ބަތް ކައްކާފައި ބާކީވާ ކިރުކަހަލަ ފެނަކީ އެތަކެއް ސިއްޙީ ފައިދާތަކެއް ލިބޭ ޤުދުރަތީ ބޭހެކެވެ. ގިނަ މީހުން ބަތް ކައްކާފައި މާބޮޑަށް ނުވިސްނާ އުކާލި ނަމަވެސް މިއީ ބޭނުން ނުކުރާވަރު އެއްޗެއްނޫނެވެ.
ފުރަތަމަ ކަމަކަށް، މި ހަނޑޫ ފެނަކީ ހަކަތަ ލިއްބައިދޭ އެއްޗެކެވެ. މިފެނުގައި ކާބޯހައިޑްރޭޓް ގިނައިން ހުންނާތީ، މިފެން ބޯލުމުން ގައިގައި ވަރު ޖަހައެވެ. ޚާއްޞަކޮށް ކަސްރަތުކުރުމަށްފަހު ނުވަތަ ވަރުބަލިވެފައި ހުންނަ ވަގުތުތަކުގައެވެ.
ފެނަކީ ހަށިގަނޑަށް ނުހަނު މުހިންމު އެއްޗެކެވެ. ހަނޑޫ ފެނުން މިކަމަށްވެސް އެހީތެރިކަން ލިބެއެވެ. މިފެނުގައި ހަށިގަނޑަށް ބޭނުންވާ މުހިންމު ނިއުޓްރިއެންޓްސް ހުރުމުގެ ސަބަބުން ހަށިގަނޑުގައި އިލެކްޓްރޯލައިޓްސްގެ ބެލެންސް ހިފެހެއްޓުމަށް އެހީތެރިވެދެއެވެ. މިއީ ހޫނު މޫސުމުގައި ނުވަތަ ބަލިވެގެން އުޅޭއިރު ޚާއްޞަކޮށް މުހިންމު ކަމެކެވެ.
މީގެ އިތުރުން، ހަނޑޫ ފެނުގައި ވިޓަމިން ބީ1، ބީ2 އަދި ބީ6 ފަދަ ވިޓަމިންތައް ގިނައިން ހުރެއެވެ. މިއީ ހަށިގަނޑުގެ މެޓަބޮލިޒަމް އަދި ސިކުނޑީގެ މަސައްކަތްތަކަށް ވަރަށް މުހިންމު ވިޓަމިންތަކެކެވެ. މެގްނީޒިއަމް އަދި ޕޮޓޭޝިއަމް ފަދަ މުހިންމު މިނަރަލްތައްވެސް ހުރެއެވެ. މިއީ މުޅި ހަށިގަނޑުގެ ސިއްޙަތަށް މުހިންމު ތަކެއްޗެވެ.
ހަނޑޫ ފެނަކީ ހަމައެކަނި ހަށިގަނޑުގެ އެތެރެއަށް ރަނގަޅު އެއްޗެއް ނޫނެވެ. މިއީ ހަމުގެ ސިއްޙަތަށްވެސް ވަރަށް ރަނގަޅު އެއްޗެކެވެ. މިފެނުގައި ހުންނަ ފިނިކުރުވާ އަދި 'ކޫލިން' އަދި 'އެންޓީ އިިންފްލެމެޓޮރީ" ބާވަތްތަކުގެ ސަބަބުން ހަމުގެ ރިއްސުންތަކާއި ހިރުވުންތައް ފިލުވައިދީ، ހަމުގެ ސިއްޙަތު ރަނގަޅުކޮށް، އެކްނީ ވެސް މަދުކޮށްދެއެވެ. މިފައިދާތައް ހޯދުމަށް މިފެން ބޯލެވިދާނެއެވެ. ނުވަތަ ސީދާ ހަމުގައި ލެވިވެސްދާނެއެވެ.
ލޭގެ ޕްރެޝަރ މައްޗަށް ދިއުމުގެ މައްސަލައާ ކުރިމަތިލާންޖެހޭނަމަ، ހަނޑޫ ފެން ބޭނުންކުރުމުން އެހީތެރިކަން ލިބިދާނެއެވެ. މިފެނުގައި ހުންނަ ޕޮޓޭޝިއަމްގެ ސަބަބުން ހަށިގަނޑުގައި ސޯޑިއަމްގެ މިންވަރު ބެލެންސްކޮށްދެއެވެ. މިކަމުގެ ސަބަބުން ހިތުގެ ސިއްޙަތު ރަނގަޅުވެ، ލޭގެ ޕްރެޝަރ ކޮންޓްރޯލް ކުރުމަށް އެހީތެރިވެދެއެވެ.
ހަނޑޫ ފެނުން ހަށިގަނޑުގެ ދިފާޢީ ނިޒާމަށްވެސް ބާރު ލިބެއެވެ. މިފެނުގައި ހުންނަ ވިޓަމިންތަކާއި އެންޓިއޮކްސިޑެންޓްތަކުގެ ސަބަބުން ހަށިގަނޑުގެ ދިފާޢީ ނިޒާމު ވަރުގަދަވެ، ބަލިތަކާއި އިންފެކްޝަންތަކާ ދެކޮޅަށް ހަށިގަނޑު ދިފާޢުކުރުމަށް އެހީތެރިވެދެއެވެ.
ބޭރަށް ހިންގުން ނުވަތަ ބަނޑުހިކުން ފަދަ ހަޖަމުކުރުމުގެ މައްސަލަތަކާ އެހެނިހެން މައްސަލަތަކާ ކުރިމަތިލާންޖެހޭނަމަ، ހަނޑޫ ފެނަކީ ޤުދުރަތީ ފަރުވާއެކެވެ. މިފެނުގައި ހުންނަ ސިފަތަކުގެ ސަބަބުން ބަނޑުގެ ހަރަކާތްތައް ރަނގަޅުކޮށް، ބަނޑުގެ ސިއްޙަތު ރަނގަޅުކޮށްދެއެވެ. އަދި މި ފެނުގެ ހިމެނޭ ފައިބާރގެ އެހީގައި ބަނޑު ހިކުމުގެ މައްސަލަތައް ހައްލުކުރުމަށް އެހީވެއެވެ.
ހަށިގަނިގަނޑުގެ ބަރުދަން ކޮންޓްރޯލް ކުރަން ބޭނުންވާ ފަރާތްތަކަށްވެސް ހަނޑޫ ފެނަކީ ބޭނުންތެރި އެއްޗެކެވެ. މިފެނުގައި ކެލެރީ މަދުވެފައި، ބަނޑުފުރޭ ކަހަލަ އިހުސާސެއް ލިބޭތީ، ކާހިތްވުން މަދުކޮށް، ގިނައިން ކެއުމުގެ އާދަ ކުޑަކުރުމަށް އެހީތެރިވެދެއެވެ.
ހަނޑޫ ފެން ދުވަހުން ދުވަހަށް ބޭނުންކުރުމަކީ މުޅި ހަށިގަނޑުގެ ދުޅަހެޔޮކަން އިތުރުކުރުމަށް ކުރެވިދާނެ ވަރަށް ފަސޭހަކަމެކެވެ.
