ހަމަލާދޭނެ ކަމަށް ބުނެ އިރާނުން ވަރުގަދަ އިންޒާރުތަކެއް ދިންނަމަވެސް އެކަން ކުރަން އިރާނަށް ނުކެރުނީ އިޒްރޭލުގެ ހިމާޔަތުގައި އެމެރިކާގެ ފައުޖުތައް އައުމުން ކަމަށް ޒަޔަނިސްޓް އިޒްރޭލުގެ ބޮޑުވަޒީރު ބެންޔަމިން ނަތަންޔާހޫ ބުނެފިއެވެ.
ނަތަންޔާހޫ ބުނީ "އަދުއްވުން" ގެ ހަމަލާއިން އިޒްރޭލު ސަލާމަތްކުރަން އެމެރިކާ އޮންނާނެކަން މުޅިދުނިޔެއަށް މިހާރު ގަބޫލް ކުރެވެންވާނެ ކަމަށެވެ. އިޒްރޭލަށް ފައިސާ އާއި އެންމެ ޒަމާނީ ހަތިޔާރު ދީގެން ފަލަސްތީނުގެ ރައްޔިތުންނާ ދެކޮޅަށް، އަދި އަރަބި އިސްލާމީ އެހެން ގައުމުތަކާ ދެކޮޅަށްވެސް އިޒްރޭލުން ޢުދުވާންތައް ހިންގަނީ އެމެރިކާގެ ފުރިހަމަ އެއްބާރުލުން އޮވެގެންކަން މާޒީގައިވެސް ވަނީ ފެނިގެން ގޮސްފައެވެ.
އިޒްރޭލަށް ހަމަލާދޭނެ ކަމަށް ބުނެ އިރާނުން ވަރުގަދަ އިންޒާރުތަކެއް ދިނީ ޖުލައި 30 ވަނަ ދުވަހު، އިރާނުގެ ފަސްގަނޑުގައި ހަމާސް ޖަމާއަތުގެ ލީޑަރު ޑޮކްޓަރ އިސްމާއިލް ހަނިއްޔާ އަވާރަކޮށްލުމާއި ގުޅިގެން އެކަމުގެ ބަދަލު ހިފުމުގެ ގޮތުންނެވެ. އިރާނުން ދީފާނެ ވަރުގަދަ ހަމަލާއަކުން އިޒްރޭލު ދިފާއު ކުރުމަށާއި ހަމަލާގެ ބަދަލު ހިފުމަށް އިރާނަށް ހަމަލާ ދިނުމަށް އެމެރިކާގެ ހަނގުރާމަ މަތީ 2 މަނަވަރާއި 4000 ސިފައިން ޢަރަބި ކަނޑުގެ ސަރަހައްދަށް އެމެރިކާއިން ފޮނުވިއެވެ. އަދި މިދިޔަ ހަފްތާގައި އެމެރިކާއިން ނިއުކްލިއަރ ސަބްމެރީނެއްވެސް އެސަރަހައްދަށް ވަނީ ފޮނުވާފައެވެ. ޢަރަބި އިސްލާމީ ޤައުމުތަކުގައި ޖަގަހަ ޖަހަގައިގެން ތިބި އެމެރިކާގެ ސިފައިންގެ އަދަދު 40،000 އަށްވުރެ މަތިކަން ފާހަގަ ކޮށްލެވެއެވެ.
އިރާނުންދޭ ހަމަލާއެއް އިޒްރޭލު އެކަނި މައިތިރި ނުކުރެވޭނެ ކަމަށް އެމެރިކާގެ މަސްއޫލުވެރިން ވަނީ އެތައްފަހަރަކު ބުނެފައެވެ. އެއީ އިރާނުން އަމިއްލައަށް އުފައްދާފައިވާ ބެލެސްޓިކް މިސައިލާއި އެހެނިހެން ދުރުރާސްތާ މިސައިލުތަކަކީ މިވަގުތު މެދުއިރުމަތީގެ ގައުމެއްގައި ހުރި އެންމެ ނުރައްކާތެރި މިސައިލްތައް ކަމަށް އެމެރިކާގެ އޮފިޝަލުން ގަބޫލް ކުރެއެވެ.
