އުތުރު ކޮރެއާއިން ފަތުރުވެރިންނަށް އެ ޤައުމުގެ ބޯޑަރުތައް މިއަހަރު ޑިސެމްބަރު މަހު ހުޅުވާލުމަށް ނިންމައިފިއެވެ.
މިއީ 2020 ވަނަ އަހަރުގެ ކުރީކޮޅު ކޮވިޑް-19 ބަލިމަޑުކަމާ ގުޅިގެން އެ ޤައުމުގެ ބޯޑަރުތައް ބަންދުކުރި ފަހުން ފުރަތަމަ ފަހަރަށް ހުޅުވާލެވޭ ހުޅުވާލުމެވެ. ޗައިނާގައި ހުންނަ ޓުއަރ އޮޕަރޭޓަރުން ބުނާ ގޮތުގައި ބޭރުގެ ފަތުރުވެރިންނަށް ފުރަތަމަ ހުޅުވާލެވޭނީ ފަރުބަދަތަކުން މުއްސަނދި ސަމްޖިޔޯން ސިޓީއެވެ. އުތުރު ކޮރެއާގެ އެންމެ އުސް ފަރުބަދަ ކަމުގައިވާ މައުންޓް ޕެކްޓޫއާ ކައިރީގައި އޮންނަ ސަމްޖިޔޯންގައި ފާއިތުވި އަހަރުތަކުގައި ވަނީ ބޮޑެތި ތަރައްޤީގެ މަޝްރޫޢުތަކެއް ހިންގާފައެވެ. މީގެ ތެރޭގައި އައު ރޭލްވޭތަކާއި، ހޮޓާތަކާއި އަދި ރިސޯޓެއް އެޅުމުގެ މަޝްރޫޢުތައް ހިމެނެއެވެ.
ކޭޓީޖީ ޓުއަރސް އަދި ކޯރިޔޯ ޓުއަރސް ފަދަ ޓުއަރ އޮޕަރޭޓަރުން މި ހުޅުވާލުމާ މެދު އުންމީދީ ނަޒަރަކުން ބަލާ ކަމަށް ބުނެފައިވެއެވެ. ނަމަވެސް ޤައުމުގެ އެހެން ސަރަޙައްދުތަކަށް ފަތުރުވެރިން ގެންދިއުމާ މެދު އެފަރާތްތަކުން ވަނީ ފަރުވާތެރިވެފައެވެ. ކޮރެއާ ރިސްކް ގްރޫޕްގެ ސީއީއޯ ޗަޑް އޯކެރޯލް ވަނީ ސަމްޖިޔޯންގެ ތަރައްޤީގެ މަޝްރޫޢުތައް އަދި ނިމިފައި ނުވާތީ މިކަމާ މެދު ޝައްކު އުފައްދާފައެވެ.
އުތުރު ކޮރެއާއިން ވަނީ 2024 ވަނަ އަހަރުގެ ކުރީކޮޅުން ފެށިގެން ރަޝިއާގެ ފަތުރުވެރިންނަށް ބައެއް ސަރަޙައްދުތައް ހުޅުވާލާފައެވެ. އަދި ބައިނަލްއަޤްވާމީ ފަތުރުވެރިކަން އަލުން ފަށާނެ ކަމަށް ބެލެވުނު ނަމަވެސް، އެމެރިކާގެ ރައްޔިތުންނަށް އަދިވެސް އެ ޤައުމަށް ދަތުރުކުރުން ވަނީ މަނާކޮށްފައެވެ.
ޤައުމު އަލުން ހުޅުވާލުމުގެ މި މަސައްކަތަކީ އުތުރު ކޮރެއާއިން 'ރަހުމަތްތެރި' ޤައުމުތަކުން އަންނަ ބައިނަލްއަޤްވާމީ ފަތުރުވެރިކަން އާރާސްތުކުރުމަށް ކުރަމުންދާ ފުޅާ މަސައްކަތްތަކުގެ ބައެކެވެ.
