މިޔަންމާގައި ހިނގަމުންދާ އަނިޔާވެރިކަމުން ސަލާމަތްވާންޔަ ރޯހިންޔާ މުސްލިމުންގެ ތެރެއިން އެތައް ސަތޭކަ ބަޔަކު ޑްރޯން ހަމަލާތަކެއްގައި ޝަހީދުކޮށްލައިފިއެވެ.
މީގެ ތެރޭގައި އެތަކެއް އަންހެނުންނާއި ކުޑަކުދިންވެސް ހިމެނެއެވެ.
މިހަމަލާއާ ގުޅިގެން މިޔަންމާގައި ނަސްލު ނައްތާލުމަށް ހިންގާ ޤަތުލް އާންމު އަލުން ފެށިދާނެކަމުގެ ބިރުވެރިކަން އިތުރުވެއްޖެއެވެ. މި ހަމަލާތައް ދެވުނީ އޯގަސްޓު 5 ވަނަ ދުވަހު، ނާފް ކޯރު މަގުން ބަންގްލަދޭޝްއަށް ވަނުމަށް މަސައްކަތްކުރަމުންދިޔަ ނިކަމެތިވެފައިވާ ޢާއިލާތަކަށް ކަމަށް މިހާރު ވަނީ ކަށަވަރުކުރެވިފައެވެ.
ސޯޝަލް މީޑިއާގައި ޙިއްސާކުރެވި، ސީއެންއެންއިން ޞައްޙަކަން ކަށަވަރުކޮށްފައިވާ ވީޑިއޯތަކުން ދައްކައިދެނީ ކޯރުގެ އައްސޭރިފަށުގައި އެތުރިފައިވާ މީހުންގެ ހަށިތަކުގެ ހިތާމަވެރި މަންޒަރުތަކެވެ. ޑްރޯން ހަމަލާތައް އަމާޒުކުރެވުނީ އުތުރު ރަޚީންގައިވާ މައުންގްޑޯ ރަށްފުށުން ފިލަމުންދިޔަ އާންމު ރައްޔިތުންނަށް ކަމަށް ހެކިންނާއި ރޯހިންގިޔާގެ ޙައްޤުތަކަށް ވަކާލާތުކުރާ ފަރާތްތަކުން ކަށަވަރުކޮށްދީފައިވެއެވެ.
ކަށަވަރުނުކުރެވޭ ރިޕޯޓުތަކުން ލަފާކުރާގޮތުގައި މި ހަމަލާތަކުގައި 200 އެއްހާ މީހުން ޝަހީދުވެފައިވެއެވެ. މިއީ 2021 ގައި ހިނގި ސިފައިންގެ ބަޣާވާތާ ގުޅިގެން ފެށުނު މިޔަންމާގެ އަހުލީ ހަނގުރާމައަށްފަހު އާންމު ރައްޔިތުންނަށް ދެވުނު އެންމެ ނުރައްކާތެރި ހަމަލާއެވެ.
މިޔަންމާގެ ސިފައިންނާ ހަނގުރާމަކުރަމުންދާ ހަތިޔާރުއެޅި ގްރޫޕެއްކަމަށްވާ އަރަކާން އާމީ (އޭއޭ) އަކީ މި ހަމަލާތަކުގެ ފަހަތުގައިވާ ފަރާތްކަމަށް ތުހުމަތުކުރެވެއެވެ. ނަމަވެސް، އޭއޭ އިން މިކަމުގައި އެމީހުންގެ އަތެއް ނެތްކަމަށް ބުނެފައިވެއެވެ. އަދި މި ހަމަލާތައް ހިނގާފައިވަނީ އެމީހުންގެ ބާރު ހިނގާ ސަރަހައްދުން ބޭރުގައިކަމަށާއި، މި އަނިޔާވެރިކަމުގެ ފަހަތުގައިވަނީ މިޔަންމާގެ ސިފައިންނާއި އެމީހުންނާ ގުޅިފައިވާ ގްރޫޕްތައްކަމަށް ބުނެފައިވެއެވެ.
ހާލަތު ވަރަށް ނުރައްކާތެރި ގޮތެއްގައި ދެމިއޮތުމާއެކު، ބަންގްލަދޭޝްގެ ބޯޑަރާ ކައިރި ރަށްތަކުގައި އަނިޔާވެރިކަން ކުރިއަށްދާކަމަށް ރިޕޯޓުކުރެވެއެވެ. މީގެ ތެރޭގައި ޖިންސީ އަނިޔާއާއި، މީހުން މަޖުބޫރުން ސިފައިންގެ ތެރެއަށް ވެއްދުމާއި، ގެތައް އަންދާލުން ހިމެނެއެވެ. ޑޮކްޓަރސް ވިތައުޓް ބޯޑަރސް ފަދަ އިންސާނީ އެހީދޭ ޖަމިއްޔާތަކުން ބަންގްލަދޭޝްގައި ތިބި ގިނަ އަދަދެއްގެ ރޮހިންޔާރެފިއުޖީންނަށް މި ހަމަލާތަކުގައި ލިބުނު އަނިޔާތަކަށް ފަރުވާދީފައިވެއެވެ.
ހާލަތު ގޯސްވަމުންދާއިރު، މިޔަންމާގެ ސިފައިންނާއި އޭއޭ އިން ރޮހިންގިޔާއިންނަށް އަނިޔާވެރި ޢަމަލުތައް ހިންގާކަމަށް ތުހުމަތުކުރެވެއެވެ. މިކަމުން އަލުން ނަސްލު ނައްތާލުމުގެ ކެމްޕޭނެއް ފެށިދާނެކަމުގެ ކަންބޮޑުވުން އުފެދިފައިވެއެވެ. ބައިނަލްއަޤްވާމީ މުޖުތަމަޢުއިން ދަނީ އިތުރު އަނިޔާވެރިކަން ހުއްޓުވުމަށާއި ނާޒުކު ހާލަތުގައިވާ ރޮހިންޔާމީހުން ރައްކާތެރިކުރުމަށް ވަގުތުން ފިޔަވަޅު އެޅުމަށް ގޮވާލަމުންނެވެ.
