ތިޔައީ މީރުކޮށް ލޮނުމިރުސް ގަނޑެއް ތައްޔާރު ކުރަން ނޭނގޭ މީހެއް ހެއްޔެވެ؟ މިފަހަރު މިއޮތީ އެކަން ބަދަލުކޮށްލާނެ ވަގުތު ޖެހިފައެވެ.
ބާބަކިއު ޖެހުމަށް ދިޔުމުގެ ކުރިން އެންމެ މުހިއްމު ކަމަކަށްވެފައި އޮންނަނީ މީރު ލޮނުމިރުސް ގަނޑެއް ތައްޔާރު ކުރުމެވެ. ހަނދާނުން ނުފިލާ ހުންނާނެ ދަތުރަކަށް އެ ދަތުރެއް ވެގެންދަނީވެސް މީރު ލޮނުމިރުސްގަނޑެއްގެ ސަބަބުންނޭވެސް ބުނެވިދާނެއެވެ.
ލޮނުމިރުސްލޮނުމިރުހަކީ މާކުރީ ޒަމާނުން ފެށިގެން ދިވެހިންގެ ކެޔުމާއި ގުޅިލާމެހިފައި އޮތް އެއްޗެކެވެ. ލޮނުމިރުހަކީ ތައްޔާރުކުރުމަށްފަހު ވަރަށް ގިނަދުވަސް ވަންދެން ރައްކާކޮށްފައި ބެހެއްޓޭނެ ކެއުމެކެވެ.
ދިވެއްސެއްނަމަ އައިސްއަލަމާރީގައި ކޮންމެހެންވެސް ލޮނުމިރުހަކީ ހުންނަން ޖެހޭ އެއްޗެކެވެ.
(ތައްޔާރު ކުރެވޭނީ:1 ޖޯޑު)
ބޭނުންވާ ތަކެތި:
½ ޖޯޑު ފިޔާ ( ހިމުންކޮށް ކޮށާފައި) ، 1 ގިތެޔޮ މިރުސް ، 2 ލޮނުމެދު ، ½ ޖޯޑު ކާށި (ކޮށާފައި) ، ½ ޖޯޑު ހިކަނދި ފަތް ، ½ ސައިސަމުސާ ދިރި ، ½ ސައިސަމުސާ އަސޭ މިރުސް ، ½ ޖޯޑު ހިކި މިރުސް ، ¼ ޖޯޑު ހުތް އަނބު (ކޮށާފައި) ، ½ ސައިސަމުސާ ލޮނު ، 2 މޭޒުމަތީ ސަމުސާ ފެން
ހަދާނެގޮތް:
ތަވައެއްގައި ކާށި، އަސޭމިރުސް، ހިކި މިރުސް މަޑު ގިނީގައި ކާށި ކޮޅު ރަތް ވަންދެން ހަނާކުރާށެވެ. ހަނާ ކުރި ތަކެތި މިކްސްޗަރަކަށް އެޅުމަށްފަހު ފުނޑާލާށެވެ. ފުނޑަން ވާނީ ތަންކޮޅެއް ރާޅުކޮށެވެ. ބާކީ ހުރި ތަކެތި މިކްސްޗަރަށް އެޅުމަށްފަހު 3-2 މިނެޓު ވަންދެން ފުނޑާށެވެ. ފުނޑަމުންދާއިރު، ރަނގަޅަށް ފުނޑޭތޯ ބަލައި، އިތުރަށް ފެން އަޅަން ޖެހޭނަމަ ފެންއަޅަމުން ގެންދާށެވެ.
ނޯޓް: ރަނގަޅަށް ހިމުންކޮށް ފުނޑުމަށްފަހު މަތި ބަންދު ކުރެވޭ ތައްޓަކަށް ލުމަށްފަހު އައިސް އަލަމާރީގައި ރައްކާކުރާށެވެ. އޭރުން ހަލާކުނުވެ ގިނަ ދުވަސް ވަންދެން ހުންނާނެއެވެ.
ރެފަރެންސް: މޯލްޑިވްސްކޫކް
