ދިވެހިރާއްޖޭގެ ޙައްޖު ކޯޕަރޭޝަންގެ އައު ހެޑްކުއާޓަރސްގެ ބިންގާ އަޅައިފިއެވެ. އެ އިމާރާތުގެ ބިންގާ އަޅައިދެއްވީ ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ޝަކީލާއި އެ ކޯޕަރޭޝަންގެ އެހެނިހެން އިސް ބޭފުޅުންނެވެ.
މި އައު އިމާރާތް ބިނާކުރެވެނީ ހުޅުމާލޭގައި އަމީން އެވެނިއުގެ ކުރިމަތީގައިވާ ހުސް ބިމެއްގައެވެ. މި މަޝްރޫޢު ތަންފީޒުކުރުމުގެ މަސައްކަތް ޙަވާލުކުރެވިފައިވަނީ މެޑްޓެކް މޯލްޑިވްސްއާއެވެ. މި އިމާރާތް އެޅުމުގެ މަސައްކަތް ކުރެވޭނީ 5،000 އޭކަރުގެ ބިމެއްގައިއެވެ. އަދި މި މަޝްރޫޢު 18 މަސްދުވަހުގެ ތެރޭގައި ނިންމުމަށް މެޑްޓެކުން އެއްބަސްވެފައިވެއެވެ.
ބިންގާ އެޅުމެޅުމުގެ ރަސްމިއްޔާތުގައި މެނޭޖިންގ ޑިރެކްޓަރ ޝަކީލް މި މަޝްރޫޢުގެ މާލީ ތަފްސީލުތައް ހިއްސާކުރެއްވިއެވެ. އެގޮތުން މަޝްރޫއަށް ފުރަތަމަ ހަވާލުކުރީ 86 މިލިއަން ރުފިޔާ ކަމަށާއި، ނަމަވެސް މެޑްޓެކާ މަޝްވަރާކުރުމަށްފަހު މި އަގު 79 މިލިއަން ރުފިޔާއަށް ދަށްކުރެވިފައިވާ ކަމަށް ޝަކީލް ވިދާޅުވިއެވެ.
މި އައު އިމާރާތަކީ ދާއިމީ އަދި ހަރުދަނާ ޙައްޖު ކޯޕަރޭޝަން އޮފީހެއް ޤާއިމުކުރުމަށް ކޯޕަރޭޝަނުން ކުރަމުންދާ މަސައްކަތުގެ ފުރަތަމަ ފިޔަވަޅުކަމަށް ފާހަގަކުރައްވަމުން، ޙައްޖު ކޯޕަރޭޝަން އުފެއްދެވުމަށް ރައީސުލްޖުމްހޫރިއްޔާ ވަކިން ޚާއްޞަކޮށް އެދިވަޑައިގެންފައިވާކަމަށް ޝަކީލް ވިދާޅުވިއެވެ. މި މަޝްރޫޢުގެ މުހިންމު ކުރިއެރުންތަކާ ބެހޭ އިތުރު މަޢުލޫމާތު ކުރިއަށް އޮތް ދުވަސްތަކުގައި ހާމަކުރައްވާނެ ކަމަށް ޝަކީލް ވަޢުދުވެވަޑައިގެންނެވިއެވެ.
ރޭވިފައިވާ ގޮތުން މި އިމާރާތުގައި 9 ފަންްގިފިލާ ހުންނާނެއެވެ. އަދި އިމާރާތް ނިމުމުން ޙައްޖު ކޯޕަރޭޝަންގެ އޮފީސް މި އައު އިމާރާތަށް ބަދަލުކުރެވޭނެއެވެ. މީގެ އިތުރުން، އައު އިމާރާތުގެ ބައެއް ފަންގިފިލާތައް އޮފީސް ޖާގައިގެ ގޮތުގައި ކުއްޔަށް ދޫކުރެވޭނެއެވެ.
2013 ވަނަ އަހަރު ރައީސުލްޖުމްހޫރިއްޔާގެ ޤަރާރަކުން އުފެއްދެވި މޯލްޑިވްސް ޙައްޖު ކޯޕަރޭޝަން ލިމިޓެޑް މީގެ ކުރިން ހިންގަމުން އައީ ތަފާތު ކުއްޔަށް ހިފާފައިވާ ތަންތަނުގައެވެ. މި އައު އިމާރާތަކީ ކޯޕަރޭޝަންގެ މާލީ ޙާލަތާއި ހިންގުމުގެ ހަރުދަނާކަން އިތުރުކުރުމަށް އަމާޒުކޮށް، ރިއަލް އެސްޓޭޓްގެ ދާއިރާއަށް ކޯޕަރޭޝަނުން ވަދެ ކުންފުނީގެ ފައިދާ އިތުރުކޮށް ކުންފުނި ކޮޅަށް ޖެހުމަށެވެ.
މި އައު ހެޑްކުއާޓަރސްއާ އެކު، މޯލްޑިވްސް ޙައްޖު ކޯޕަރޭޝަނަށް އޭގެ ޚިދުމަތްތައް ފުޅާކޮށް، އަމާޒުތައް އިތުރަށް ޙާޞިލުކުރުމަށް މަގުފަހިވެގެންދާނެއެވެ. މިއީ އެ މުއައްސަސާގެ ތަރައްޤީގައި ފާހަގަކޮށްލެވޭ މުހިންމު ފިޔަވަޅެކެވެ.
