ޣައްޒާގެ ކަމާލް އަދުވާން ހޮސްޕިޓަލުން ތެޔޮ ހުސްވުމުގެ ބިރާއެކު، އެ ހޮސްޕިޓަލުން ފަރުވާ ހޯދަމުން އަންނަ 11 ކުއްޖެއް މަރުގެ ތުންފަތް މަތީގައިވާ ކަމަށް އެ ހޮސްޕިޓަލުގެ ޑިރެކްޓަރ އަލްޖަޒީރާއަށް މައުލޫމާތު ދެއްވައިފިއެވެ.
ކަމާލް އަދުވާން ހޮސްޕިޓަލުގެ ޑިރެކްޓަރު ޑރ ހުސާމް އަބޫ ސަފިޔާ އަލްޖަޒީރާއަށް ވިދާޅުވީ "ނާސަރީ އާއި އިންޓެންސިވް ކެއާ ޔުނިޓްތަކުގައި ތިބި ބަލި 11 ކުދިން، ތެލުގެ ދަތިކަމުގެ ސަބަބުން ގަޑިއެއްހާއިރުގެ ތެރޭގައި މަރުވުމުގެ ނުރައްކާ އެބައޮތް" ކަމަށެވެ.
ޣައްޒާއިން ރިޕޯޓް ކުރަމުންދާ އަލްޖަޒީރާގެ ހިންދު ޚޫދާރީ ބުނި ގޮތުގައި ޑރ. އަބޫ ސަފިޔާ އިންޒާރު ދެއްވީ، އޭގެ ތެރެއިން ބައެއް ކުދިންނަކީ ތުއްތު ކުދިން ކަމަށްވާއިރު ފަރުވާ ފޯރުކޮށްދިނުމަށް ބޭނުންވާ ވަސީލަތްތައް ހިންގާނެ ތެޔޮ ނުލިބިއްޖެނަމަ ފަރުވާ ހުއްޓުމަކަށް އަންނާނެ ކަމަށެވެ.
"އަޅުގަނޑުމެންނަށް އެނގޭ ދުނިޔޭގެ ސިއްހަތު ޖަމިއްޔާގެ ތެލާއި ބޭސް ފުރިފައިވާ ކޮންވޯއީއެއް ޣައްޒާގެ އުތުރު ސަރަހައްދަށް ދަތުރުކުރާކަން، އެކަމަކު މިހާތަނަށް އެމީހުން އަދިވެސް ތިބީ ޒަޔަނިސްޓް އިސްރާއީލުގެ ސިފައިން ހުރަސްކުރާ ފެހި ސިގްނަލްގެ އިންތިޒާރުގައި ޗެކްޕޮއިންޓްގައި،" ޑރ. އަބޫ ސަފިޔާއާ ހަވާލާދީ އަލްޖަޒީރާގެ ރިޕޯޓަރ ބުންޏެވެ.
ފަލަސްތީނުގެ ހެލްތު މިނިސްޓްރީން ބުނި ގޮތުގައި އޮކްޓޯބަރު މަހުގެ ހަތް ވަނަ ދުވަހުން ފެށިގެން މަދުވެގެން 33 ސިއްހީ މަރުކަޒެއްގެ ހިދުމަތް ކެނޑިފައިވާ ކަމަށާއި ބާކީ ހުރި ހޮސްޕިޓަލްތައް ހިންގުމަށް ކޮންމެ ދުވަހަކު މަދުވެގެން 4،000 ލީޓަރު [1،056 ގޭލޯން] ތެޔޮ ބޭނުންވާ ކަމަށެވެ.
