިއާދަ ދެމެހެއްޓިދާނެ) ކުރާ ޚަރަދު މަދުވާނެއެވެ. އަދި ބައެއް ގޭގައި މަސައްކަތްކުރާ މީހުންނަށް އެމީހުންގެ ގޭ އޮފީހުގެ ބައެއް ޚަރަދުތައް ޓެކްސް ރިޓާންގައި ހިމެނިދާނެއެވެ. އަދި އޮފީހުގެ ޙަރަދުބަރަދުވެސް ވަރަށް ބޮޑުތަނުން ކުޑަ ކުރެވޭނެ ކަމެއްކަމުގައިވެސް ފާހަގަކުރަމެވެ.
7. ސިއްޙީގޮތުން ރަނގަޅު ދިރިއުޅުމެއް
ގޭގައި މަސައްކަތްކުރުމުން ސިއްޙީގޮތުން ރަނގަޅު އާދަތަކަށް ފުރުޞަތު ލިބެއެވެ. ގޭގައި ކައްކާ ކާއެއްޗެހި ތައްޔާރުކުރެވި، މަސައްކަތުގެ ތެރެއިން ހުއްޓާލައިގެން ގައިގޯޅި އެއްލާލުމަށް ނުވަތަ ކަސްރަތުކުރުމަށް ވަގުތު ނެގިދާނެއެވެ. އަދި އޮފީހުގައި ފެތުރޭ ބަލިތަކަށް ހުށަހެޅުން ކުޑަވެގެންދާނެއެވެ.
8. ކޮންމެ ތަނަކުން މަސައްކަތްކުރުން
ދުރުން މަސައްކަތްކުރުމުގެ މާނައަކީ ހަމައެކަނި އަމިއްލަ ސަރަޙައްދުގެ ވަޒީފާތަކަށް ހަނިވެފައި ނުތިބުމެވެ. މިކަމުން މުޅި ދުނިޔޭގެ ފުރުޞަތުތައް ހުޅުވިގެންދާނެއެވެ. އެހެން ސިޓީތަކާއި، ސްޓޭޓްތަކާއި އަދި ޤައުމުތަކުގައި ހުރި ކުންފުނިތަކުގެ ވަޒީފާތަކަށް ކުރިމަތިލުމުގެ ފުރުޞަތު ލިބިގެންދާނެއެވެ.
9. މަދު ނަފްސާނީ ބުރަ
ގޭގައި މަސައްކަތްކުރުމުގެ ސަބަބުން ލިބޭ މިނިވަންކަމާއި، ވަގުތު ސަލާމަތްވުމާއި، ފަސޭހަކަމުގެ ސަބަބުން ނަފްސާނީ ބުރަ ވަރަށް ބޮޑަށް ކުޑަކުރެވޭނެއެވެ. އެމެރިކާގެ މަސައްކަތްތެރިންގެ %83 އަށް މަސައްކަތާ ގުޅިގެން ނަފްސާނީ ބުރަ ކުރިމަތިވެއެވެ. އަދި %25 މީހުން ބުނާ ގޮތުގައި އެމީހުންގެ ވަޒީފާއަކީ އެމީހުންގެ ދިރިއުޅުމުގައި އެންމެ ބޮޑު ނަފްސާނީ ބުރައެވެ. މިކަން މަދުކުރުމުން ނަފްސާނީ އަދި ޖިސްމާނީ ދުޅަހެޔޮކަން ވަރަށް ބޮޑަށް ރަނގަޅުވާނެއެވެ.
10. ފަންނީ ތަރައްޤީއަށް އިތުރު ވަގުތު
ދަތުރުފަތުރު ކުރަން ނުޖެހުމުގެ ސަބަބުން، ކޮންމެ ދުވަހަކު އިތުރު ވަގުތު ލިބި، އެ ވަގުތު ފަންނީ ތަރައްޤީއަށް ބޭނުންކުރެވިދާނެއެވެ. އެއީ އޮންލައިން ކޯހެއް ހެދުން ކަމުގައިވިޔަސް، ފޮތް ކިޔުން ކަމުގައިވިޔަސް، ނުވަތަ ހަމައެކަނި ދާއިރާގެ އާ ޚަބަރުތައް ބެލުން ކަމުގައިވިޔަސް، ގޭގައި މަސައްކަތްކުރުމުން ވަޒީފާގެ ކުރިއެރުމަށް އިތުރު ފުރުސަތުތަކެއް ލިބިދާނެއެވެ.
ގޭގައި މަސައްކަތްކުރުމަކީ ގޮންޖެހުންތަކެއް ނެތް ކަމެއް ނޫންކަން ޔަޤީނެވެ. އެކަމަށް ބޭނުންވަނީ ރަނގަޅު އަޚްލާޤެއް، ވަގުތު ބެލެހެއްޓުމުގެ ފުރިހަމަ ހުނަރު، އަދި އަމިއްލައަށް ހިތްވަރު ދެވޭ ވަރުގެ ޤާބިލުކަމެކެވެ. ނަމަވެސް، އަޅުގަނޑުމެން ފާހަގަކުރި ފަދައިން، ގޭގައި މަސައްކަތްކުރުމަކީ ދިރިއުޅުން ބަދަލުކޮށްލެވިދާނެ ކަމެކެވެ. އިރުއަރާއިރު ތެދުވާ މީހެއް ކަމުގައި ވިޔަސް، ނުވަތަ ރޭގަނޑު ދަންވަރު ހޭލާ މީހެއް ކަމުގައި ވިޔަސް، ޑޭޓާ އެނޮޓޭޝަންގައި ދިރިއުޅުމާ ގުޅޭގޮތަށް މަސައްކަތުގެ ވަގުތު ބައްޓަންކުރެވޭނެއެވެ. މި ފުރުޞަތު ލިބުމަށް ބޭނުންވަނީ ހަމައެކަނި ނިންމުމެކެވެ.
