ގިނަ ބަޔަކު އިންތިޒާރުކުރަމުން އައި ޓިމް ބާޓަންގެ 'ބީޓްލްޖޫސް ބީޓްލްޖޫސް'، އަމެރިކާގެ ބޮކްސް އޮފީހުގައި 111 މިލިއަން ޑޮލަރު ހޯދައި، ހޮލީވުޑްގެ ތާރީހުގައި ސެޕްޓެމްބަރ މަހު ދެވަނައަށް އެންމެ މަތީ އާމްދަނީ ލިބުނު ފިލްމަށްވެއްޖެއެވެ.
މިއީ 2017 ގެ 'އިޓް' ގެ ފަހުން ސެޕްޓެމްބަރު މަހުގެ އެންމެ މަތީ އާމްދަނީއެވެ.
މިމަހު 6 ގައި ރިލީސްކުރި މި ފިލްމަކީ 36 އަހަރުގެ މެދުކެނޑުމަކަށްފަހު މައިކަލް ކީޓަން، އޭނާގެ މަޝްހޫރު ކެރެކްޓަރާއެކު އަލުން ބޮޑު ސްކީރާނަށް އަނބުރާ ގެނެސްދި ފިލްމެކެވެ. ފިލްމު އަމެރިކާގައި ކާމިޔާބުވި ނަމަވެސް، އެމެރިކާއިން ބޭރު ގައުމުތަކުގައި ފިލްމުގެ ތަރުހީބު އެއާ އަޅާބަލާއިރު ކުޑައެވެ. މިގޮތުން، 69 މާކެޓެއްގައި 35 މިލިއަން ޑޮލަރު މި ފިލްމުން ވަނީ ހޯދާފައެވެ. ބައިނަލްއަޤްވާމީ ގޮތުން އެންމެ ގިނަ އާމްދަނީ ހޯދީ ޔޫކޭއިން 9.6 މިލިއަން ޑޮލަރާއެކުއެވެ. އެއާޖެހިގެން މެކްސިކޯއިން 6.5 މިލިއަން ޑޮލަރު ހޯދިއެވެ. ނަމަވެސް، ފްރާންސް އަދި ޖަޕާން ފަދަ ބޮޑެތި މާކެޓްތަކުގައި 'ބީޓްލްޖޫސް ބީޓްލްޖޫސް' އަދި ދައްކަން ފަށާފައެއް ނުވެއެވެ.
'ސްޓްރޭންޖާ ތިންގްސް" ގެ ވިނޯނާ ރައިޑަރ، "ވެންސްޑޭ" ގެ ޖެނާ އޯޓެގާ އަދި ކެތަރިން އޯހާރާ ފަދަ ތަރިން ހިމެނޭ މި ފިލްމަށް ހުރިހާ އުމުރުފުރައެއްގެ މީހުންގެ ތަރުހީބު ލިބި، އައިމެކްސް ފަދަ ބޮޑެތި ސްކްރީންތަކުގައި ދެއްކުމުން ފައިދާވިއެވެ. މީގެ އިތުރުން، ސިނެމާސްކޯގައި +B އެއް ލިބި، ރޮޓަން ޓޮމޭޓޯސްގައި %76 ސްކޯއެއް ލިބިފައިވެއެވެ.
'ބީޓްލްޖޫސް ބީޓްލްޖޫސް' ގެ ކާމިޔާބީ ބިނާވެގެންދާނީ ކުރިއަށް އޮތްތަނުގައި ބޮކްސް އޮފީހުގައި ކުރާ ޕަރފޯމަންސްގެ މައްޗަށެވެ. އައު ސަރަޙައްދުތަކަށް ފިލްމު ފުޅާވެގެންދާއިރު ބައިނަލްއަޤްވާމީ ގޮތުން އިތުރަށް ކުރިއަރާނެކަމުގެ އުއްމީދު ބޮޑެވެ.
